ޔުއޭފާ ޗެމްޕިއަންސް ލީގުގެ ލީގު ފޭސްގައި އިޓާލިއަން ސެރީއާގެ އިންޓާ މިލާނުން އިނގިރޭސި ޕްރިމިއާ ލީގުގެ އާސެނަލް ބަލިކޮށްފިއެވެ.
އިންޓާގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 1-0 އިންނެވެ.
މެޗުގެ ފެށުން ރަނގަޅުވީ އިންޓާގެއެވެ. ނަމަވެސް، މާ ގިނައިރުތަކެއްނުވެ، އާސެނަލުން ވަނީ އެ ޓީމުގެ ކުޅުން ރަނގަޅުކޮށް އިންޓާއަށް ވެސް ނުރައްކާކުރަން ފަށާފައެވެ. މެޗުގެ ހަމައެކަނި ލަނޑު ފެނިގެންދިޔައީ ފުރަތަމަ ހާފު ނިމިނިމި އޮއްވައި އިތުރު ވަގުތުގެ ތިންވަނަ މިނެޓްގައި އިންޓާއަށް ލިބިގެންދިޔަ ޕެނަލްޓީއަކުންނެވެ.
އާސެނަލްގެ މެދުތެރެއަށް ކުޅޭ މިކޭލް މޮރޭނޯގެ އަތުގައި ބޯޅަ ޖެހުމުގެ ސަބަބުން ދިން މި ޕެނަލްޓީއާ މެދު އާސެނަލުން ޝާކުވާކުރި ނަމަވެސް ވީއޭއާރުން ބެލުމަށް ފަހު ވެސް ވަނީ އެއީ ޕެނަލްޓީއެއް ކަމަށް ނިންމާފައެވެ. މި ޕެނަލްޓީ ކާމިޔާބުކޮށްދީ، އިންޓާއަށް ލީޑު ނަގައިދިނީ ހަކާން ޗަލަނޮގްލޫއެވެ.
މިއީ މި ފަހަރުގެ މުބާރާތުގައި އާސެނަލް ކޮޅަށް ވަން ފުރަތަމަ ލަނޑެވެ. މި ލަނޑާ އެކު ފުރަތަމަ ހާފު ނިމިގެންދިޔައީ އިންޓާ ކުރީގައި އޮވެގެންނެވެ.
މި ކާމިޔާބީއާ އެކު އިންޓާއިން މިހާރު ވަނީ ހަތަރު މެޗުން ލިބިފައިވާ 10 ޕޮއިންޓާ އެކު ތާވަލުގެ ފަސްވަނައަށް ކުރިއަށް ޖެހިލާފައެވެ. އާސެނަލް އޮތީ ހަތް ޕޮއިންޓާ އެކު ތާވަލުގެ 12 ވަނައިގައެވެ.
މިއީ މި ފަހަރުގެ މުބާރާތުގައި އާސެނަލް ބަލިވި ފުރަތަމަ މެޗެވެ.
މީގެ އިތުރުން، މުބާރާތުގައި އިނގިރޭސި ޕްރިމިއާ ލީގުގެ އެސްޓަން ވިލާއިން ވެސް ވަނީ ބެލްޖިއަން ޕްރޯ ލީގުގެ ކްލަބް ބްރޫޖް އަތުން 1-0 އިން ބަލިވެފައެވެ.
މިއީ ވަރަށް ކާމިޔާބުކޮށް މުބާރާތް ފަށާފައިވާ ވިލާ ވެސް ބަލިވި ފުރަތަމަ މެޗެވެ. މެޗުގައި ބްރޫޖުން ކާމިޔާބުކުރި ހަމައެކަނި ލަނޑު މެޗުގެ 52 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށްފައިވަނީ ކެޕްޓަން ހާންސް ވެނަކެންއެވެ. މެޗުގައި ވިލާއިން ގިނައިރު ބޯޅަ ގެންގުޅުނު ނަމަވެސް ގިނަ ހަމަލާ އުފައްދާފައިވަނީ ބްރޫޖުންނެވެ.
މި ކާމިޔާބީއާ އެކު ބްރޫޖް މިހާރު އޮތީ ހަ ޕޮއިންޓާ އެކު ތާވަލުގެ 22 ވަނައިގައެވެ. މެޗު ނާކާމިޔާބުވުމުން ވިލާއަށް ތާވަލުގެ އެއްވަނައިގައި އޮތް ލިވަޕޫލާ ޕޮއިންޓްގެ ގޮތުން އަރާ ހަމަކުރުމަށް ލިބިގެންދިޔަ ފުރުސަތު ވަނީ ގެއްލިގެން ގޮސްފައެެވެ. އެ ޓީމު މިހާރު އޮތީ ނުވަ ޕޮއިންޓާ އެކު ތާވަލުގެ އަށްވަނައިގައެވެ.