މިހާތަނަށް 24،000އަށް ވުރެ ގިނަ މީހުންނަށް ހިލޭ އައިނު ހައްދަ ދީފައިވާ ކަމަށާއި ދުވާލަކަށް ހައްދަނީ 40އެއްހާ އައިނު ކަމަށް އައިޖީއެމްއެޗުން މިއަދު ބުނެފިއެެވެ.
އައިޖީއެމްއެޗުގައި އައިނު ފިހާރައެއް ހުޅުވީ، މިދިޔަ އަހަރުގެ ޖުލައި 26ގައެވެ. އެ ޚިދުމަތް ފުޅާކޮށް، ހުޅުމާލެ ހޮސްޕިޓަލާއި އައްޑޫ އެކުއަޓޯރިއަލް ހޮސްޕިޓަލާއި ކުޅުދުއްފުށީ ރީޖަނަލް ހޮސްޕިޓަލުގައި ވެސް ވަނީ އައިނު ފިހާރަ ހުޅުވާފައެވެ.
އޭގެ ތެރެއިން، އައިޖީއެމްއެޗުގައި އައިނު ފިހާރަ ހުޅުވި ދުވަސްވަރު އައިނު ހައްދަން އޮތް ޑިމާންޑު ވަރަށް ބޮޑުވިއެވެ. އެގޮތުން، ފުރަތަމަ ތިން ދުވަހުގެ ތެރޭގައި އައިނަށް އެދި، 361 މީހަކު ނަން ނޯޓުކުރިއެވެ.
'ސަން'އިން މިއަދު ސުވާލުކުރުމުން އައިޖީއެމްއެޗުން ބުނީ، މިހާރު ކުރިއާ އަޅައިބަލާއިރު، އައިނަށް އޮތް ޑިމާންޑު ދަށް ކަމަށެވެ. އެގޮތުން ކޮންމެ ދުވަހަކު 100 އައިނު ހައްދަން ލިބުނު ނަމަވެސް މިހާރު ދުވާލަކަށް އައިނު ހައްދަން އެދެނީ 30އާއި 40އާ ދެމެދުގެ އަދަދަކަށް ކަމަށް އެ ހޮސްޕިޓަލުން ބުންޏެވެ.
އައިޖީއެމްއެޗް އައިނު ފިހާރަ: މިހާތަނަށް 24،000 މީހުންނަށް ހިލޭ ވަނީ އައިނު ހައްދަ ދީފައި-- ސަން ފޮޓޯ: މޫސާ ނަދީމްއައިޖީއެމްއެޗުން ލަފާކުރި ގޮތުގައި، ޑިމާންޑު ދަށްވީ، ހިލޭ ގިނަ ބަޔަކަށް އައިނު ހެއްދިފައިވާތީއެވެ.
އެ ހޮސްޕިޓަލުން ބުނި ގޮތުގައި، މިހާތަނަށް އައިނު ފިހާރަތަކުން ވަނީ 24،000އަށް ވުރެ ގިނަ މީހުންނަށް އައިނު ހައްދަދީފައެވެ.
ރާއްޖޭގައި މި ޚިދުމަތް އަބަދު ވެސް ދެމުން އައީ ޕްރައިވެޓް ސެކްޓަރުން ކަމަށްވާއިރު، އައިނު ހެއްދުމުގެ ޚިދުމަތް ސަރުކާރުން މިދިޔަ އަހަރު ފެށީ އަލަށެވެ. މިގޮތުން، ސަރުކާރުން އަމިއްލަ ވިޔަފާރިތަކަށް ވަންނަނީ ކަމަށް ބުނެ، އޭރު ބައެއް މީހުން ކަންބޮޑުވުން ވެސް ފާޅުކުރިއެވެ.
އޭގެ އިތުރުން، އައިނު ހައްދަން ލުޔެއް ދިނުމަށް ޓަކައި، މިދިޔަ ޖޫން މަހުން ފެށިގެން މި ސަރުކާރުން ވަނީ، ދެ އަހަރުން އެއް އަހަރު އައިނު ހައްދަން އާސަންދައިން ދޭ އެހީ 1،000 ރުފިޔާއިން 2،000 ރުފިޔާއަށް ބޮޑުކޮށްފައެވެ.