އޮސްޓްރޭލިއާއިން 16 އަހަރުގެ ދަށުގެ ކުދިންނަށް ސޯޝަލް މިޑިއާ މަނާކުރާ ގާނޫނެއް ތައާރަފުކުރުމުގެ މަސައްކަތް ކުރަމުން އަންނަކަން އިއުލާންކޮށްފިއެވެ.
މިއީ މިފަދަ ގާނޫނެއް ގައުމަކުން ތައާރަފުކުރާ ފުރަތަމަ ފަހަރެވެ.
ބޮޑުވަޒީރު އެންތޮނީ އަލްބަނީޒް ވިދާޅުވީ އަންނަ ހަފުތާގައި ގާނޫނު ހަދާ މަޖިލީހަށް ހުށަހެޅުމަށް ނިންމާފައިވާ އެ ގާނޫނުގެ މަގުސަދަކީ ސޯޝަލް މީޑިއާއިން އޮސްޓްރޭލިއާގެ ކުދިންނަށް ލިބެމުންދާ ގެއްލުން ކުޑަކުރުން ކަމަށެވެ.
"މިއީ މައިންބަފައިންނަށް ކޮށްދޭ ކަމެއް. އެ މީހުންވެސް އަޅުގަނޑު ފަދައިން ކަންބޮޑުވެފައި ތިބީ ކުދިންގެ ސަލާމަތާ މެދު. އަޅުގަނޑު ބޭނުންވަނީ އޮސްޓްރޭލިއާ ސަރުކާރު އޮތީ އާއިލާތަކުގެ ފަހަތުގައިކަން އަންގަން،" އޭނާ ވިދާޅުވިއެވެ.
އެ ބިލުގެ އިތުރު ތަފުސީލެއް މިހާތަނަށް ހާމަކޮށްފައިނުވި ނަމަވެސް، ސަރުކާރުން ވަނީ، މައިންބަފައިންގެ ހުއްދަ ލިބިގެން ސޯޝަލް މީޑއާ ބޭނުންކުރާ ކުދިން ވެސް 16 އަހަރު ނުވާނަމަ، ގާނޫނަށް އަމަލުކުރަން ޖެހޭނެ ކަމަށް ބުނެފައެވެ.
ސަރުކާރުން ބުނާ ގޮތުގައި އެ ގާނޫނު ތަންފީޒު ކުރުމުގެ ޒިންމާ އޮންނާނީ ސޯޝަލް މީޑިއާ ޕްލެޓްފޯމްތަކަށެވެ. އެގޮތުން އެ ކުދިންނަށް އެކްސެސް ނުދިނުމަށް އެ ޕްލެޓްފޯމްތަކުން އެކަށީގެންވާ ފިޔަވަޅުތައް އަޅަންޖެހޭނެއެވެ.
އަލްބަނީސް ވިދާޅުވީ ސޯޝަލް މީޑިއާ ބޭނުންކުރާ މީހުންނަށް އެއްވެސް އަދަބެއް ނޯންނާނެ ކަމަށާއި، ގާނޫނުތައް ތަންފީޒު ކުރުމަކީ އޮސްޓްރޭލިއާގެ އޮންލައިން ރެގިއުލޭޓަރު އީސޭފްޓީ ކޮމިޝަނަރުގެ ޒިންމާއެއް ކަމަށެވެ.
އެ ގާނޫނަށް އަމަލުކުރަން ފަށާނީ އެ ގާނޫނު ފާސްވާތާ 12 މަސް ފަހުން ކަމަށާއި އެ ގާނޫނު ތަންފީޒު ކުރުމަށް ފަހު ރިވިއު ކުރެވޭނެ ކަމަށްވެސް ސަރުކާރުން ބުނެފައިވެއެވެ.
ސޯޝަލް މީޑިއާ ޕްލެޓްފޯމްތަކުގެ ސަބަބުން ފުރާވަރުގެ ކުދިންގެ ނަފްސާނީ ދުޅަހެޔޮކަމަށް ގެއްލުން ލިބިދާނެ ކަމަށް ގިނަ ތަޖުރިބާކާރުން އެއްބަސްވާއިރު، ކުޑަކުދިންނަށް ސޯޝަލް މީޑިއާ އެއްކޮށް މަނާކުރުމުގެ ފައިދާއާ މެދު ގިނަ ތަޖުރިބާކާރުން ދެބަސްވެ އެވެ.
ބައެއް ތަޖުރިބާކާރުން ވިދާޅުވާ ގޮތުގައި ސޯޝަލް މީޑިއާ މަނާކުރުމުގެ ސަބަބުން ހަމައެކަނި ކުރެވޭ ކަމަކީ ޓިކްޓޮކް، އިންސްޓްގްރާމް، އަދި ފޭސްބުކް ފަދަ އެޕްތަކަށް ވަނުން ފަސްކުރެވުމެވެ. އޭގެ ބަދަލުގައި ރައްކާތެރިކަމާއެކު ސޯޝަލް މީޑިއާ ބޭނުންކުރާނެ ގޮތްތައް ކިޔައިދިނުން މާ ބޭނުންތެރި ކަމަށް އެ ފަރާތްތަކުން ބުނެއެވެ.
ސޯޝަލް މީޑިއާ އެކްސެސް ހަނިކުރުމަށް ޔޫރަޕިއަން ޔޫނިއަން ހިމެނޭ ގޮތަށް ކުރި މަސައްކަތްތައް ނާކާމިޔާބުވެފައިވާއިރު، އެކަން ތަންފީޒު ކުރުމަށް ބޮޑެތި ގޮންޖެހުންތަކެއް ވެސް ވަނީ ކުރިމަތިވެފައެވެ.