މި މަހު އާންމުކުރާނެކަން ހައުސިން މިނިސްޓްރީން އިއުލާނުކުުރި ގެދޮރުވެރިންގެ ފްލެޓް ލިސްޓު މި މަހު ވެސް އާންމު ނުކުރެވޭނެ ކަމަށާއި އިތުރު ވަގުތު ބޭނުންވާތީ ދެން އެ ކަން ވާނީ އަންނަ މަހުކަމަށް އެ މިނިސްޓްރީން މިއަދު ބުނެފިއެވެ.
އެ މިނިސްޓްރީން އެހެން ބުނީ މިއަދު އާންމު ކުރި ނޫސް ބަޔާނެއްގައެވެ.
ކުރީ ސަރުކާރުން ކުރިއަށްގެންދިޔަ ގެދޮރުވެރިޔާ މަޝްރޫއުގެ ދަށުން ފުރަތަމަ 4،000 ފުލެޓު ލިބޭ މީހުންގެ ވަގުތީ ލިސްޓެއް ކުރިން އޮތީ އާންމުކޮށްފައެވެ. މިހާރު ވެސް ފަހިދިރިއުޅުން ކޯޕަރޭޝަނުން އަންނަނީ ފްލެޓްތައް ތަރައްގީކުރުމުގެ މަސައްކަތް ކުރަމުންނެވެ.
ނމި ފުލެޓުތައް ދޫކުރުމުގެ މަސައްކަތް ލަސްވާތީ ގިނަ ބަޔަކު އަންނަނީ ނުރުހުން ފާޅުކުރަމުން އަންނައިރު އެކަމަށް އެކި އިހުތިޖާޖުތައް ވެސް އަންނަނީ ބާއްވަމުންނެވެ.
ފުލެޓުތައް ދޫކުރުމުގައި މައްސަލަ އުޅޭ ކަމަށް ބުނެ، އެންޓި ކޮރަޕްޝަން ކޮމިޝަން (އޭސީސީ)ން ފެށި ޖިނާއީ ތަހުގީގާ ގުޅިގެން ގިނަ ދުވަސްތަކެއް ވަންދެން ފުލެޓު ދޫކުރުން މަޑު ޖެހިފައި އޮތުމަށް ފަހު ފެބްރުއަރީ މަހު އޭސީސީން ވަނީ ބައެއް ކަންތައްތަކަށް ރިއާޔަތްކުރުމަށް ފަހު ފުލެޓު ދޫކުރުމުގެ މަސައްކަތް ކުރިއަށް ގެންދަން ހުއްދަ ދީފައެވެ.
ނަމަވެސް އޭގެ ފަހުން ހަތް ވަރަކަށް މަސްވީއިރު އަދިވެސް ހައުސިން މިނިސްޓްރީން ގެންދަނީ އެ ލިސްޓު ރިވިއުކުރަމުންނެވެ. މީގެ ކުރިން އެ މިނިސްޓްރީން ބުނީ އޮކްޓޯބަރު މަހު ފުލެޓު ލިސްޓު އާންމުކުރާނެ ކަމަށެވެ.
ނަމަވެސް މިހާރު އެ މިނިސްޓްރީން ބުނި ގޮތުގައި ރައީސް އެކުލަވައިލެއްވި ހައުސިން އެޑްވައިޒަރީ ކޮމިޓީއާއި، މާލޭ ސިޓީ ކައުންސިލުގެ ހައުސިން ކޮންސަލްޓޭޓިވް ކޮމިޓީއަށް ވެސް ލިސްޓުތަކުގައި މައްސަލަ އުޅޭކަމަށް ފެންނާތީ، ހުރިހާ އެޕްލިކޭޝަން ފޯމުުތައް އަންނަނީ އަލުން ބަލަމުންނެވެ.
އެކަމަށް އިތުރު ވަގުތު ބޭނުންވާ ކަމަށާއި އެހެންކަމުން ދެން ފްލެޓް ލިބޭ މީހުންގެ ވަގުތީ ލިސްޓު އާންމުކުރެވޭތޯ މަސައްކަތް ކުރަމުން އަންނަނީ މި ފެށޭ މަހުގެ ދެވަނަ ހަފްތާގެ ނިޔަލަށްކަމަށް މިނިސްޓްރީން ބުންޏެވެ.