ދެ މަހުގެ ޗުއްޓީއަށް ފަހު، މި އަހަރަށް ރައްޔިތުންގެ މަޖިލީސް ފަށާ ޖަލްސާ އަންނަ މަހުގެ ހަވަނަ ދުވަހު ބާއްވަން ނިންމާފައިވާ ކަމަށް ރައްޔިތުންގެ މަޖިލީހުން މިއަދު ބުނެފިއެވެ.
ރިޔާސީ ބަޔާނަކީ ގައުމުގެ ހާލަތު ބަޔާންކޮށްދީ، ހާލަތު ރަނގަޅުކުރަން ކުރަންޖެހޭ ކަމަށް ރައީސަށް ފެނިވަޑައިގަންނަވާ ކަންކަމުގެ މައްޗަށް އެކުލެވޭ ބަޔާނެކެވެ.
ރައްޔިތުންގެ މަޖިލީހުގެ އިދާރާއިން ބުނީ، މި އަހަރުގެ ފުރަތަމަ ދައުރުގެ ފުރަތަމަ ޖަލްސާ އަންނަ މަހުގެ ހަވަނަ ދުވަހު ބާއްވަން މަޖިލީހުގެ ރައީސް އަބްދުއްރަހީމް އަބްދުﷲ ނިންމަވާފައިވާ ކަމަށެވެ. އެ ދުވަހު ޖަލްސާ އޮންނާނީ ހެނދުނު 9:00 ގައެވެ.
އާ ދައުރަކަށް މަޖިލީސް ހުޅުވައި ޖަލްސާގައި ރައީސުލްޖުމްހޫރިއްޔާ ރިޔާސީ ބަޔާން އިއްވަވާނެއެވެ. މިއީ، ވިހިވަނަ މަޖިލީހުގައި ރައީސް ޑރ. މުހައްމަދު މުއިއްޒު އިއްވަވާނެ ފުރަތަމަ ރިޔާސީ ބަޔާނެވެ.
މީގެ ކުރިން ރައީސް މުއިއްޒު، އެ މަނިކުފާނުގެ ފުރަތަމަ ރިޔާސީ ބަޔާން އިއްވެވީ މިދިޔަ 19 ވަނަ މަޖިލީހުގައެވެ.
އަންނަ މަހު މަޖިލިސް ހުޅުވާއިރު، މި މަހު ދައުރުން ބޭރުން މަޖިލީހުގެ ދެ ޖަލްސާއެއް ބާއްވަން ނިންމާފައިވާ ކަމަށް މަޖިލީހުގެ މެޖޯރިޓީ ލީޑަރު އިބްރާހިމް ފަލާހް ވަނީ ވިދާޅުވެފައެވެ. އެއީ، މި މަހުގެ 16 ވަނަ ދުވަހާއި 20 ވަނަ ދުވަހެވެ.
އޭނާ ވިދާޅުވީ، ޖަލްސާތައް ބާއްވަނީ މިނިވަން މުއައްސަސާތަކަށް މިހާރު ހުސްވެފައިވާ ޖާގަތަކަށް މީހުން ނަގާށެވެ.