ދިވެހިރާއްޖެއިން ޕާކިސްތާނަށް ކަނޑައަޅުއްވާފައި ހުންނަވާ ސަފީރު މުހައްމަދު ތޯހާ، ޕާކިސްތާނަށް އަފްޣާނިސްތާނުން ކަނޑައަޅުއްވާފައި ހުންނަވާ މަންދޫބު ސަރުދާރު އަހުމަދު ޝަކީބާ ބައްދަލުކުރެއްވީ ދިވެހި ސަރުކާރުން ހުއްދަ ނުހޯދައި ކަމަށް ބުނެ، ފިޔަވަޅު އަޅައިފިއެވެ.
ޕާކިސްތާނުގައި ދެ ބޭފުޅުން ބައްދަލުކުރެއްވީ ހުކުރު ދުވަހުއެވެ. ދެ ގައުމުގެ ގުޅުން ބަދަހިކުރުމާ މެދު ދެ ބޭފުޅުން މަޝްވަރާކުރެއްވި ކަމަށް ބޭރުގެ މީޑިއާތަކުން ރިޕޯޓުކޮށްފައިވެއެވެ.
ޚާރިޖީ ވުޒާރާއިން މިއަދު ނެރުނު ނޫސް ބަޔާނެއްގައި ބުނީ، ޕާކިސްތާނަށް ކަނޑައަޅާފައި ހުންނަވާ ސަފީރު، އަފްޣާނިސްތާނުގެ ފަރާތުން ޕާކިސްތާނުގައި ހުންނަވާ މަންދޫބާ އެކު ބޭއްވި ބައްދަލުވުމަކީ ދިވެހި ސަރުކާރުގެ ހުއްދައާ އެކު ކުރިއަށް ގެންގޮސްފައިވާ ބައްދަލުވުމެއް ނޫން ކަމަށެވެ.
އެ ކަމާ ގުޅިގެން ސަރުކާރުގެ ފަރާތުން އަޅަންޖެހޭ ފިޔަވަޅު އަޅާފައިވާ ކަމަށް އެ ބަޔާނުގައި ބުންޏެވެ. އެކަމަކު، އެއީ ކޮން ފިޔަވަޅެއް ކަމެއް ސަރުކާރުން ނުބުނެއެވެ.
އަފްޣާނިސްތާނުގައި ވެރިކަންކުރާ ތާލިބާނުންގެ ވެރިކަން ރާއްޖެއިން ރަސްމީކޮށް ބަލައިގެންފައެއް ނުވެއެވެ.
ޚާރިޖީ ވުޒާރާއިން ބުނީ، ރާއްޖެއިން ގައުމެއް ބަލައިގަތުމާ މެދު ސުވާލު އުފެދިއްޖެ ނަމަ އަބަދުވެސް ބަލަނީ އދ. އިން ކަނޑައަޅާފައިވާ މިންގަޑުތަކާއި އުޞޫލުތަކަށް ކަމަށެވެ. އެހެންވެ، އަފްޣާނިސްތާނުގެ ސަރުކާރުގެ ގޮތުގައި ރާއްޖެއިން ބަލައިގަންނަނީ އދ.ގައި އަފްޣާނިސްތާނު ތަމުސީލުކުރާ ފަރާތް ކަމަށް ބަޔާނުގައި ބުންޏެވެ.
އޮގަސްޓް 2021 އިން ފެށިގެން ތާލިބާނުން އަފްޣާނިސްތާނުގައި ވެރިކަން ކުރި ނަމަވެސް އދ. އިން ތާލިބާނުންގެ ވެރިކަން ބަލައިގެންފައެއް ނުވެއެވެ. ތިން ފަހަރެއްގެ މަތިން އދ. ގައި ބައިވެރިވާން އެދުމުން ވެސް ތާލިބާނުންނަށް އެ ފުރުސަތު ދީފައެއް ނުވެއެވެ.
އެހެންވެ، އދ. ގައި އަފްޣާނިސްތާނު ތަމުސީލުކުރަން އަދިވެސް ހުންނަވަނީ ކުރީގެ ސަރުކާރުން އައްޔަންކުރި ބޭފުޅެކެވެ.