ދިވެހި ރާއްޖޭގެ ގައުމީ ޔުނިވާސިޓީ (އެމްއެންޔޫ)ގެ ސްކޫލް އޮފް މެޑިސިންގައި ކިޔެވި ދަރިވަރުންގެ ފުރަތަމަ ބެޗު މިއަދު ދަސްވެނިވެއްޖެއެވެ.
މިއަދު އެމްއެންޔޫގައި ބާއްވާ ދަސްވެނިވުމުގެ ހަފުލާގައި ކޯހުން ފުރިހަމައަށް ފާސްވެ ސްކޫލް އޮފް މެޑިސިންގެ 21 ދަރިވަރުން ދަސްވެނިވެފައި ވެއެވެ.
މި ރަސްމިއްޔާތުގައި ދަސްވެނިންނަށް ސަނަދު ތައުކީދު ކޮށްދެއްވީ އެމްއެންޔޫގެ ޗަންސެލަރު ޑރ. މަހުމޫދު ޝައުގީއެވެ.
ރަސްމިއްޔާތުގައި ވާހަކަ ދައްކަވަމުން ޑރ. މަހުމޫދު ޝައުގީ ވިދާޅުވީ، މިއަދު ކުރިއަށްދަނީ ވަރަށް ތާރީޚީ ދަސްވެނިވުމުގެ ހަފުލާއެއް ކަމަށެވެ.
"ހިނދުކޮޅެއްގެ ތެރޭގައި 311 ދަރިވަރަކު ކުރި ބުރަ މަސައްކަތުގެ އަރުތަ ރަމްޒުކޮށްދޭ، ޔުނިވާސިޓީގެ ގާނޫނީ ލިޔުން އެ ދަރިވަރުންގެ މައްޗަށް ތައުގީދު ކުރެވިގެން ދާނެ. މީގެ ތެރޭގައި ފުރަތަމަ ފަހަރަށް ޑޮކްޓާ އޮފް މެޑިސިންގެ ރޮނގުން ދަސްވެނިވާ ދަރިވަރުން ހިމެނޭ ކަމީ އަޅުގަނޑުމެން ވަރަށް ޝަރަފުވެރިކަމާ އެކު ފާހަގަކުރާ ކަމެއް،" ޑރ. މަހުމޫދު ޝައުގީ ވިދާޅުވިއެވެ.
ސްކޫލް އޮފް މެޑިސިން ރާއްޖޭގައި ގާއިމްކޮށް ކިޔަވައިދޭން ފެށީ 2019ވަނަ އަހަރެވެ. ރާއްޖޭގައި މެޑިސިން ކިޔަވައިދެނީ މެލޭޝިއާގެ ޤައުމީ ޔުނިވާސިޓީ، ކެބަންސާން މެލޭޝިއާ (ޔޫކޭއެމް)ގައި ކިޔަވައިދޭ ކަރިކިއުލަމަށެވެ.
މެޑިސިން ކިޔެވުމުގެ ކޯހަކީ ފަސް އަހަރު ދުވަހުގެ ކޯހެކެވެ.