އެމެރިކާގެ ވާދަވެރި ރިޔާސީ އިންތިޚާބުގައި މިއަދު ވޯޓުލުން ފަށައިފިއެވެ.
އެމެރިކާގެ ވެރިކަން ކުރާ ޑިމޮކްރެޓިކް ޕާޓީގެ ފަރާތުން ނައިބު ރައީސް ކަމަލާ ހެރިސް އަދި އިދިކޮޅު ރިޕަބްލިކަން ޕާޓީން ޑޮނަލްޑް ޓްރަމްޕް ވާދަކުރައްވާ އިންތިޚާބުގައި ވޯޓުލުމުގެ ހައްގު ލިބިގެންވާ މީހުންގެ އަދަދު 239 މިލިއަނަށް އަރައެވެ.
އެމެރިކާގެ ރަސްމީކޮށް ވޯޓުލާ ދުވަހުގެ ކުރިން ވެސް، މެއިލް މެދުވެރިކޮށް ނުވަތަ ވޯޓުލާ މަރުކަޒަކަށް ގޮސް ވޯޓުލުމުގެ ފުރުސަތު އެކި ސްޓޭޓުތަކުގައިވެއެވެ. އެގޮތުން މިދިޔަ ސެޕްޓްމެބަރު މަހުން ފެށިގެން 70 މިލިއަނަށް ވުރެ ގިނަ މީހުން ވޯޓުލައިފައިވެއެވެ.
އެމެރިކާގެ އެކި ސްޓޭޓުތަކުގައި ޓައިން ޒޯން ތަފާތުވުމުން، އެކި ސްޓޭޓުތަކުގައި ވޯޓުލާން ފަށާ ގަޑި ތަފާތެވެ. މިއަދު ރާއްޖެ ގަޑިން 15:00ގައި ބައެއް ސްޓޭޓުތަކުގައި ވޯޓުލާން ފަށައިފައިވާއިރު، އެންމެ ފަހުން ވޯޓު ފޮށިތައް ބަންދުކުރާނެ ކަމަށް ބެލެވެނީ އަލަސްކާގައެވެ.
އެމެރިކާގެ ރިޔާސީ އިންތިޚާބުގައި އެންމެ ގިނައިން ވޯޓު ލިބޭ ކެންޑިޑޭޓަކު ރައީސް ކަމަށް އިންތިޚާބު ނުވެދާނެއެވެ. އެ އިންތިޚާބުގައި ވޯޓުލުން ކުރިއަށްދާ ގޮތަކީ:
- ކޮންމެ ސްޓޭޓެއްގައި ވެސް، ގާނޫނު ހަދާ މަޖިލީހުގައި އެ ސްޓޭޓެއް ތަމްސީލު ކުރާ މެންބަރުންގެ އަދަދަށް ކެންޑިޑޭޓުންގެ ފަރާތުން 'އިލެކްޓާސް'ގެ ނަމުގައި އޮފިޝަލުން ހޮވުން
- އިލެކްޓާސްގެ ތެރޭގައި ހިމެނޭނީ ޕާޓީން ހުށަހަޅާ ނަންތަކެއް. އޭގެ ތެރޭގައި ޕާޓީގެ އޮފިޝަލުންނާއި އެކްޓިވިސްޓުން ހިމެނިދާނެ.
- އެ ސްޓޭޓަކުން ވޯޓުލާ މީހުންގެ ތެރެއިން އަޣުލަބިއްޔަތު ލިބޭ ކެންޑިޑޭޓަކު ނިސްބަތްވާ ޕާޓީގެ އިލެކްޓާސް ފަހުގެ ތާރީޚެއްގައި ބައްދަލުކުރާނެ. މިފަހަރު އިލެކްޓާސްގެ ބައްދަލުވުން އޮންނާނީ ޑިސެމްބަރު 17ގައި.
- ހުރިހާ އިލެކްޓާސް ހިމެނޭ އިލެކްޓޯރަލް ކޮލެޖުގެ ނަތީޖާ ގުނާނީ ޖެނުއަރީ ހަ ވަނަ ދުވަހު ކޮންގްރެސްއިން ބާއްވާ ސެޝަންއެއްގައި
- ރައީސް ކަމަށް އިންތިޚާބުވާނީ، ޖުމްލަ 538 އިލެކްޓާސްގެ ތެރެއިން 270އަށް ވުރެ ގިނަ އިލެކްޓާސްގެ ވޯޓު ލިބޭ ކެންޑިޑޭޓަކު
ބޭރުގެ މީޑިއާތަކުގައިވާ ގޮތުން، އެންމެ ފަހު ޚިޔާލު ހޯދުމުގެ ވޯޓުތަކުން ދައްކަނީ ޓްރަމްޕާއި ހެރިސްއަށް އޮތް ތާއިދުވެސް ވަރަށް އެއްވަރު ކަމަށެވެ.
ޓްރަމްޕް އެންމެ ފުރަތަމަ ވެރިކަން ކުރެއްވީ 2017އިން 2021އަށެވެ. އެއަށްފަހު ބޭއްވި ރިޔާސީ އިންތިޚާބުގައި ނާކާމިޔާބުވުމުން ނަތީޖާ ގަބޫލުކުރައްވަން ޓްރަމްޕް ދެކޮޅު ހެއްދެވިއެވެ.
އެ އިންތިޚާބު ކާމިޔާބު ކުރެއްވި ރައީސް ޖޯ ބައިޑެންއަކީ ޑިމޮކްރެޓިކް ޕާޓީގެ މިއަހަރުގެ ފުރަތަމަ ކެންޑިޑޭޓެވެ. ނަމަވެސް ބައިޑެންގެ ސިއްހީ ހާލަތާ ގުޅޭ ގޮތުން ކަންބޮޑުވުންތައް އިތުރުވެ، ތާއިދު ކުޑަވާން ފެށުމުން މިދިޔަ ޖުލައި މަހު ރިޔާސީ ރޭހުން ވަކިވެވަޑައިގަތެވެ. އެއަށްފަހު އެ ޕާޓީން ރިޔާސީ ކެންޑިޑޭޓަކަށް ހެރިސް ހޮވިއެވެ.