އެމެރިކާގެ މި އަހަރުގެ ރިޔާސީ އިންތިޚާބު ކާމިޔާބުކުރެއްވިކަން ރިޕަބްލިކަން ޕާޓީގެ ކެންޑިޑޭޓް ޑޮނަލްޑް ޓްރަމްޕް އިއުލާނުކުރައްވާފައިވާއިރު، ދުނިޔޭގެ ލޯތައް ވަނީ އެ މަނިކުފާނަށް އަމާޒުވެފައެވެ. ނަމަވެސް، ބައެއް މީހުންގެ ނަޒަރު ވަނީ ސްޓޭޖްމަތިން ފެނުނު ޓްރަމްޕްގެ 18 އަހަރުގެ ދަރިކަލުން ބެރޮންއަށް އަމާޒުވެފައެވެ.
ވައިޓް ހައުސް ދޫކޮށް ދިޔަތާ ހަތަރު އަހަރު ފަހުން ލިބިލެއްވި ހައިރާންކުރަނިވި ކާމިޔާބީއަށް ފަހު ޓްރަޕާއި އެ މަނިކުފާނުގެ އަންހެނުން މެލާނީއާއި އަންހެން ދަރިފުޅު އިވާންކާ އަދި ހަގު ދަރިފުޅު ބެރޮންއާ އެކު ސްޓޭޖްމަތިން ވަނީ ފެނިފައެވެ. ގިނަ ބައެއްގެ ނަޒަރު ބެރޮންއަށް އަމާޒުވީ އޭނާގެ ދިގު އިސްކޮޅުގެ ސަބަބުންނެވެ. ބެރޮންގެ އިސްކޮޅުގައި ހަ ފޫޓު ހަތް އިންޗި ހުރެއެވެ.
ޖެނުއަރީ މަހު ޓްރަމްޕް ވަނީ ދަރިފުޅުގެ އިސްކޮޅާ ގުޅިގެން ވާހަކަފުޅުދައްކާވާފައެވެ. އެގޮތުން، ބެރޮން އިސްކޮޅު ދިގުވުމުގެ ހުރިހާ ވެސް ޝުކުރެއް ހައްގުވަނީ އެ މަނިކުފާނުގެ އަނބިކަނބަލުންގެ މަންމާފުޅަށް ކަމަށް އޭރު ޓްރަމްޕް ވަނީ ވިދާޅުވެފައެވެ.
"އެއީ އޭނާ އެހާ އިސްކޮޅުން ދިގުވީ ގޮތް. ބެރޮން ކެއީ ހަމައެކަނި މައިދައިތަގެ ކާނާ،" ރިޕަބްލިކަން ލޯވާ ކޯކަސަސްއިން ލިބުނު ކާމިޔާބު ފާހަގަކުރުމަށް ބޭއްވި ހަފުލާގައި ވާހަކަފުޅުދައްކަވަމުން ޓްރަމްޕް ވިދާޅުވިއެވެ.
"އަހަރެން ހަމަ ބުނަން ބޭނުންވަނީ، އަމަލިޖާ ތިއީ ޚާއްސަ މީހެއް. ތިޔައީ އަހަންނަށް އެންމެ ޚާއްސަ އެކަކު،" ޓްރަމްޕް ވިދާޅުވިއެވެ.
ޑެއިލީ މެއިލްއިން ރިޕޯޓުކޮށްފައިވާ ގޮތުގައި ބެރޮންއަކީ ޚާއްސަ ކުއްޖެއް ކަމަށް ވެސް ޓްރަމްޕް ވަނީ ވިދާޅުވެފައެވެ.
އެ ހަފުލާގައި ޓްރަމްޕް ވަނީ އޭނާގެ މުޅި އާއިލާއަށް ޝުކުރުއަދާކުރައްވާފައެވެ.
އިއްޔެ ބޭއްވި މި އަހަރުގެ އިންތިޚާބުގައި ކާމިޔާބު ހޯއްދެވިކަން އިއުލާން ކުރައްވަމުން ވެސް ޓްރަމްޕް ވަނީ އެ މަނިކުފާނުގެ އަނބިކަނބަލުންގެ މަންމާފުޅަށް ޝުކުރު އަދާކުރައްވައި، ޓްރަމްގެ އެ ކާމިޔާބީއަށް ފަޚުރުވެރިވާނެ ކަމަށް ވިދާޅުވެފައެވެ.
އެމެރިކާގެ ރިޔާސީ އިންތިޚާބުގެ ވޯޓުލުން ނިމި ވޯޓު ގުނުމުގެ މަސައްކަތް ކުރަމުންދާއިރު، ޓްރަމްޕް ވަނީ އިންތިޚާބު ކާމިޔާބުކުރައްވާފައިވާކަން އިއުލާނުކުރައްވާފައެވެ.
ޓްރަމްޕް އެންމެ ފުރަތަމަ ވެރިކަން ކުރެއްވީ 2017އިން 2021އަށެވެ. އެއަށް ފަހު ބޭއްވި ރިޔާސީ އިންތިޚާބުގައި ނާކާމިޔާބުވުމުން ނަތީޖާ ގަބޫލުކުރައްވަން ޓްރަމްޕް ދެކޮޅު ހެއްދެވިއެވެ.