ވޭޕް އެތެރެކޮށް އޭގެ ވިޔަފާރި ކުރުމާއި އެ ބޭނުން ކުރުން މަނާކުރުމުގެ ބިލް ރައްޔިތުންގެ މަޖިލީހުގެ އިޖުތިމާއީ ކޮމިޓީން މިއަދު ފާސްކޮށްފިއެވެ.
އިޖުތިމާއީ ކޮމިޓީގެ މިއަދުގެ ބައްދަލުވުމުގައި އޮތީ ދުންފަތް ކޮންޓްރޯލް ކުރުމާބެހޭ ގާނޫނަށް އިސްލާހު ގެނައުމުގެ ބިލް ދިރާސާ ކުރުމެވެ.
މިއަދު އެ ކޮމިޓީގައިވަނީ މި ބިލަށް ބައެއް އިސްލާހުތައް ވެސް ގެނެސްފައެވެ.
އެ ގޮތުން ކޮމަންޑޫ ދާއިރާގެ މެންބަރު މުހައްމަދު އިބްރާހީމް ވަނީ ދުންފަތުގެ އެއްވެސް ބާވަތެއް ނުވަތަ ދުންފަތުގެ އެއްވެސް ބާވަތެއް އެކުލެވޭ ތަކެތި އާންމުކޮށް ފެންނާނެހެން ބެހެއްޓުމަކީ އެ ތަކެތި އިޝްތިހާރު ކުރުން ކަމުގައި ބެލެވޭނެ ކަމަށް ބުނެ އިސްލާހެއް ހުށަހަޅުއްވައިފައެވެ.
އެ އިސްލާހަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ތާއީދު ކުރައްވައި، ކޮމިޓީގެ އިއްތިފާގުން ވަނީ ފާސްކޮށްފައެވެ.
މީގެ އިތުރުން ދާންދޫ ދާއިރާގެ މެންބަރު މުހައްމަދު ފަޒީލްވަނީ އިލެކްޓްރޯނިކް ސިނގިރެޓު އަދި ވޭޕް ކުރުމަށް ބޭނުންކުރާ އާލާތެއް ނުވަތަ އެ ފަދަ އެއްޗަކާއެކު ބޭނުން ކުރުމަށް އުފައްދާފައިވާ އެއްޗެއް ވިއްކުމަކީ ނުވަތަ ހިލޭ ބެހީ ކުޑަކުއްޖަކަށް ކަމަށް ވާނަމަ، އެ ފަރާތެއް 50،000 ރުފިޔާއިން ޖޫރިމަނާ ކުރެވޭނެ ގޮތަށް އިސްލާހެއް ހުށަހަޅުއްވައިފައެވެ. އެ އިސްލާހު ވެސް ފާސްކުރީ ކޮމިޓީގެ އިއްތިފާގުންނެވެ.
އަދި އެ ގާނޫނުގައި ދުންފަތް މާނަ ކުރާނެ ގޮތަށް ވެސް ފަޒީލްވަނީ އިސްލާހެއް ހުށަހޅުއްވައިފައެވެ. އެ އިސްލާހުގައިވާ ގޮތުން ދުންފަތުގެ ބާވަތްތައް ކަމަށް ބުނެފައިވަނީ ދުންފަތާއި ދުންފަތުގެ ތަނޑިއާއި ނިކޮޓިން ހިމަނައިގެން ތައްޔާރުކޮށްފައި ހުންނަ ތަކެއްޗަށެވެ.
އަދި އެއިން އެއްވެސް ބާވަތެއް އެއްވެސް މިންވަރަކަށް ހިމެނޭ، ހަފައިގެން ނުވަތަ ބޮއެގެން ނުވަތަ ވަސް ދަމައިގެން ނުވަތަ ހަށިގަނޑުގެ ތަނެއްގައި ތަތްކޮށްގެން ނުވަތަ ޖައްސައިގެން ނުވަތަ އުނގުޅައިގެން ވިޔަސް، އޭގެ މާއްދާއެއް ހަށިގަނޑަށް ވާސިލުވާ ގޮތަށް ތައްޔާރުކޮށްފައި ހުންނަ ކޮންމެ ބާވަތަކީ ދުންފަތުގެ ބާވަތެއް ކަމަށް އެ އިސްލާހުގައިވެއެވެ. އެހެން ނަމަވެސް ފަރުވާގެ ގޮތުގައި ބޭނުންކުރާ ނިކޮޓިން ހިމެނޭ ބާވަތްތައް، އިސްތިސްނާ ކުރުމަށް އެ އިސްލާހުގައިވެއެވެ.
ފަޒީލް ހުށަހެޅުއްވި އެ އިސްލާހު ވެސް ފާސްކުރީ ކޮމިޓީގެ އިއްތިފާގުންނެވެ.
ކޮމިޓީގައި އައްޑޫ މީދޫ ދާއިރާގެ މެންބަރު އަބްދުއްރަހްމާންވަނީ ވޭޕް މަނާ ކުރަން ނިންމުމާ ގުޅިގެން އެ ކަމުގެ ވިޔަފާރިތަކާއި، އެ ވިޔަފާރިތަކުގައި މަސައްކަތްކުރާ މުވައްޒަފުންނަށްވާ މާލީ ގެއްލުމަށް ސަރުކާރުން ބަދަލު ނަގައިދޭން އެދިވަޑައިގެންފައެވެ.
ދާންދޫ ދާއިރާގެ ޕީއެންސީ މެންބަރު މުހައްމަދު ފަޒީލް ވެސް ގަބޫލު ކުރައްވާ ގޮތުގައި ކުއްލިއަކަށް ވޭޕް ހުއްޓުވުމާއެކު ރައްޔިތުންގެ ތެރެއިން ކޮންމެވެސް ބަޔަކަށް ގެއްލުންތަކެއް ލިބޭނެއެވެ. އެހެން ނަމަވެސް އޭނާ ހުށަހެޅުއްވީ ބިލް މިހާރު އޮތް ގޮތަށް ފާސްކުރުމަށް ފަހު، ފަހުން އިސްލާހުތައް ހުށަހެޅުމަށެވެ.
ކޮމިޓީގެ އަގުލަބިއްޔަތުން އެ ގޮތަށް ފާސްކުރި ނަމަވެސް، ތިން ބޭފުޅަކު ވަކި ގޮތަކަށް ވޯޓެއް ނުދެއްވައެވެ. އެއީ އައްޑޫ މީދޫ ދާއިރާގެ މެންބަރު އަބްދުއްރަހްމާނާއި، ގަލޮޅު އުތުރު ދާއިރާގެ މެންބަރުގެ މުހައްމަދު އިބްރާހީމްގެ އިތުރުން، މާފަންނު ހުޅަނގު ދާއިރާގެ ޕީއެންސީ މެންބަރު މުސްތަފާ އިބްރާހީމެވެ.