މާލޭ އާ ސަހަރާގެ ވަށަފާރު ބާވުމުން އެ ފާރު ތަޅާލުމުގެ މަސައްކަތް ކުރަމުން އަންނަ ކަމަށް މާލެ ސިޓީ ކައުންސިލުން މިރޭ ބުނެފިއެވެ.
އެ ކައުންސިލުން އެކްސްގައި މިރޭ ކުރި ޕޯސްޓެއްގައި ވަނީ، އާ ސަހަރާގެ ވެއްޓެން ކައިރިވެފައި ހުރި ވަށާ ފާރު ތަޅާލުމުގެ މަސައްކަތް ކުރަމުން އަންނަ ކަމަށެވެ. އެ ފާރު އަލުން ނަގާ ސާފުތާހިރު ތަނަކަށް ހެދުމުގެ މަސައްކަތް ކުރަމުން އަންނަ ކަމަށް އެ ކައުންސިލުން ބުނެފައިވެއެވެ.
އެ ކައުންސިލުން ބުނީ، އެ ފާރު ތަޅާލައި، ވަށާ ފާރު ނެގުމުން އެ ސަހަރާގެ ގަބުރުސްތާނު ބޭރަށް ހުޅުވިފައި އޮންނަ ތަނަކަށް ވާނެ ކަމަށެވެ.
އެތަނުގެ މަސައްކަތްތައް ކުރިއަށްދާ ގޮތް ބަލައިލުމަށް މާލޭ ސިޓީގެ މޭޔަރު އާދަމް އާޒިމް ވަނީ މިއަދު އެ ސަހަރާއަށް ޒިޔާރާތްކުރައްވާފައެވެ.
އާސަހަރާގެ މަސައްކަތް ބައްލަވައިލެއްވުމަށް މޭޔަރު އެ ސަހަރާގައި މަޑުކޮށްލައިގެން: އާ ސަހަރާގެ ވަށާފާރު ބާވެ، އެ ފާރު ތަޅާލަނީ --- ފޮޓޯ/ މާލެ ސިޓީ ކައުންސިލް
އެ ސަހަރާގެ ވަށާފާރުގެ އެކި ތަންތަނުގައި މިހާރު ވެސް ހުރީ ރެނދުލާފައެވެ.
މާލޭގައި މަރުވާ މީހުން ވަޅުލާ އާ ސަހަރާ ޒަމާނީ ފެންވަރަށް ތަރައްގީ ކުރުމަށް ބަންދު ކުރުމަށް ފަހު، އެ ސަހަރާ އަލުން ހުޅުވާ ފައި ވަނީ މިމަހުގެ ހަތަރު ވަނަ ދުވަހެވެ.
މީގެ ކުރިން އެ ކައުންސިލުން ބުނެފައި ވަނީ އާސަހަރާގެ މަރާމާތުގެ މަސައްކަތުގެ ދަށުން އާސަހަރާ 3200 އަކަފޫޓަށް ބޮޑުކުރެވި މި މަޝްރޫއަށް 11.6 މިލިއަން ރުފިޔާ ހޭދަވި ކަމަށެވެ.
އެ ސަހަރާ އަލުން ހުޅުވީ، ފުރަތަމަ ފްލޯގައި އަންހެނުންނަށް ޚާއްސަ ނަމާދުކުރާ ޖާގައެއް ހުރެއެވެ. އަދި، ސަހަރާއަށް އެމްބިއުލާންސް ވަނުން ސަހަރާގެ ފަހަތު ގޭޓަށް ވަނީ ބަދަލުކޮށްފައެވެ.
އޭގެ އިތުރުން، ދޮޅިދާންގޭގެ މައްޗަށް 35 މީހުންގެ ޖާގައިގެ ވީއަޕީ ފެންވަރުގެ ތިން ލައުންޖެއް ތަރައްގީކޮށްފައިވާއިރު ކޮންމެ ލައުންޖެއްގައި ދެ ފާޚާނާއާއި ގާތުންދޭ މައިންނަށް ޚާއްސަ ޖާގަ ހުރުމުގެ އިތުރުން ޚާއްސަ އެހީއަށް ބޭނުންވާ މީހުންނަށް ބޭނުންކުރެވޭ ފަދަ ފާޚާނާއެއް އެ ތަނުގައި މިހާރު ވަނީ ތަރައްގީކޮށްފައެވެ.