އެމެރިކާގެ ރިޔާސީ އިންތިޚާބުގެ ވޯޓުލުން ރަސްމީކޮށް ފަށަން ތައްޔާރުވެފައިވާއިރު، އިންތިޚާބުގެ ވާދަވެރިކަން ކުރީ އަހަރުތަކާ އަޅާބަލާއިރު ވަރަށް ބޮޑެވެ. އިންތިޚާބުގައި ވާދަކުރާ މައިގަނޑު ދެ ޕާޓީ ކަމަށްވާ، ވެރިކަން ކުރާ ޑިމްކޮރެޓިން ޕާޓީއާ އިދިކޮޅު ރިޕަބްލިކަން ޕާޓީގެ ކެންޑިޑޭޓުންވެސް އެންމެ ބޮޑަށް ކެމްޕޭނުކުރެއްވީ ސްވިންގް ސްޓޭޓެއް ކަމަށްވާ ޕެންސިލްވޭނިއާގައެވެ.
ޑިމޮކްރެޓިކް ޕާޓީގެ ކެންޑިޑޭޓް، މިހާރުގެ ނައިބު ރައީސް ކަމަލަ ހެރިސް އަދި ރިޕަބްލިކަން ޕާޓީގެ ކެންޑިޑޭޓް، ކުރީގެ ރައީސް ޑޮނަލްޑް ޓްރަމްޕް ވެސް ޕެންސިލްވޭނިއާގައި ކެމްޕޭން ކުރައްވަމުން ދިޔައިރު، ކާމިޔާބުވާނެ ކަމަށް ވަރަށް ޔަގީންކަމާ އެކު ވަނީ ވިދާޅުވެފައެވެ.
މާޗް މަހުން ފެށިގެން ކެމްޕޭން އިޝްތިހާރުތަކަށް 2.6 ބިލިއަން ޑޮލަރަށް ވުރެ ގިނަ ފައިސާ ޚަރަދުކޮށްފައިވާ ކަމަށް އެނަލިޓިކްސް ކުންފުންޏެއް ކަމަށްވާ އެޑްއިމްޕެކްޓްއިން ބުނެއެވެ. ކެމްޕޭނަށް މިހާ ބޮޑު ޚަރަދެއްކޮށްފައިވާއިރު ވެސް، ޚިޔާލު ހޯދުމުގެ ވޯޓުތަކުން ދައްކާ ގޮތުގައި ދެ ކެންޑިޑޭޓުގެ ވާދަވެރިކަން އަދިވެސް އޮތީ އާދަޔާ ޚިލާފަށް ވަރުގަދަކޮށެވެ. އުމުރުފުޅުން 78 އަހަރުގެ ޓްރަމްޕާއި 60 އަހަރުގެ ހެރިސްއަށް ތާއީދުކުރާ މިންވަރު ދާދި އެއްވަރެވެ.
ކެމްޕޭނު ކުރުމަށް އޮތް އެންމެ ފަހު ދުވަހު ދެ ކެންޑިޑޭޓުން ވެސް އެންމެ ބޮޑަށް ފޯކަސް ކުރައްވާފައިވަނީ ޕެންސިލްވޭނިއާއަށެވެ. މިހާރު ވޯޓުނުދީ ތިބި އާންމުންނަށް ވޯޓު ދިނުމަށް އިލްތިމާސްކުރެއްވިއެވެ. އިންތިޚާބުގައި އެންމެ މުހިންމު ހަތް ސްވިންގް ސްޓޭޓްގެ ތެރެއިން އެންމެ ގިނަ އަދަދަކަށް އިލެކްޓޯރަލް ކޮލެޖުގެ ވޯޓު ލިބިފައިވަނީ ޕެންސިލްވޭނިއާކަމުން ވޯޓު ހޯދުމަށް ކުރާ އެންމެ ފަހުގެ މަސައްކަތުގައި އެ ސްޓޭޓަކީ މުހިންމު ފޯކަލް ޕޮއިންޓެކެވެ.
