ސަރުކާރުން ބޭހުގެ އަގު ކޮންޓްރޯލް ކޮށް އާސަންދަ ރިޕޯމްކުރުމަށް ކުރާ މަސައްކަތުގެ ތެރެއިން، މާދަމާއިން ފެށިގެން އާސަންދަ ދޫކުރާނީ ޕްރައިވެޓް އިންޝުއަރެންސުން ކެނޑުމަށްފަހު ކަމަށް ނިންމައިފިއެވެ.
އެންސްޕާއިން މީޑިއާއާ ހިއްސާކުރި މެސެޖެއްގައި ވަނީ، ސިއްހީ އިންޝުއަރަންސްގެ ޤައުމީ ނިޒާމް، "އާސަންދަ ސްކީމް" ހަރުދަނާކުރުމުގެ ގޮތުން އިސްރާފުކުޑަ ނިޒާމަކަށް ބަދަލުކޮށް، ދެމެހެއްޓެނިވި ގޮތެއްގައި ރައްޔިތުންނަށް އެންމެ ފައިދާކުރާ ހުރި، ފެންވަރު ރަނގަޅު ޚިދުމަތްތަކެއް ފޯރުކޮށްދެވޭ ނިޒާމަކަށް ހެދުމަށްޓަކައި މުހިއްމު މަސައްކަތްތަކެއް ކުރަމުން ދާކަމަށެވެ.
އެގޮތުން، ސިއްހީ ޚިދުމަތްދޭ މަރުކަޒުތަކުން ޚިދުމަތް ހޯދާ ފަރާތްތަކުގެ ތެރެއިން ޕްރައިވެޓް އިންޝުއަރެންސް އޮންނަ ފަރާތްތަކުން ހޯދާ ޚިދުމަތްތަކަށް ބިލްކުރުމުގައި ޕްރައިވެޓް އިންޝުއަރެންސަށް އިސްކަންދިނުމަށް ހަމަޖައްސާފައި ވާކަމަށް އެ މެސެޖުގައި ވެއެވެ.
މިބަދަލާ ގުޅިގެން "އައުޓް ޕޭޝަންޓް" ގެ ޚިދުމަތްތައް ހޯދާ ފަރާތްތަކުގެ ތެރެއިން ޕްރައިވެޓް އިންޝުއަރަންސް އޮންނަ ފަރާތެއްނަމަ، ފުރަތަމަ ބިލްކުރާނީ ޕްރައިވެޓް އިންޝުއަރަންސަށެވެ.
އިންސުއަރަންސްގެ ޕެކޭޖްތަކުގެ ލިމިޓް ހަމަވުމުން ނުވަތަ އިންޝުއަރަންސް އިން އެ ޚިދުމަތެއް ކަވަރު ނުކުރާނަމަ، މިހާރެކޭ ވެސް އެއްގޮތަށް އާސަންދަ ސްކީމުން އެޚިދުމަތުގެ އަގު ކަވަރުކުރާނެއެވެ.
މިކަން ތަންފީޒުކުރުމަށް ހަމަޖެހިފައިވަނީ އެކި ފިޔަވަހިތަކަށް ބަހާލައިގެން، "އައުޓް ޕޭޝަންޓް" އަދި "އިން ޕޭޝަންޓް" ގެ ޚިދުމަތްތައް ވަކިން ކަމަށް އެންސްޕާއިން މައުލޫމާތު ދީފައި ވެއެވެ.
މިބަދަލާއި ގުޅިގެން ޝަކުވާއެއް ވާނަމަ އާސަންދަ "ޝިކާވަތި ޗެޓްލައިން"އަށް ރިޕޯޓު ކުރެވޭނެއެވެ.
އާސަންދަ ރިފޯމް ކުރުމުގެ ގޮތުން، އާސަންދަ ސްކީމްގެ ދަށުން އެންމެ ގިނައިން ދޫކުރެވޭ 250 ބޭހެއްގެ އަގަށް ބަދަލުގެނައުމަށް ވެސް މިދިޔަ އާދިއްތަ ދުވަހު އެ ކުންފުނިން ނިންމައިފިއެވެ.
ސަރުކާރުން ނިންމާފައި ވަނީ އަގު މުރާޖައާ ކުރެވިފައިވާ 87 ބޭހެއްގެ އަގަށް ނޮވެމްބަރު އެކަކުން ފެށިގެން ބަދަލު ގެނައުމަށެވެ. އަދި 126 ބޭހެއްގެ އަގަށް ނޮވެމްބަރު 24އިން ފެށިގެން ބަދަލު ގެނައުމަށެވެ.
މި ނިންމުމާ ގުޅިގެން ރައީސް އޮފީހުގެ ތަރުޖަމާނު އަދި ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ މެނޭޖިން ޑިރެކްޓަރު ހީނާ ވަލީދު ވިދާޅުވީ މި ނިންމުމާއެކު 220 މިލިއަން ރުފިޔާ ސަލާމަތްކުރެވޭނެ ކަމަށެވެ.