މި އަހަރުގެ ތިންވަނަ ކުއާޓަރުގައި ދިރާގަށް 241 މިލިއަން ރުފިޔާގެ ސާފު ފައިދާ ޖެހިއްޖެއެވެ.
ދިރާގުންވަނީ އެ ކުންފުނީގެ މި އަހަރުގެ ތިންވަނަ ކުއާޓަރުގެ ރިޕޯޓު މިދިޔަ ބުރާސްފަތި ދުވަހު އާންމުކޮށްފައެވެ.
އެ ރިޕޯޓުގައިވާ ގޮތުން މި އަހަރުގެ ތިންވަނަ ކުއާޓަރުގައި ދިރާގަށް އާމްދަނީގެ ގޮތުގައި ލިބިފައިވަނީ ޖުމްލަ 691 މިލިއަން ރުފިޔާއެވެ. މިދިޔަ ކުއާޓަރުގައި 687 މިލިއަން ރުފިޔާގެ އާމްދަނީއެއް އެ ކުންފުނިން ހޯދިއިރު، މިއީ 3.9 މިލިއަން ރުފިޔާގެ ކުރިއެރުމެކެވެ.
ތިންވަނަ ކުއާޓަރުގައި ލިބުނު އާމްދަނީގެ ތެރޭގައި ހިމެނެނީ މޮބައިލް ރެވެނިއުގެ ގޮތުގައި ލިބުނު 363 މިލިއަން ރުފިޔާއާއި، ފިކްސްޑް ބްރޯޑްބޭންޑް އެންޑް އެންޓަޕްރައިޒްގެ ގޮތުގައި ލިބުނު 306 މިލިއަން ރުފިޔާގެ އިތުރުން، އެހެނިހެން ގޮތްގޮތުން ލިބިފައިވާ 21 މިލިއަން ރުފިޔާއެވެ.
ދިރާގުން ތިންވަނަ ކުއާޓަރުގައި ކޮށްފައިވާ ހިންގުމުގެ ޚަރަދަކީ ޖުމްލަ 294 މިލިއަން ރުފިޔާއެވެ. މީގެ ތެރޭގައި ހިމެނެނީ ޑައިރެކްޓް ކޮސްޓުގެ ގޮތުގައި ޚަރަދުކޮށްފައިވާ 110 މިލިއަން ރުފިޔާއާއި، އެހެނިހެން ހިންގުމުގެ ޚަރަދުގެ ގޮތުގައި ހޭދަކުރި 185 މިލިއަން ރުފިޔާއާއި ޑިޕްރިސިއޭޝަން އެންޑް އަމޯޓައިޒޭޝަންގެ ގޮތުގައި ޚަރަދުކުރި 101 މިލިއަން ރުފިޔާއެވެ. މީގެ އިތުރުން އެހެނިހެން ފައިދާގެ ގޮތުގައި ތިން ލައްކަ ރުފިޔާ ދިރާގަށް ލިބިފައިވެއެވެ.
މި ހުރިހާ ޚަރަދަކާއެކު ޓެކްސްއަށް ކެނޑުމަށް ފަހު، ސާފު ފައިދާގެ ގޮތުގައި ދިރާގަށް ލިބިފައިވަނީ 241 މިލިއަން ރުފިޔާއެވެ.
މި އަހަރުގެ ތިންވަނަ ކުއާޓަރުގައި ދިރާގުން ވިއްކާ ހިއްސާއެއްގެ އަގު 3.17ގައި ހުރިއިރު، މިދިޔަ ކުއާޓަރުގައި އެ އަދަދު ހުރީ 3.16ގައެވެ.