ރާއްޖޭގައި ވޭޕް މަނާކުރުމަށް ނިންމުމުގެ ސަބަބުން އެ ތަކެތީގެ ވިޔަފާރިތަކާއި، އެ ތަންތަނުގައި މަސައްކަތްކުރާ މުވައްޒަފުންނަށްވާ މާލީ ގެއްލުމުގެ ބަދަލު ސަރުކާރުން ދޭން ޖެހޭ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު އަބްދުއްރަހްމާން މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ އިޖުތިމާއީ ކޮމިޓީގައި މިއަދު ވަނީ ދުންފަތް ކޮންޓްރޯލް ކުރުމާބެހޭ ގާނޫނަށް އިސްލާހު ގެނައުމުގެ ބިލް ދިރާސާކޮށްފައެވެ. އެ ގޮތުން އެ ބިލަށް ކޮމިޓީގައި ގެނައި އިސްލާހުތަކާއެކު ބިލު ފާސްކުރުމަށް ކޮމިޓީގެ އަޣުލަބިއްޔަތުން ވަނީ ނިންމައިފައެވެ.
ރައްޔިތުންގެ މަޖިލީހުގެ އިޖުތިމާއީ ކޮމިޓީ ބައްދަލުވުން: އައްޑޫ މީދޫ ދާއިރާގެ މެންބަރު އެދިވަޑައިގަތީ ވޭޕް ހުއްޓުވުމުން އޭގެ ވިޔަފާރިތަކަށްވާ ގެއްލުމުގެ ބަދަލު ސަރުކާރުން ދިނުމަށް -- ފޮޓޯ މަޖިލިސް
މި ބިލަށް ވާހަކަ ދައްކަވަމުން، އަމިއްލަ ގޮތުން އިންތިޚާބުވި އަބްދުއްރަހްމާން ވަނީ ވޭޕް މަނާ ކުރުމަށް ސަރުކާރުން ނިންމިއިރު، އޭގެ ވިޔަފާރި ކުރާ ފަރާތްތަކުން ބޮޑެތި އިންވެސްޓްމަންޓުތައް ކޮށްފައިވާކަން ފާހަގަ ކުރައްވައިފައެވެ. އެ ގޮތުން ހަމަ އެކަނި މާލެއާ ހުޅުމާލޭގައި ވެސް ވޭޕްގެ ވިޔަފާރިކުރާ 16 ވަރަކަށް ތަން ހުރިއިރު، އެ ތަންތަނުގައި 300އެއްހައި މުވައްޒަފުން އުޅޭކަން އޭނާ ފާހަގަ ކުރެއްވިއެވެ.
އަބްދުއްރަހްމާންވަނީ އެ ފަރާތްތަކަށްވާ މާލީ ގެއްލުމަށް ސަރުކާރުން ބަދަލެއް ދިނުމަށް އެދިވަޑައިގެންފައެެވެ.
"އަޅުގަނޑުގެ ހަމަ އޮތް ކޮންސާނަކީ މި ކަމާ ގުޅުންހުރި ފަރާތްތަކަށް ގާނޫނާ ގަވާއިދުގެ ތެރެއިން ވިޔަފާރި ކުރަމުން އައި ބައެއް، ބޮޑެތި އަދަދުތަކުން އިންވެސްޓް ކޮށްގެން. މި ދައްކަނީ ގާތްގަނޑަކަށް 300 ވަރަކަށް އާއިލާގެ ދިރިއުޅުމުގެ ވާހަކަ. އެ ބޭފުޅުންނަށް ވާނެ އެއްޗެއް އަޅުގަނޑު ހަމަ އެދެން ސަރުކާރުގެ ފަރާތުން ވެސް ފަހުން ހަމަ ހައްލެއް ހޯދައިދިނުމަށް،" އަބްދުއްރަހްމާން ވިދާޅުވިއެވެ.