އެމެރިކާގައި ވޯޓުލުމުގެ ނިޒާމު އޮންނަ ގޮތުން ރައްޔިތުން ވޯޓު ލަނީ ސީދާ ކެންޑިޑޭޓަކަށް ނޫނެވެ. އިންތިޚާބުގައި މި ހޮވަނީ 538 މެންބަރުންގެ މައްޗަށް އެކުލެވޭ އިލެކްޓޮރަލް ކޮލެޖެވެ. ރައީސާއި ނައިބު ރައީސް އިންތިޚާބުކުރަނީ މި އިލެކްޓޮރަލް ކޮލެޖުންނެވެ.
ކޮންމެ ސްޓޭޓަކުން ވެސް އިލެކްޓޯރަލް ކޮލެޖުގެ ވޯޓު ދެނީ އެ ސްޓޭޓެއްގެ ޕޮޕިއުލާ ވޯޓް ނުވަތަ އަޣުލަބިއްޔަތު ހޯދި ކެންޑިޑޭޓަށެވެ. އެމެރިކާގެ ކޮންގްރެސްގައި ގިނަ މަންދޫބުން ހިމެނޭ ބޮޑެތި ސްޓޭޓްތަކަށް އިލެކްޓޯރަލް ކޮލެޖުގެ 538 ވޯޓުގެ ބޮޑު ބައެއް ލިބެއެވެ.
ޕެންސިލްވޭނިއާ މުހިންމު ވަނީ ކީއްވެ؟
ވިސްކޮންސިން، މިޝިގަން، އަދި ޕެންސިލްވޭނިއާއަކީ ރިޔާސީ އިންތިޚާބު ކާމިޔާބުކުރުމަށް ޑިމޮކްރެޓުންނަށް މުހިންމު ސްޓޭޓްތަކެކެވެ. އެ ސްޓޭޓްތަކުގެ މުހިންމުކަމުން ސްޓޭޓްތަކަށް ވަނީ "ބްލޫ ވޯލް" ގެ ނަންދީފައެވެ.
އޭގެ ތެރެއިން ޕެންސިލްވޭނިއާއަކީ ވަކިން ޚާއްސަ ސްޓޭޓެކެވެ. އެ ސްޓޭޓަށް އިލެކްޓްރޯލަ ކޮލެޖްގެ 19 ވޯޓު ލިބެއެވެ. އެއީ އެންމެ ގިނަ އިލެކްޓޯރަލް ވޯޓު ލިބޭ ސްޓޭޓެވެ. އެންމެ ފަހުން 2020 ވަނަ އަހަރު ބޭއްވި ރިޔާސީ އިންތިޚާބުގައި އެމެރިކާގެ ރައީސް ޖޯ ބައިޑަން އިންތިޚާބު ކާމިޔާބުކުރުމުގައި ޕެންސިލްވޭނިއާ މުހިންމު ރޯލެއް އަދާކުރިއެވެ.
އެމެރިކާގެ މި އަހަރުގެ ރިޔާސީ އިންތިޚާބަކީ އެ ގައުމުގެ 47 ވަނަ ރައީސް އިންތިޚާބުކުރަން ބާއްވާ އިންތިޚާބެވެ.
ފަހުގެ ތާރީޚެއްގައި އެމެރިކާގައި ބާއްވާ އެންމެ ވާދަވެރި އިންތިޚާބަށްވާއިރު، އިންތިޚާބު ނިމި އެތައް ދުވަހެއް ވަންދެން ނަތީޖާ ކަށަވަރުނުވެ، އޮވެދާނެކަމުގެ އިންޒާރު ވެސް ވަނީ ދީފައެވެ. އިންތިޚާބުގެ ނަތީޖާ ނިމި، އާ ރައީސް ހުވާކުރައްވަން ހަމަޖެހިފައިވަނީ އަންނަ ޖެނުއަރީ މަހުގެ 20 ވަނަ ދުވަހުއެވެ.