ދ. ބަނޑިދޫގައި 'އާއިލީ ޕާކު"ގެ ނަމުގައި ރޭ ޕާކެއް ހުޅުވައިފިއެވެ.
އެކަމަށް ޚާއްސަކޮށް ރޭ ބޭއްވި ރަސްމިއްޔާތުގައި މި ޕާކު ހުޅުވައިދެއްވީ ރައްޔިތުންގެ މަޖިލީހުގެ ދ. މީދޫ ދާއިރާގެ މެންބަރު އަޙުމަދު ސިޔާމް މުޙައްމަދާއި ބަނޑިދޫ ކައުންސިލްގެ ރައީސް މުޙައްމަދު މޫސާއެވެ.
އެ ޕާކުގައި ކުޑަކުދިންނަށް ކުޅެވޭހެން ކުޅިވަރު ކުޅޭނެ ތަންތަނާއި ޖިމް ސެޓުތައް ގާއިމުކޮށްފައިވެއެވެ. މި ޕާކުގެ މަސައްކަތް ފަށައި، ނިންމަން ފަސް މަސް ހޭދަވިއެވެ.
މީގެއިތުރުން، ޕާކުގެ މަސައްކަތާއި ސެޓުތައް ގާއިމުކުރަން މުޅި ޖުމުލަ އެއް މިލިއަނަށް ވުރެ ގިނަ ރުފިޔާ ޚަރަދުވިއިރު އޭގެތެރެއިން، 56،000 ރުފިޔާއަކީ އެކި ފަރާތްތަކުގެ އެހީއެެވެ. ބާކީ ފައިސާ ޚަރަދުކުރީ ކައުންސިލުންނެވެ.
ބަނޑިދޫ އާއިލީ ޕާކުގެ މަސައްކަތް ކޮންޓްރެކްޓު އުސޫލުން ކޮށްފައި ވަނީ ސޯސަން ބިލްޑާސް އިންނެވެ.
ބަނޑިދޫގައި 'އާއިލީ ޕާކު' މެންބަރު ސިޔާމް (ކ)ހުޅުވައިދެއްވަނީ ---- ސަން ފޮޓޯ/ ނާއިޝް ނާހިދު
މި ރަސްމިއްޔާތުގައި ވާހަކަދައްކަވަމުން، ކައުންސިލްގެ ރައީސް ވިދާޅުވީ، ޕާކުގެ މަސައްކަތް ފުރިހަމަކަމާ އެއްކޮށް ނިންމާލެވުނީ މިދިޔަ ސަރުކާރާއި މި ސަރުކާރާއި, އެސްޓީއޯގެ މިހާރުގެ މެނޭޖިން ޑިރެކްޓަރު ޝިމާދު އިބްރާހިމް އިތުރުން ސިޔާމްގެ އެހީތެރިކަމާ އެއްކޮށް ކަމަށެވެ.
އެގޮތުން، ޕާކުގެ މަސައްކަތަކީ ބަލައިގަނެވޭ ފަދަ ފުރިހަމަ މަސައްކަތެއް ކަމަށް އޭނާ ވިދާޅުވިއެވެ.
އޭގެއިތުރުން، މި ރަސްމިއްޔާތުގައި ވަނީ ޕާކުގެ މަސައްކަތަށް އެކި ގޮތްގޮތުން އެހީތެރިވި ފަރާތްތަކަށް ހަނދާނީ ފިލައެއް އަރުވާފައެވެ.