ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ ސިއްހީ ހާލަތު ކުއްލިއަކަށް ދެރަވެ، އެމާޖެންސީގައި ފަރުވާ ދީފިއެވެ.
އަބްދުއްރަހީމަށް ފަރުވާ ދެމުން އަންނަނީ ދަރުމަވަންތަ ހޮސްޕިޓަލުގައެވެ.
އެ މަނިކުފާނަށް ފަރުވާދެމުންދާކަން މަޖިލީހުގެ މީޑިއާ އޮފިސަރުވަނީ "ސަން"އަށް ކަށަވަރުކޮށްދެއްވައިފައެވެ. އޭނާ ވިދާޅުވީ މިހާރު އަބްދުއްރަހީމްގެ ހާލުކޮޅު ސްޓޭބަލް ކަމަށެވެ.
އަބްދުއްރަހީމް ހުންނަވަނީ، ހިތުގެ ހިނގުން އެއްވަރެއްގައި ހިފެހެއްޓުމަށް ޓަކައި ޕޭސްމޭކާއެއް ލައްވައިފައެވެ.
ޕޭސްމޭކާ ލައްވަނީ ހިތުގެ ހިނގުން އެކަށީގެންވާ މިންވަރެއްގައި ނުހިފެހެއްޓޭނަމަ އެ ކަން ކޮންޓްރޯލްކޮށް، އެއްވަރެއްގައި ހިފެހެއްޓުމަށެވެ. އެއީ މޭގައި ނުވަތަ ބަނޑާ ހިސާބުގައި ހަރުކުރާ ކުޑަ އިލެކްޓްރޯނިކް ޑިވައިސެކެވެ.