ޔުއޭފާ ޗެމްޕިއަންސް ލީގުގެ ލީގު ފޭސްގައި ފްރެންޗް ލީގު އާންގެ އޭއެސް މޮނާކޯއިން އިޓާލިއަން ސެރީއާގެ ބޮލޯނިއާ ބަލިކޮށް، ތާވަލުގެ ތިންވަނައަށް ކުރިއަށް ޖެހިލައިފިއެވެ.
ބޮލޯނިއާގެ ދަނޑުގައި ކުޅުނު މި މެޗު މޮނާކޯއިން ކާމިޔާބުކޮށްފައިވަނީ 1-0 އިންނެވެ.
މެޗުގައި ލަނޑެއް ނުފެނި މެޗު ނިމެން ދަނިކޮށް މޮނާކޯ މޮޅުކޮށްދިން ލަނޑު މެޗު ނިމެން ހަތަރު މިނެޓަށް ވެފައިވަނިކޮށް ކާމިޔާބުކޮށްދިނީ ތީލޯ ކޭރާއެވެ.
މި ކާމިޔާބީއާ އެކު މޮނާކޯ މިހާރުވަނީ މިހާތަނަށް ކުޅުނު ހަތަރު މެޗުން ލިބިފައިވާ 10 ޕޮއިންޓާ އެކު ތާވަލުގެ ތިންވަނައަށް ކުރިއަށް ޖެހިލާފައެވެ. ބޮލޯނިއާ އޮތީ އެއް ޕޮއިންޓާ އެކު ތާވަލުގެ 30 ވަނައިގައެވެ.
މި މުބާރާތުގައި ޖަރުމަނު ބުންޑެސްލީގާގެ ބޮރޫޝިއާ ޑޯޓްމުންޑާއި އޮސްޓްރިއަން ބުންޑެސްލީގާގެ ސްޓާމް ގްރާޒް ބައްދަލުކުރި މެޗު އަމިއްލަ ދަނޑުގައި 1-0 އިން ކާމިޔާބުކޮށްފައިވަނީ ޑޯޓްމުންޑެވެ.
މެޗުގައި ޑޯޓްމުންޑުން ކާމިޔާބުކުރި ހަމައެކަނި ލަނޑު މެޗު ނިމެން ފަސް މިނެޓަށް ވެފައިވަނިކޮށް ކާމިޔާބުކޮށްދިނީ ޑޮންޔެލް މާލެންއެވެ. މި ކާމިޔާބީއާ އެކު ޑޯޓްމުންޑް އޮތީ ނުވަ ޕޮއިންޓާ އެކު ތާވަލުގެ ހަތަރު ވަނައިގައެވެ. ސްޓާމް ގްރާޒް އޮތީ ޕޮއިންޓެއް ނުލިބި ތާވަލުގެ 32 ވަނައިގައެވެ.
މީގެ އިތުރުން، ސްކޮޓިޝް ޕްރިމިއާ ލީގުގެ ސެލްޓިކާއި ޖަރުމަނު ބުންޑެސްލީގާގެ އާރްބީ ލެއިޕްޒިގް ބައްދަލުކުރި މެޗު ފަހަތުން އަރާ 3-1 އިން ކާމިޔާބުކޮށްފައިވަނީ ސެލްޓިކެވެ. ސެލްޓިކްގެ ދަނޑުގައި ކުޅުނު މި މެޗުގެ ފުރަތަމަ ލަނޑު ޖަހާ މެޗުގެ ލީޑު ނަގާފައިވަނީ ކްރިސްޓޯފް ބައުމްގާޓްނާ ޖަހައިދިން ލަނޑުން ލެއިޕްޒިގެވެ. ސެލްޓިކްގެ ފުރަތަމަ ދެ ލަނޑު ޖަހައިދިނީ ނިކޮލަސް ގެރިޓު ކޫންއެވެ. އަދި، ފަހު ލަނޑު ޖަހައިދިނީ ރިއޯ ހަޓާޓޭއެވެ.
މި ކާމިޔާބީއާ އެކު ސެލްޓިކް މިހާރު އޮތީ ހަތަރު މެޗުން ލިބިފައިވާ ހަތް ޕޮއިންޓާ އެކު ތާވަލުގެ 13 ވަނައަށް ކުރިއަށް ޖެހިލާފައެވެ. ލެއިޕްޒިގް އޮތީ މި ސީޒަންގައި ޕޮއިންޓެއް ނުލިބި 31 ވަނައިގައެވެ.