މިދިޔަ އޮގަސްޓު މަހަށްވުރެ ސެޕްޓެމްބަރު މަހު ވަރި މަދުވެފައިވާ ކަމަށް ފެެމެލީ ކޯޓުގެ ތަފާސްހިސާބުތަކުން ދައްކައިފިއެވެ.
އެ ކޯޓުން އާންމުކޮށްފައިވާ ތަފާސްހިސާބުތައް ދައްކާ ގޮތުން ސެޕްޓެމްބަރު މަހު 98 ވަރިއާއި 194 ކައިވެނި ވަނީ ކޮށްދީފައެވެ. މިއީ އޮގަސްޓު މަހު ވަރިވެފައިވާ 147 މީހުންނާ އަޅާ ބަލާއިރު 33 އިންސައްތައިގެ ދަށްވުމެކެވެ. ކައިވެނިކޮށްފައިވާ 186 މީހުންނާ އަޅާ ބަލާއިރު ހަތަރު އިންސައްތައިގެ އިތުރުވުމެކެވެ.
އެ ކޯޓުން ވަނީ ސެޕްޓެމްބަރު މަހު ޖުމްލަ ވަރީގެ 138 މައްސަލައެއް ނިންމާފައެވެ.
އޭގެ ތެރޭގައި ހިމެނެނީ ވަރިވުމަށް އެދި ހުށަހެޅުނު 67 މައްސަލައަކާއި ވަރިކުރަން އެދި ހުށަހެޅުނު 24 މައްސަލައަކާއި ވަރި ސާބިތުކުރުމަށް އެދި ހުށަހަޅާފައިވާ 43 މައްސަލައެއްގެ އިތުރުން ވަރިއާ މެދު ޝައްކު އުފެދުމުން ހުށަހެޅި ހަތަރު މައްސަލައެކެވެ.
މިދިޔަ މަހު އެ ކޯޓަށް ހުށަހެޅި މައްސަލަތަކުގެ ތެރޭގައި އާއިލީ މައްސަލަތަކާއި ގެވެށި އަނިޔާގެ މައްސަލަތަކާއި ޚަރަދުގެ މައްސަލަތަކުގެ އިތުރުން ކުޑަކުދީންނާ ގުޅޫންހުރި މައްސަލަތައް ހިމެނެއެވެ.
އެ ކޯޓުން ވަނީ އާއިލީ 19 މައްސަލައަކާއި ކުޑަކުދިންނާ ގުޅުންހުރި 11 މައްސަލައަކާއި ޚަރަދުގެ 19 މައްސަލައްކާއި ގެވެށިއަނިޔާއާ ގުޅުންހުރި 11 މައްސަލައެއް ނިންމާފައެވެ. ވަރީގެ 138 މައްސަލައާ އެކު އެ ކޯޓުން ވަނީ ޖުމްލަ 198 މައްސަލައެއް ނިންމާފައެވެ.
މިއީ އެ ކޯޓުން އޮގަސްޓު މަހު ނިންމި ޖުމްލަ 237 މައްސަލައާ އަޅާބަލާއިރު 16 އިންސައްތައިގެ ދަށްވުމެކެވެ.