ލުބުނާނުގެ ހަތިޔާރު އެޅި ޖަމާއަތް، ހިޒަބުﷲގެ އާ ލީޑަރު ނަޢީމު ޤާސިމް ވެސް އަވަހާރަކޮށްލާނެ ކަމުގެ އިންޒާރު އިސްރާއީލުން ދީފިއެވެ.
އިސްރާއީލުގެ ދިފާއީ ވަޒީރު ޔޮއާވް ގަލަންތް ބުނީ ހިޒްބުاللهގެ ވެރިޔާގެ މަގާމު ޤާސިމް އަދާ ކުރައްވާނީ "މަދު ދުވަސްކޮޅަކަށް, ވަގުތީ ގޮތުން" ކަމުގައެވެ.
ގަލަންތް އެގޮތަށް ބުނީ އަންގާރަ ދުވަހު އެކްސްގައި ޤާސިމްގެ ފޮޓޯއެއް އާންމުކުރުމަށްފަހުއެވެ.
ހިޒްބުﷲގެ އާ ލީޑަރަކަށް ޤާސިމް އައްޔަންކުރީ މި މަހުގެ 29ވަނަ ދުވަހުއެވެ.
މަގާމާ ހަވާލުވެވަޑައިގަތުމަށްފަހު އާންމުންނާ މުޚާތަބު ކުރައްވާ ދެއްވި ފުރަތަމަ ތަޤުރީރުގައި ޤާސިމް ވިދާޅުވީ ހިޒްބުﷲއިން އިސްރާއީލާއެކު މިހާރު ކުރަމުންދާ ހަނގުރާމަ ހުއްޓާލާނީ ހަނގުރާމަ ހުއްޓާލުމަށް ހުށަހަޅާ ޝަރުތުތަކަކީ އެ ޖަމާއަތަށް ފެންނަ ރަގަޅު ޝަރުތުތަކެއް ކަމުގައި ވާނަމަ ކަމަށެވެ.
ހިޒްބުﷲގެ އާ ލީޑަރަކަށް ޤާސިމް އައްޔަންކުރީ އެ މަގާމުގައި ކުރިން ހުންނެވި ޙަސަން ނަޞްރުﷲ ޝަހީދުކޮށްލުމާ ގުޅިގެންނެވެ. ނަޞްރުالله ޝަހީދު ކޮށްލާފައި ވަނީ ސެޕްޓެމްބަރު 27ވަނަ ދުވަހު އިސްރާއީލުން ލުބުނާނަށް ދިން ހަމަލާއެއްގައެވެ.
ނަޞްރުاللهއަށް ފަހު ހިޒްބުاللهގެ ވެރިކަމާ ހަވާލުވެ ވަޑައިގަންނަވާނެ ކަމަށް ކުރިން ބެލެވިފައި އޮތް ހާޝިމް ޞަފީއްދީން ވެސް އިސްރާއީލުން ވަނީ ޝަހީދު ކޮށްލާފައެވެ.
ނަވާރަ ސަތޭކަ ނުވަދިހަ އެއްވަނަ އަހަރުން ފެށިގެން ހިޒްބުاللهގެ ވެރިޔާގެ ނައިބުގެ މަގާމު ފުރުއްވަމުން ގެންދަވާފައި ވަނީ ޤާސިމެވެ. އޭނާ އެ މަގާމަށް އައްޔަން ކުރައްވާފައި ވަނީ އިސްރާއީލުން ދިން ހަމަލާއެއްގައި ޝަހީދު ކޮށްލާފައިވާ ހިޒްބުاللهގެ ކުރީގެ ވެރިޔާ ޢައްބާސް އަލް މޫސަވީއެވެ. މޫސަވީ ޝަހީދު ކޮށްލާފައި ވަނީ 1992ވަނަ އަހަރު އިސްރާއީލުގެ އަސްކަރީ ހެލިކޮޕްޓަރުތައް ބޭނުން ކޮށްގެން ދިން ހަމަލާއެއްގައެވެ.
ފާއިތުވި އަހަރުތަކުގައި ހިޒްބުاللهގެ މައި ތަރުޖަމާނުގެ ގޮތުގައި ވެސް ހުންނެވީ ޤާސިމެވެ. އޭނާއަކީ ބޭރުގެ މީޑިޔާތަކާ ރަހުމަތްތެރި ގާތް ގުޅުމެއް ބާއްވަމުން ގެންދަވާ ބޭފުޅެކެވެ. ނަޞްރުالله ޝަހީދުކޮށްލި ފަހުން ވެސް ޤާސިމް ތިން ފަހަރެއްގެ މަތިން ޓީވީ މެދުވެރިކޮށް ލުބްނާނުގެ ރައްޔިތުންނާ މުޚާތަބު ކުރައްވާފައިވެއެވެ.
ސެޕްޓެންބަރު 23ވަނަ ދުވަހުން ފެށިގެން އިސްރާއީލުން ލުބުނާނާ ދެކޮޅަށް ދެމުންގެންދާ ހަމަލާތަކުގައި ޝަހީދު ކޮށްލާފައިވާ އާންމުންގެ އަދަދު ވަނީ 3000އާ ގާތްކޮށްފައެވެ. އޭގެ ތެރޭގައި ގިނަ އަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ސިއްޚަތާ ބެހޭ ވުޒާރާއިން ބުނެއެވެ. ޒަޚަމު ކޮށްލާފައިވާ މީހުންގެ އަދަދު 12,772އަށް އަރައެވެ. އިސްރާއީލުގެ ހަމަލާތަކުގެ ސަބަބުން ގެދޮރު ގެއްލިފައިވާ މީހުންގެ އަދަދު 1.3 މިލިޔަނަށް ވަނީ އުފުލިފައެވެ.