ކަރަންޓު ޚަރަދު ކުޑަކުރުމަށާއި ތިމާވެއްޓާ ރައްޓެހި ގޮތަކަށް ކަރަންޓު ބޭނުންކުރުމުގެ މަގުސަދުގައި "މަގޭ ސޯލާ" ޕްރޮގްރާމްގެ ދަށުން ސޯލާ ޚިދުމަތަށް އެދުމުގެ ފުރުސަތު އެނަވަޔަރަމެންޓް މިނިސްޓްރީން ހުޅުވާލައިފިއެވެ.
މި ޕްރޮގްރާމަކީ އެންވަޔަރަމެންޓް މިނިސްޓްރީން ފެނަކަ ކޯޕަރޭޝަނާ ގުޅިގެން ކުރިއަށް ގެންދާ ޕްރޮގްރާމެކެވެ.
އޭޑީބީ ފަންޑުގެ އެހީއާއެކު ހިންގާ މި ޕްރޮގްރާމުގައިި ސޯލާ ޕީވީ ސިސްޓަމް އިންސްޓޯލް ކޮށްދިނުމުގެ މަސައްކަތްތައް ކުރިއަށް ގެންދާނީ ފެނަކައިންނެވެ.
ފެނަކައިން ބުނީ ކަރަންޓުގެ ޚިދުމަތްދޭ ހުރިހާ ގޭބީސީތަކަށް ހުޅުވާލައިގެން ކުރިއަށްދާ މަގޭސޯލާ ޕްރޮގްރާމްގެ ދަށުން ދޫކުރުމަށް ހަމަޖެހިފައިވަނީ ތިން ކިލޯ ވޮޓް އާއި ފަސް ކިލޯ ވޮޓްގެ ސިސްޓަމްތައް ކަމަށެވެ.
އަދި ގޭބީސީތަކަށް ދޫކުރެވޭ ސިސްޓަމްތަކުގެ ސައިޒް ކަނޑައަޅާނީ އެ ގޭބީސީތައް ސާވޭ ކުރުމަށް ފަހުގައި ކަމަށްވެސް އެ ކޯޕަރޭޝަނުން ވަނީ ބުނެފައެވެ.
މި ޚިދުމަތަށް އެދި ހުށަހެޅުމުގެ ފުރުސަތު އިއްޔެ ހުޅުވާލާފައިވާއިރު ޚިދުމަތަށް އެދެވޭނީ މިކަމަށް ޚާއްސަ ކުރެވިފައިވާ ޕޯޓަލް މެދުވެރިކޮށް ކަމަށް ފެނަކައިން ވަނީ ބުނެފައެވެ. މި ޕްރޮގްރާމްގައި ހަރުކޮށްދޭ ސޯލާ ސިސްޓަމްތަކަށް ފައިސާ ދެއްކުމަށް ދެ ގޮތެއް ވަނީ ކަނޑައެޅިފައެވެ.
އެއީ، އެއްފަހަރާ ފައިސާ ދައްކާ ޚަލާސްކުރާ ގޮތަށް ނުވަތަ އިންސްޓޯލްމަންޓް އުސޫލުން އެއް އަހަރާއި ތިން އަހަރަށް ނުވަތަ ފަސް އަހަރަށް ބަހާލައިގެންނެވެ.
މި ޕްރޮގްރާމްގެ ދަށުން ސޯލާގެ ދޫކުރަނީ، ތިން ކިލޯވޮޓުގެ ސިސްޓަމް 45,000 ރުފިޔާއަށް އަދި ފަސް ކިލޯވޮޓު ސިސްޓަމް 75,000 ރުފިޔާއަށެވެ.
މަގޭ ސޯލާ ހަރުކުރުމަށް އިންސްޓޯލްމެންޓަށް ފައިސާ ދެއްކޭނެ --
ފެނަކައިން ބުނީ މި ޕްރޮގްރާމުގެ މަގުސަދަކީ އާއްމު ރައްޔިތުން ކަރަންޓަށް ކުރާ ހޭދަ ކުޑަކުރުމާއި، ދިވެހިރާއްޖޭގައި ލިބެންހުރި ހަކަތައިގެ ވަސީލަތްތަކުގެ ބޭނުން އިތުރުކުރުން ކަމަށެވެ.
މަގޭސޯލާ ޕްރޮގްރާމަކީ ރާއްޖޭގައި ބޭނުންކުރާ ކަރަންޓުގެ 33 އިންސައްތައަކީ އިއާދަކުރަނިވި ހަކަތައިގެ ވަސީލަތްތައް ބޭނުންކޮށްގެން އުފައްދާ ކަރަންޓަށް ހެދުމަށް ސަރުކާރުން ކަނޑައަޅާފައިވާ ލަނޑުދަނޑިއަށް ވާސިލްވުމަށް އެޅުނު މުހިއްމު ފިޔަވަޅެކެވެ.