މާދަމާ ފާހަގަކުރާ މި އަހަރުގެ ނަސްރުގެ ދުވަހު، ނޮވެންބަރު ތިނެއްގައި ބޭނުން ކުރި ބައެއް ހަތިޔާރުތައް ދައްކާލައި، ސިފައިންގެ މައުރަޒެއް ބާއްވަން ނިންމައިފިއެވެ.
ދައުލަތުގެ މީޑިއާގެ 'ރާއްޖެ މިއަދު' ޕްރޮގްރާމުގައި ވާހަކަދައްކަވަމުން، ކޮމާންޑް ސާޖަންޓް މޭޖާ އަބްދުﷲ ސައީދު ވިދާޅުވީ، މި އަހަރުގެ މައުރަޒު ވަރަށް ތަފާތު ވާނެ ކަމަށެވެ.
'ނަސްރުގެ ދުވަހުގެ ސިފައިންގެ މައުރަޒު'ގެ ނަމުގައި ބާއްވާ މި މައުރަޒަކީ ނޮވެންބަރު ތިނެއްގެ ޢުދުވާނީ ހަމަލާގައި ރާއްޖެއަށް ކުރިމަތިވި ބޮޑު ނުރައްކަލާއި، ޝަހީދުވި އަބުތޯލުންގެ ވާހަކައާއެކު އެ ހާދިސާ އަދުގެ ޖީލަށް ކިޔައިދީ، އުނގަންނައިދޭ މައުރަޒަކަށް ވާނެ ކަމަށް ސައީދު ވިދާޅުވިއެވެ.
އެގޮތުން، ނޮވެންބަރު ތިނެއްގެ ހާދިސާ ސިފަކޮށްދޭ ކުރެހުންތަކާއި ފޮޓޯތަކާއި އަޑާއި ވީޑީއޯތަކުގެ އިތުރުން އެ ދުވަހު ބޭނުންކުރި ބައެއް އާލާތްތައް މަރުރަޒުން ފެންނާނެ ކަމަށް ސައީދު ވިދާޅުވެފައިވެއެވެ.
މި މައުރަޒު އޮންނާނީ މާދަމާއިން ފެށިގެން އަންނަ ހޮނިހިރު ދުވަހަށް ޖުމްހޫރީ މައިދާނުގައެވެ.