އެމެރިކާގެ ބިލިއަނަރު އީލޮން މަސްކްގެ ޕޮލިޓިކަލް އެކްޝަން ކޮމިޓީ (ޕީއޭސީ)އިން ވޯޓު ލާ މީހުންނަށް އެއް މިލިއަން ޑޮލަރު ދިނުމަށް ކުރިއަށްގެންދާ ގިވްއަވޭއަށް ގާނޫނީ އެއްވެސް ހުރަހެއްނެތް ކަމަށް، އެކަމާ ގުޅުންހުރި މައްސަލައެއް ބެލި ކޯޓުން ނިންމައިފިއެވެ.
އެމެރިކާގެ ރިޔާސީ އިންތިޚާބުގެ ވޯޓުލާ މީހުންގެ ތެރެއިން ކޮންމެ ދުވަހަކު ވެސް ކޮންމެވެސް އެކަކަށް އެއް މިލިއަން ޑޮލަރު ދިނުމުގެ މި ޕްރޮގްރާމް ކުރިއަށް ގެންދިއުމަކީ ވޯޓަށް ނުފޫޒު ފޯރުވުމުގެ އަމަލެއް ކަމުގައި ބައެއް ފަރާތްތަކުންވަނީ ތުހުމަތުކޮށްފައެވެ.
މަސްކްގެ ޕީއޭސީގެ ވަކީލު ކްރިސް ގޯބަރު ވިދާޅުވި ގޮތުގައި މި ޕްރޮގްރާމް ނިންމާނީ މިއަދެވެ. އަދި ފައިސާ ލިބޭ ފަރާތްތައް ހޮވަނީ ގުރުއަތުލައިގެން ނޫންކަން އޭނާ ހާމަކުރެއްވިއެވެ.
ފިލަޑެލްފިއާގެ ޑިސްޓްރިކްޓް އެޓާނީ ލޯރެންސް ކްރަސްނާ ވަނީ މިއީ ގާނޫނާ ޚިލާފު ކަމެއް ކަމަށް ވިދާޅުވެ ޕެންސިލްވޭނިއާގެ ކޯޓަކަށް މައްސަލައެއް ހުށަހަޅައިފައެވެ.
މި ޕްރޮގްރާމްގެ ދަށުން އެންމެ ފަހުން ފައިސާ ލިބޭނެ ފަރާތަކީ މިޝިގަން ސްޓޭޓްގެ ވޯޓަރެއްކަން ހާމަކޮށްފައިވެއެވެ. މީގެ ކުރިން، އެރިޒޯނާގެ ޖޮޝުއާ ނަމަކަށް ކިޔާ މީހަކަށް ވަނީ އެއް މިލިއަން ޑޮލަރު ލިބިފައެވެ.
ފައިސާ ލިބޭ ފަރާތްތަކުން ސިއްރު ހިފެހެއްޓުމުގެ އެއްބަސްވުމެއްގައި ސޮއިކުރަންޖެހެއެވެ. އަދި އެމެރިކާ ޕީއޭސީގެ ޑިރެކްޓަރު ކްރިސް ޔަންގް ވިދާޅުވި ގޮތުގައި ފައިސާ ލިބޭ ފަރާތްތަކަކީ އެ ގްރޫޕްގެ ސިޔާސަތާ އެއްގޮތް ވިސްނުން ހުރި ބައެއް ކަމުގައި ވާންޖެހެއެވެ.
މި ޕްރޮގްރާމާ ގުޅިގެން އެމެރިކާގެ ޖަސްޓިސް ޑިޕާޓްމަންޓުން ވަނީ އިންތިޚާބުގެ ޤާނޫނުތަކާ ޚިލާފު ވެދާނެކަމުގެ އިންޒާރު ދީފައެވެ. ސަބަބަކީ ވޯޓުލުމަށް ރަޖިސްޓްރީ ވުމަށް ފައިސާ ދިނުމަކީ މަނާ ކަމަކަށް ވާތީއެވެ.
ރިޕަބްލިކަން ކެންޑިޑޭޓް ޑޮނަލްޑް ޓްރަމްޕްގެ ކެމްޕޭނަށް މަސްކް ވަރަށް ބޮޑަށް އެހީތެރިވަމުންދާކަން ފާހަގަކުރެވެއެވެ. ޚާއްޞަކޮށް ޕެންސިލްވޭނިއާގައި ޓްރަމްޕް އާއި ޑިމޮކްރެޓިކް ވާދަވެރިޔާ ކަމަލާ ހެރިސް އާ ދެމެދު ވާދަވެރިކަން ވަރަށް ބޮޑުކަން ފާހަގަކުރެވެއެވެ.
މަސްކްއަކީ ޓެސްލާ އަދި ސްޕޭސްއެކްސްގެ ސީއީއޯގެ އިތުރުން ސޯޝަލް މީޑިއާ ޕްލެޓްފޯމް އެކްސް (ކުރީގެ ޓްވިޓާ)ގެ ވެރިފަރާތެވެ. ދުނިޔޭގެ އެންމެ މުއްސަނދި މީހާގެ ގޮތުގައި ފާހަގަކުރެވޭ މަސްކް ފަހަކަށް އައިސް ވަނީ އެމެރިކާގެ ސިޔާސީ މައިދާނުގައި އިތުރަށް ހަރަކާތްތެރިވާން ފަށާފައެވެ.