ޒުވާނުންނާއި ދަރިވަރުންނާއި ބެލެނިވެރިންނަށް ހެޔޮ އަގުތަކެއްގައި އުމްރާ ޕެކޭޖުތައް ތައާރަފު ކުރުމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސައީދު މިއަދު އެދިވަޑައިގެންފިއެވެ.
ޙައްޖާއި އުމްރާއާ ބެހޭ ކޮންފަރެންސް ފެށުމަށް ބޭއްވި ރަސްމިއްޔާތުގައި މިނިސްޓަރު ޝަހީމް ވިދާޅުވީ، ކޮންމެ މީހަކަށް 25,000 ރުފިޔާ ނުވަތަ 40،000 ރުފިޔާ ދީފައި އުމްރާއަށް ނުދެވިދާނެ ކަމަށެވެ.
އެހެންނަމަވެސް، 20،000 ރުފިޔާއަށް ނުވަތަ 15،000 ރުފިޔާއަށް އުމްރާއަށް ދެވިދާނެ މީހުން އުޅޭނެ ކަމަށާއި ޒުވާނުންނާއި ދަރިވަރުންގެ އިތުރުން ބެލެނިވެރިންނަށް އުމްރާއަށް ދެވޭނެ ޕެކޭޖުތައް ތައާރަފު ކުރަން ޖެހޭ ކަމަށް މިނިސްޓަރު ވިދާޅުވިއެވެ.
ޒުވާނުންނާއި ދަރިވަރުންނާއި ބެލެނިވެރިންނަށް އެކިއެކި ފަރާތްތަކަށް އަގުހެޔޮ ޕެކޭޖުތައް ތައާރަފު ކުރުން....އަޒީޒިއްޔާގައި ތިބޭ ގޮތަށް ހުޅުވާލާ ޕެކޭޖުތައް އަގުހެޔޮވާނެ. ކޮނޑުގައި ދަބަސް އަޅުވާލައިގެން ބާރުގަދަ ޒުވާނުންނަށް ބަހުގައި ފަސް ނަމާދަށް އާދެވޭނެ. ހުރިހާ ނަމާދަކަށް ޙަރަމްފުޅަށް ދެވޭނެއިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު
ޝަހީމް ވިދާޅުވި ގޮތުގައި، މައްކާއާއި މަދީނާއަށް އުމްރާއަށް ގެންދާ ޕެކޭޖުތައް އަގު ބޮޑުވަނީ ޙަރަމްފުޅާ ކައިރިން ހޮޓަލްތައް ނަގާތީއެވެ. އެއާ ޚިލާފަށް، ޙަރަމްފުޅާ ދުރުން ހޮޓަލްތައް ނެގުމުން އުމްރާ ޕެކޭޖުތައް އަގުހެޔޮވާނެކަން ޝަހީމް ވަނީ ފާހަގަކުރައްވާފައެވެ.
މީގެއިތުރުން، ރާއްޖޭގައި އާންމުކޮށް އުމްރާއަށް މީހުން ގެންދަނީ މޫސުމީ ކަމެއްގެ ގޮތުގައި ކަމަށް މިނިސްޓަރު ވިދާޅުވެފައިވެއެވެ. އެގޮތުން، މިހާރު އުމްރާގެ އަޅުކަން އޮންނަނީ ރޯދަ މަހާއި ޖެނުއަރީ، ފެބްރުއަރީގެ އިތުރުން ޑިސެމްބަރު އުމްރާ ގޮތަށް ކަމަށް އޭނާ ވިދާޅުވިއެވެ. ނަމަވެސް، އެކަމަށް ނިޒާމީ ބަދަލުތަކެއް ގެންނަން ޖެހޭ ކަމަށް މިނިސްޓަރު ގަބޫލު ކުރައްވައެވެ.
އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު:މިނިސްޓަރުގެ ހުށަހެޅުމެއް: ޒުވާނުންނާއި ދަރިވަރުންނަށް ޚާއްސަ، އަގުހެޔޮ އުމްރާ ޕެކޭޖުތައް ތައާރަފް ކުރަން ބޭނުން -- ފޮޓޯ/ އިސްލާމިކް މިނިސްޓްރީ
އެ ނިޒާމަށް ބަދަލު ގެންނަން ޖެހޭނީ އެ ޖަމިއްޔާތަކުން ކަމަށާއި އެކަން ކުރަން ޖެހޭނީ އިސްލާމިކް މިނިސްޓްރީން ނޫން ކަމަށް މިނިސްޓަރު ވިދާޅުވިއެވެ.
ޝަހީމް ހުށަހެޅުއްވީ މިހާރު އޮންނަ ގޮތާ ޚިލާފަށް ކޮންމެ ދުވަހެއްގައި ވެސް އުމްރާއަށް ދެވޭނެ މަގު ތަނަވަސްކޮށްދިނުމަށެވެ.
އެއީ އަބަދު ވެސް އުމްރާއަށް ދެވޭނެ ގޮތެއް އޮތުން. ކޮންމެ ހިނދެއްގައި ވެސް އުމްރާއަށް ދެވޭނެ ގޮތެއް އޮތުން، ކޮންމެ ދުވަހެއްގައި ވެސް އެ މީހަކަށް ފަސޭހަ ދުވަހެއްގައި ދެވޭނެ މަގު ކޮށާފައި ބޭއްވުން.އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު
އޭގެއިތުރުން، ސަރުކާރުން މަސައްކަތް ކުރަމުން އަންނަނީ ހައްޖާއި އުމްރާއަށް މީހުން ގެންދާ ނިޒާމު އިތުރަށް ހަރުދަނާކޮށް، ތަރައްގީ ކުރުމަށް ކަމަށް އޭނާ ވިދާޅުވިއެވެ.