ނޮވެމްބަރު 3، 1988ގައި ޝަހީދުވި ބޭފުޅުންގެ އާއިލާތަކަށް އެލަވަންސެއްދީ، 50 ޔުނިޓްގެ ހައުސިން އިމާރާތެއް އެ އާއިލާތަކަށް ދޭނެ ކަމަށް ރައީސް ޑރ. މުޙައްމަދު މުއިއްޒު މިރޭ އިއުލާންކުރައްވައިފިއެވެ.
ނަސްރުގެ ދުވަހުގެ ރަސްމީ ޖަލްސާގައި ރައީސް ވިދާޅުވީ، ނޮވެމްބަރު ތިނެއްގެ އުދުވާނީ ހަމަލާ ދިން ދުވަހު އަށް ސިފައިންނާއި 11 އާންމު ރައްޔިތުން ޝަހީދުވި ކަމަށެވެ. އަދި 1979އިން އެކި ފަހަރު މަތިން ޝަހީދުވި މީހުންގެ އަދަދު ވެސް އެ މަނިކުފާނު ހޯއްދެވި ކަމަށާއި އެގޮތަށް ބަލައިއިރު ގާތްގަނޑަކަށް 40 އަހަރު ތެރޭގައި އެކި ހާދިސާތަކުގައި 29 ސިފައިންނާއި ދެ ފުލުހުން ޝަހީދުވެފައިވާ ކަމަށް ރައީސް ވިދާޅުވިއެވެ.
އެ މަނިކުފާނު ވިދާޅުވީ ސަރުކާރުތަކުން މި ފަހުން އެ ފަރާތްތަކުގެ އަގު ވަޒަން ކޮށްފައި ނުވާ ކަމަށެވެ.
"ކުރީގައި ޝަހީދުވި އާއިލާތަކަށް ކޮންމެވެސް ވަރެއްގެ ފައިސާގެ އެހީއެއް ދިން. އެހެން ނަމަވެސް ފަހަކަށް އައިސް އެކަންވެސް ވަނީ ހުއްޓިފައި. އަޅުގަނޑު ގަބޫލުކުރާ ގޮތުގައި އެއީ ވަރަށް ބޮޑު ބޭއިންސާފެއް،" ރައީސް ވިދާޅުވިއެވެ.
އެހެންވެ، މިއަންނަ އަހަރުން ފެށިގެން ޝަހީދުވި ބޭފުޅުންގެ އާއިލާތަކަށާއި ނޮވެމްބަރު ތިނެއްގައި މެޑަލް ފޯ އެކްސެޕްޝަނަލް ބްރޭވަރީ ލިބުނު ފަސް ފަރާތަށާއި މެޑަލް ފޯ ބްރޭވަރީ ލިބިފައިވާ 10 ފަރާތަށް، ގެޒެޓް ކުރާ އުސޫލެއްގެ ދަށުން ދެމެހެއްޓެނިވި ގޮތެއްގައި އެލަވަންސެއް ދޭނެ ކަމަށް އެ މަނިކުފާނު ވިދާޅުވިއެވެ.
"ހަމައެއާއެކީގައި ޝަހީދުވި އާއިލާތަކަށް ޚައްސަކޮށް ޝަހީދުވި ފަރާތްތަކަށް ޚާއްސަ ކުރެވިގެން ހައުސިން ޕްރޮގްރާމެއް، ޝަހީދުންގެ ހިޔާގެ ނަމުގައި 50 ހައުސިން ޔުނިޓް ހިމެނޭ ހައުސިން އިމާރާތެއް ކުރިއަށް އޮތް އަހަރުތަކުގައި، މި ދައުރުގެ ތެރޭގައި އަޅައި ނިންމައި މި އާއިލާތަކާ ހަވާލުކުރާނަން،" ރައީސް އިއުލާން ކުރެއްވިއެވެ.