ޑިސެމްބަރު މަހު ބާއްވާ އުރީދޫ ފަން ރަންގައި ރަޖިސްޓްރީވާން ހުޅުވާލައިފި

އުރީދޫއިން އަންނަ ޑިސެމްބަރު މަހު ހުޅުމާލޭގައި ބާއްވާ އުރީދޫ ފަން ރަންގައި ރަޖިސްޓްރީވާން ހުޅުވާލައިފިއެވެ.

ޑިސެމްބަރު 20 ވަނަ ދުވަހު ބާއްވާ އުރީދޫ ފަން ރަންގައި ބައިވެރިވުމަށް ލިންކު މެދުވެރިކޮށް ރަޖިސްޓްރީ ވެވޭނެއެވެ. އެ ރަންގައި ރަޖިސްޓްރީ ވެވޭނީ އަންނަ މަހުގެ 16 ވަނަ ދުވަހުގެ ނިޔަލަށެވެ.

އުރީދޫން ބުނީ، މި ދުވުމުގައި ހަ އަހަރުން މަތީގެ އެންމެންނަށް ވެސް ބައިވެރިވެވޭނެ ކަމަށާއި މިދުވަމަކީ ފަސް ކިލޯމީޓަރުގެ ދުވުމެއް ކަމަށެވެ.

ފަން ރަންގެ ކިޓްތައް ލިބެން ހުންނާނީ ސްޓޭންޑަޑް ކިޓް އާއި ފަން ކިޓް ކެޓަގަރީންނެވެ. އެގޮތުން، ސްޓޭންޑަޑް ކިޓްގައި ފަން ރަން ޓީޝާޓް އަދި ރިސްޓްބޭންޑް ހިމެނޭއިރު އޭގެ އަގަކީ 100 ރުފިޔާ ކަމަށް އުރީދޫން ބުނެފައިވެއެވެ.

އޭގެއިތުރުން، 210 ރުފިޔާއަށް ލިބޭ ފަން ކިޓްގައި އުރީދޫ ފަން ރަން ޓީޝާޓްގެ އިތުރުން ރިސްޓްބޭންޑަކާއި ފޮތި ދަބަސް، އައިނު އަދި ބަންޑާނާ ހިމެނެއެވެ.

އެ ދުވުމުގެ އަމާޒަކީ، ދުޅަހެޔޮ ދިރިއުޅުމަކަށް ދުވުމަކީ މަޖާ އަދި އުފާވެރިކަން ގެނުވަދޭނެ ހަރަކާތެއްކަން އަންގައިދިނުން ކަމަށް އުރީދޫން ބުންޏެވެ. މި ހަރަކާތުގައި ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ސްޓޭޝަންތަކުގައި، ކުލައިގެ އިތުރުން ފެން އަދި މަޖާ ހަރަކާތްތަކެއް ކުރިއަށްދާނެއެވެ.

މިއީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ، ހިނގާފައާއި ޖޮގްކޮށްފައާއި ދުވެފައި ނުވަތަ ނަށަމުންވެސް މި ދުވުން ނިންމިދާނެ ކަމަށް އުރީދޫން ބުނެފައިވެއެވެ.

އުރީދޫ ފަން ރަން އަކީ ކޮންމެ އަހަރަކު އުރީދޫއިން ބާއްވަމުންދާ ހަރަކާތްތަކުގެ ތެރެއިން އާއްމުންގެ މެދުގައި އެންމެ މަގުބޫލު އެއް ހަރަކާތެވެ. މިދިޔަ އަހަރު ހުޅުމާލޭގައި ކުރިއަށް ގެންދިޔަ މި ހަރަކާތްތަކުގައި 5،000 އަށްވުރެ ގިނަ މީހުން ބައިވެރިވިއެވެ.