ބިލިއަނަރު އެލޮން މަސްކު އޭނާއަށް ލިބިފައިވާ 11 ކުދިންނާއި އެ ކުދިންގެ މަންމައިން ދިރިއުޅެން 35 މިލިއަން ޑޮލަރުގެ ސިއްރު ލަގްޒަރީ އެޕާޓްމަންޓްތައް ހިމެނޭ ކޮމްޕައުންޑެއް ގަނެފައިވާ ކަމަށް ރިޕޯޓުތައް ބުނެފިއެވެ.
ރިޕޯޓުތައް ބުނާގޮތުން މަސްކު ބޭނުން ވަނީ އެ ކުދިންނާ އެކު ކުދިންގެ ތިން މަންމައިން ވެސް ދިރިއުޅެވޭނެ ގޮތަކަށް އެ ކޮމްޕައުންޑު ބިނާކުރުމަށެވެ. އޭނާ ދާދި ފަހުން ވަނީ ޓެކްސަސްގެ އޮސްޓިންއިން ވަރަށް ބޮޑު ދެ ގެ ގަނެފައެވެ. އޭގެތެރޭގައި ތަސްކަން ވިލާއެއް ފަދަ 14،400 އަކަފޫޓުގެ މެންޝައެއް ހިމެނޭ ކަމަށް ނޫސްތަކުން ވަނީ ބުނެފައެވެ.
މި ދެ ގޭގައި ވެސް ހިނގާލާފައި ދެވޭހާ ދުރުމިން ހުރިއިރު މިއިން ކޮންމެ ގެއެއްގައި ހަ ކޮޓަރި ހުންނާނެ ކަމަށް ދަ ނިއުޔޯކް ޓައިމްސްއިން ވަނީ ބުނެފައެވެ. ހަމައެއާއެކު އިތުރު އެހެން ގެއެއް ވެސް މި ދެ ގެއާ ދުރު ނޫން ހިސާބަކުން މަސްކު ގަނެފައިވާ ކަމަށް މި ނޫހުގައި ބުނެފައިވެއެވެ.
އެލަން މަސްކު އޭނާގެ ބައެއް ކުދިން އަދި އެ ކުދިންގެ މަންމައިންނާ އެކު--ފޮޓޯ/ ދަނިއުޔޯކްޓައިމްސް
ދުނިޔޭގެ އާބާދީ ދަށަށް ދިއުން ހުއްޓުވުމަށް ގިނަ ދަރިން ހޯދަންޖެހޭ ކަމަށް މަސްކު ބުނެފައިވާއިރު އޭނާގެ 11 ކުދިންގެ ތެރެއިން ތިން ކުދިންގެ މަންމަ ކަމަށްވާ ޝިވޮން ޒިލިސް ވަނީ މިހާރު ގަނެފައިވާ ކޮމްޕައުންޑަށް ދިރިއުޅުން ބަދަލުކޮށްފައެވެ.
ތިން އަންހެނެއްގެ ފަރާތުން މަސްކަށް ދަރިން ލިބިފައި ވާއިރު އޭގެތެރެއިން މަސްކް ގަނެފައިވާ މި ލަގްޒަރީ ކޮމްޕައުންޑުގައި ދިރިއުޅެން މިހާތަނަށް އެއްބަސްވެފައި ވަނީ ކުދިންގެ މަންމައިންގެ ތެރެއިން ދެ މީހެކެވެ.
މަސްކަށް ތިން ކުދިން ވިހާފައިވާ ކެނެޑާގެ ޕޮޕް ސްޓާ ކްލެއާ ބޫޗަ ކުދިން މަސްކާ ހަވާލުކުރުމަށް ދެކޮޅު ހެދުމާ ގުޅިގެން މި މައްސަލަ ވަނީ މިހާރު ކޯޓަށް ހުށަހަޅާފައެވެ.
މަސްކުގެ ކުންފުނި ޓެސްލާގެ ސަބަބުން މުއްސަނދި ކަމުގެ އަގު 271 ބިލިއަން އެމެރިކާ ޑޮލަރަށް އަރާއިރު މަސްކް ވަނީ ކުރިން ޓުވިޓާގެ ނަމުގައި ހިންގި ޕްލެޓްފޯމްގެ ހިއްސާ ގަނެ އޭގެ ނަން ރީބްރޭންޑް ކޮށްފައެވެ.