އެމެރިކާގެ އެންމެބޮޑު އެއް ޓެކްނޮލޮޖީ ކުންފުނި މައިކްރޯސޮފްޓްގެ ކްލައުޑް ވިޔަފާރި ދަށަށް ދާނެކަމަށް ލަފާކޮށްފިއެވެ.
މައިކްރޯސޮފްޓުން ބުނެފައިވަނީ މިއަހަރުގެ ދެވަނަ ކުއާޓާގައި އާޓިފިޝަލް އިންޓެލިޖެންސް (އޭއައި) އަށް ކުރާ ޚަރަދު އިތުރުވާނެ ކަމަށާއި، ނަމަވެސް ކުންފުނީގެ ކްލައުޑް ވިޔަފާރި އަޒޫރޭގެ ކުރިއެރުން ލަސްވާނެ ކަމަށެވެ. މިކަމުން ދައްކުވައިދެނީ އޭއައި އަށް ކުރެވޭ ބޮޑެތި އިންވެސްޓްމަންޓްތަކުން ވެސް ކުންފުނީގެ ޑޭޓާ ސެންޓަރުތަކުގެ ޤާބިލުކަމުގެ މައްސަލަތައް ޙައްލުނުކުރެވޭ ކަމެވެ.
އޮކްޓޯބަރު 30ވަނަ ދުވަހު މި ޚަބަރު ފެތުރުނު ފަހުން، ވޮޝިންގްޓަންގެ ރެޑްމަންޑްގައި ހުންނަ މި ކުންފުނީގެ ހިއްސާގެ އަގު މާރުކޭޓް ބަންދުވުމަށްފަހު 3.6 ޕަސެންޓް ދަށަށް ގޮސްފައިވެއެވެ. ނަމަވެސް ކުންފުނިން ފުރަތަމަ ކުއާޓާގެ އާމްދަނީއާއި ފައިދާ ވޯލް ސްޓްރީޓްގެ އަންދާޒާތަކަށްވުރެ މަތިވެފައިވެއެވެ.
މައިކްރޯސޮފްޓްގެ އިންވެސްޓާ ރިލޭޝަންސްގެ ވައިސް ޕްރެޒިޑެންޓް ބްރެޓް އިވާސެން ވިދާޅުވެފައިވަނީ، އޭއައި އާ ގުޅޭ ޤާބިލުކަމުގެ މައްސަލަތައް މާލީ އަހަރުގެ ދެވަނަ ބައިގައި ނޫނީ ޙައްލު ނުކުރެވޭނެ ކަމަށެވެ.
ކުންފުނިން ލަފާކޮށްފައިވާ ގޮތުގައި ދެވަނަ ކުއާޓަރުގައި އަޒޫރޭގެ އާމްދަނީ 31އިން 32 ޕަސެންޓަށް ކުރިއަރާނެއެވެ. މިއީ އެނަލިސްޓުން އަންދާޒާކުރި 32.25 ޕަސެންޓަށްވުރެ ދަށް އަދަދެކެވެ. ސެޕްޓެމްބަރު 30ގައި ނިމުނު ފުރަތަމަ ކުއާޓަރުގައި އަޒޫރޭގެ އާމްދަނީ 33 ޕަސެންޓް އިތުރުވެފައިވެއެވެ.
ފުރަތަމަ ކުއާޓަރުގައި އޭއައި އިން އަޒޫރޭގެ ކުރިއެރުމަށް 12 ޕަސެންޓް ޕޮއިންޓް ހިއްސާކޮށްފައިވާއިރު، މީގެ ކުރީ ތިން މަސްދުވަހުު މި އަދަދު ހުރީ 11 ޕަސެންޓް ޕޮއިންޓްގައެވެ.
މައިކްރޯސޮފްޓްގެ ކްލައުޑް ވިޔަފާރި، އަޒޫރޭ، އަކީ ކުންފުނީގެ އެންމެ ހަލުވިކޮށް ކުރިއަރަމުންދާ ވިޔަފާރިތަކުގެ ތެރެއިން އެއް ވިޔަފާރިއެވެ. އަޒޫރޭ އަކީ ވިޔަފާރިތަކަށާއި ޖަމްޢިއްޔާތަކަށް އިންޓަނެޓް މެދުވެރިކޮށް ކޮމްޕިއުޓިން ވަސީލަތްތަކާއި ޚިދުމަތްތައް ފޯރުކޮށްދޭ ޕްލެޓްފޯމެކެވެ. މީގެ ތެރޭގައި ޑޭޓާ ސްޓޯރޭޖް، ސާވަރުތައް، ޑޭޓާބޭސްތައް، ނެޓްވޯކިންގ، ސޮފްޓްވެއާ، އެނަލިޓިކްސް އަދި އާޓިފިޝަލް އިންޓެލިޖެންސްގެ ޚިދުމަތްތައް ހިމެނެއެވެ.
ފާއިތުވި އަހަރުތަކުގައި އަޒޫރޭ ވަނީ އެމެޒޯން ވެބް ސާވިސަސް (އޭޑަބްލިއުއެސް) އާއި ގޫގުލް ކްލައުޑާ ވާދަކޮށް، ކްލައުޑް މާކެޓުގައި މުހިންމު ދައުރެއް އަދާކުރަމުން އައިސްފައެވެ. ނަމަވެސް، ފަހަކަށް އައިސް ކްލައުޑް ވިޔަފާރީގެ ކުރިއެރުން މަޑުޖެހެމުން ދިއުމަކީ މައިކްރޯސޮފްޓަށް ކުރިމަތިވެފައިވާ ގޮންޖެހުމެކެވެ.