މީގެ އިތުރުން މި ކަމުގައި މަސްލަހަތު އެކުލެވޭ މީހުން އިޖުތިމާއީ ކޮމިޓީއަށް ހާޒިރުކޮށް އެ ފަރާތްތަކާ ބައްދަލު ކުރަން ފެނިވަޑައިގަންނަވާ ކަމަށް އޭނާ ވިދާޅުވިއެވެ.
ރައްޔިތުންގެ މަޖިލީހުގެ އިޖުތިމާއީ ކޮމިޓީ ބައްދަލުވުން: އައްޑޫ މީދޫ ދާއިރާގެ މެންބަރު އެދިވަޑައިގަތީ ވޭޕް ހުއްޓުވުމުން އޭގެ ވިޔަފާރިތަކަށްވާ ގެއްލުމުގެ ބަދަލު ސަރުކާރުން ދިނުމަށް -- ފޮޓޯ މަޖިލިސް
މި ކަމާ ގުޅިގެން ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް ވިދާޅުވީ ދުންފަތާ ގުޅޭ ބިލު ކޮމިޓީން ނިންމަން ހިފާފައިވާއިރު، އެ ކަމުގެ ސްޓޭކްހޯލްޑަރުންނާ މަޝްވަރާ ކުރުމުގެ އިތުރުން، އެހެނިހެން ގޮތްގޮތުން އައިސްފައިހުރި ކޮމެންޓުތައް ވެސް ހުރިތާގައި ހުރީ ކަމަށެވެ.
ވޭޕް ހުއްޓުވުމަކީ ކުރަންޖެހޭ ކަމެއް ނަމަވެސް، ކުއްލިއަކަށް އެ ކަން ކޮށްގެން ކުރިމަތިވެދާނެ "އާފްޓަ ޝޮކަށް" ތައްޔާރުތޯ ކޮމިޓީގައި އޭނާ ސުވާލު ކުރެއްވިއެވެ.
ދާންދޫ ދާއިރާގެ ޕީއެންސީ މެންބަރު މުހައްމަދު ފަޒީލް ވެސް ގަބޫލު ކުރައްވާ ގޮތުގައި ކުއްލިއަކަށް ވޭޕް ހުއްޓުވުމާއެކު ރައްޔިތުންގެ ތެރެއިން ކޮންމެވެސް ބަޔަކަށް ގެއްލުންތަކެއް ލިބޭނެއެވެ. އެހެން ނަމަވެސް އޭނާ ހުށަހެޅުއްވީ ބިލް މިހާރު އޮތް ގޮތަށް ފާސްކުރުމަށް ފަހު، ފަހުން އިސްލާހުތައް ހުށަހެޅުމަށެވެ.
ކޮމިޓީގެ އަގުލަބިއްޔަތުން އެ ގޮތަށް ފާސްކުރި ނަމަވެސް، ތިން ބޭފުޅަކު ވަކި ގޮތަކަށް ވޯޓެއް ނުދެއްވައެވެ. އެއީ އައްޑޫ މީދޫ ދާއިރާގެ މެންބަރު އަބްދުއްރަހްމާނާއި، ގަލޮޅު އުތުރު ދާއިރާގެ މެންބަރުގެ މުހައްމަދު އިބްރާހީމްގެ އިތުރުން، މާފަންނު ހުޅަނގު ދާއިރާގެ ޕީއެންސީ މެންބަރު މުސްތަފާ އިބްރާހީމެވެ.
ސަރުކާރުން ނިންމައިފައިވަނީ، ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން މިމަހުގެ 15އިން ފެށިގެން މަނާކުރުމަށެވެ.
އަދި ވޭޕްކުރުމަށް ބޭނުންކުރާ ތަކެތި ރާއްޖޭގައި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، އިޝްތިހާރު ކުރުމާއި ހިލޭބެހުން އަންނަ މަހުގެ 15ވަނަ ދުވަހުން ފެށިގެން މަނާވާނެއެވެ.