އިސްރާއީލާއި ހިފާފައިވާ އިރުމަތީ ގުދުސްގައި ފަލަސްތީނުގެ ރެފިއުޖީ އެޖެންސީ (އުންރުވާ) ހިންގުން މަނާކުރާ ގާނޫނެއް ތިން މަސް ދުވަހުގެ ތެރޭގައި ފާސްކުރުމަށް އިސްރާއީލުގެ ގާނޫނު ހަދާ މަޖިލީހުން ވޯޓު ދީފިއެވެ.
އެ ގާނޫނުގައި އުންރުވާގެ މުވައްޒަފުންނާއި އިސްރާއީލުގެ އޮފިޝަލުންނާ މުއާމަލާތްކުރުން ވަނީ މަނާކޮށްފައެވެ.
އިސްރާއީލުގެ ގާނޫނު ހަދާ މަޖިލީސް، ދަ ނެސެޓް އިން އެ ދެ ބިލް ފާސްކުރީ ހޯމަ ދުވަހު މަޖިލީހުގެ ބޮޑު އަޣުލަބިއްޔަތަކުންނެވެ.
އެ ގާނޫނު ހުށަހަޅުއްވަމުން ނެސެޓްގެ ޚާރިޖީ ކަންކަމާއި ސަލާމަތީ ކޮމިޓީގެ ޗެއާމަން ޔޫލީ އެޑެލްސްޓައިން ވަނީ އުންރުވާ އަކީ ޓެރަރިސްޓް އަމަލުތަކުގެ ނިވާފަތްގަޑެއްގެ ގޮތުގައި ބޭނުންކުރާ ޖަމާއަތެއް ކަމަށް ތުހުމަތު ކުރައްވާފައެވެ.
ގާނޫނާއެކު އުންރުވާއިން ޣައްޒާއަށް އެހީ ފޯރުކޮށްދިނުމަށް ވަރަށް ބޮޑަށް ދަތިވެގެން ދާނެއެވެ. ޣައްޒާއަށް އެހީ ފޯރުކޮށްދިނުމުގައި އިސްރާއީލުގެ އަސްކަރިއްޔާގެ އެއްބާރުލުން ލިބުމަކީ އުންރުވާއަށް ކޮންމެހެން ބޭނުންވާ ކަމެކެވެ.
އެގޮތަށް ގާނޫނު ފާސްކޮށްފިނަމަ، އިސްރާއީލުގެ އެތެރޭގައި އުންރުވާގެ މުވައްޒަފުންނަށް ހަރަކާތަތްރިއެއް ނުވެވޭނެއެވެ. އަދި އިރުމަތީ ގުދުސްގައި ހުންނަ އެ އިދާރާގެ މައި އޮފީސް ވެސް ބަންދުކުރަން ޖެހޭނެއެވެ.
އެމެރިކާ، އިނގިރޭސިވިލާތް އަދި ޖަރުމަނުވިލާތް ފަދަ ގިނަ ގައުމުތަކުން ވަނީ އެ ފިޔަވަޅާ ގުޅިގެން ވަރަށް ބޮޑަށް ކަންބޮޑުވުން ފާޅުކޮށްފައެވެ. އިނގިރޭސިވިލާތުގެ ފޮރިން ސެކްރެޓަރީ ޑޭވިޑް ލަމީ އެއީ "މުޅިން ގޯސް ކަމެއް" ކަމަށް ވިދާޅުވެފައިވާއިރު، އުންރުވާގެ ވެރިޔާ ފިލިޕް ލަޒާރީނީ ވިދާޅުވީ މިއީ "ފަލަސްތީނުގެ މީހުންގެ ތަކުލީފު އިތުރުވެގެންދާނެ ކަމެއް" ކަމަށެވެ.
އެމެރިކާގެ ސްޓޭޓް ޑިޕާޓްމަންޓުން ބުނީ ޣައްޒާގައި އިންސާނީ އެހީ ފޯރުކޮށްދިނުމުގައި އުންރުވާގެ ދައުރު "މުހިންމު" ކަމަށެވެ. ދެ މިލިއަނަށްވުރެ ގިނަ މީހުން ދިރިއުޅޭ ގާތްޑަނގަކަށް ޣައްޒާގެ މުޅި އާބާދީ ބަރޯސާވެފައިވަނީ އެ އިދާރާގެ އެހީތަކާއި ޚިދުމަތްތަކަށެވެ.
އެކަމާ ގުޅިގެން އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވީ އިސްރާއީލާ ދެކޮޅަށް ޓެރަރިސްޓް ހަރަކާތްތަކުގައި ބައިވެރިވާ އުންރުވާގެ މަސައްކަތްތެރިން ޖަވާބުދާރީވާން ޖެހޭ ކަމަށާއި ނަމަވެސް ގާޒާގައި ދެމެހެއްޓެނިވި އިންސާނީ އެހީ ލިބެން ޖެހޭ ކަމަށެވެ.
އިސްރާއީލުން އުންރުވާއާ ދެކޮޅުވެރިވެގެން އުޅޭތާ އެތައް އަހަރެއްވެފައިވާއިރު، މިދިޔަ އަހަރު އޮކްޓޫބަރު ހަތް ވަނަ ދުވަހު ހަމާސްއިން އިސްރާއީލަށް ދިން ހަމަލާ ދިނުމުގެ ހަމާސްއާއެކު އުންރުވާގެ 19 މުވައްޒަފަކު ބައިވެރިވެފައިވާ ކަމަށްވެސް އިސްރާއީލުން ބުނެފައިވެއެވެ.
ވޭތުވެދިޔަ ދުވަސްތަކުގައި އުންރުވާއިން ވަނީ ޣައްޒާގައި ތިބި ފަލަސްތީނުގެ އެތައް މިލިއަން ބަޔަކަށް ސިއްޚީ ފަރުވާ އާއި ތައުލީމު ހިމެނޭ ގޮތަށް ގިނަ ޚިދުމަތްތަކާއި އެހީތެރިކަން ފޯރުކޮށްދީފައެވެ.
އިސްރާއީލުން ހިފާފައިވާ ހުޅަނގު އައްސޭރީގައާއި، އިރުމަތީ ގުދުސް އާއި ޣައްޒާ ހިމެނޭ ސަރަހައްދުގައި ގާތްގަނޑަކަށް ދެ މިލިއަނަށްވުރެ ގިނަ މީހުން އުންރުވާގައި ރަޖިސްޓްރީކޮށްފައިވެއެވެ.
އިސްރާއީލުން ޣައްޒާއަށްދޭ ހަމަލާތަކުގައި މިހާތަނަށް 42،710 މީހުން ވަނީ ޝަހީދުކޮށްލާފައެވެ.