މޯލްޑިވްސް އިސްލާމިކް ބޭންކުގެ އެސެޓް ވެލިއު ނިމިދިޔަ ކުއާޓަރުގައި 10.42 ބިލިއަން ރުފިޔާއަށް އަރައިފިއެވެ.
އެމްއައިބީއިން ބުނީ މިއީ އެ ބޭންކުގެ އެސެޓް ވެލިއު 10 ބިލިއަން ރުފިޔާއަށް އެރި ފުރަތަމަ ފަހަރު ކަމަށެވެ. އަދި މިއީ މިދިޔަ އަހަރުގެ ތިންވަނަ ކުއާޓަރާ އަޅާބަލާއިރު 34.31 އިންސައްތައިގެ ބޮޑު ކުރިއެރުމެއް ކަން އެ ބޭންކުން ވަނީ ފާހަގަކޮށްފައެވެ.
ބޭންކުގެ މިދިޔަ ކުއާޓަރުގެ ރިޕޯޓުން ދައްކާ ގޮތުން، ހުސްވި ކުއާޓާރުގައި އެބޭންކުގެ ފައިނޭންސިން ޕޯޓްފޯލިއޯ 5.48 ބިލިއަން ރުފިޔާއަށް ވަނީ އިތުރުވެފައެވެ. އެއީ ނިމިދިޔަ އަހަރުގެ ތިންވަނަ ކުއާޓަރާ އަޅައިބަލާއިރު 45.55 އިންސައްތައިގެ ކުރިއެރުމެކެވެ.
މިއަހަރުގެ ދެވަނަ ކުއާޓަރާ އަޅާބަލާއިރު، އެމްއައިބީގެ ޑިޕޮސިޓްބޭސް 8.46 ބިލިއަން ރުފިޔާއަށް އިތުރުވެފައި ވާއިރު، މިއީ ފާއިތުވެދިޔަ އެއް އަހަރު ދުވަހުގެ ތެރޭގައި ލިބުނު 26.46 އިންސައްތައިގެ ކުރިއެރުމެއްކަން އެ ބޭންކުންވަނީ ފާހަގަކޮށްފައެވެ. އެއާއެކު ބޭންކުގެ އާމްދަނީ ނިމިދިޔަ އަހަރުގެ ތިންވަނަ ކުއާޓަރާ އަޅައިބަލާއިރު 50.80 އިންސައްތައިގެ ބޮޑު ކުރިއެރުމެއް ހޯދާފައި ވާކަން އެ ބޭންކުން ވަނީ ފާހަގަކޮށްފައެވެ.
އެމްއައިބީއިން ވަނީ މި ކުރިއެރުމާއެކު ތިންވަނަ ކުއާޓަރު ނިމުނުއިރު، ސާފު ފައިދާގެ ގޮތުގައި 81.71 މިލިއަން ރުފިޔާ ލިބިފައިވާ ކަމަށް ބުނެފައެވެ. އެއީ ނިމިދިޔަ އަހަރާ އަޅާބާލާއިރު 53.76 އިންސައްތައިގެ ކުރިއެރުމެއް ކަމަށް ތަފާސްހިސާބުން ދައްކައެވެ.
މި އަހަރުގެ ހުރިހާ ކުއާޓަރެއްގައިވެސް ބޮޑު ކުރިއެރުމެއް އެމްއައިބީއިން ހޯދަމުން އަންނައިރު އެބޭންކުން ދަނީ ޓެކްނޮލޮޖީގެ އެހީގައި ބޭންކު ހިންގުމަށް ޒަމާނީ ބަދަލުތަކެއް ވެސް ގެންނަމުންނެވެ.
އެގޮތުން ބޭންކަށް ނުގޮސް އެކައުންޓު ހުޅުވުމާއި އުޖާލާ ފައިނޭންސިންގެ ހުރިހާ ކަމެއް އޮންލައިންކޮށް ކުރެވޭ ގޮތަށް ބަދަލު ކުރުމުގެ އިތުރުން ބޭންކުގެ ބްރާންޗްތައް އިތުރު ކުރުމާއެކު ބޭންކުގެ ޚިދުމަތް ހޯދުމަށް ފަސޭހަވާނެ ގޮތްތައް ތައާރަފުކޮށްފައިވެއެވެ.