އިސްރާއީލުން ފަލަސްތީނުގެ ޣައްޒާގައި ކުރަމުންދާ ހަނގުރާމަ ދެ ދުވަހަށް މެދުކަނޑާލުމަށް މިސްރުން ހުށަހަޅައިފިއެވެ.
އެ ދެ ދުވަހުގެ ތެރޭގައި ހަމާސްއިން ރަހީނުކޮށްފައިވާ އިސްރާއީލުގެ ހަތަރު ރަހީނުން މިނިވަކުރުމަށާއި ބަދަލުގައި އިސްރާއީލުގެ ޖަލުތަކުގައި ތިބި ފަލަސްތީނުގެ ބައެއް ގައިދީން މިނިވަން ކުރުމަށް މިސްރުން ހުށަހަޅާފައިވެއެވެ.
މިސްރުގެ ރައީސް އަބްދުލް ފައްތާހު އަލް ސީސީ އެކަން އިއުލާން ކުރެއްވީ ސީއައިއޭ އާއި އިސްރާއީލުގެ ޖާސޫސީ އިދާރާ، މޮސާދުގެ ޑިރެކްޓަރުން ބައިވެރިވެގެން ގަތަރުގައި ކުރިއަށްގެންދާ ހަނގުރާމަ ހުއްޓާލުމުގެ މަޝްވަރާތަކުގެ ބައްދަލުވުމުގައެވެ.
މިސްރާއި، އެމެރިކާ އަދި ގަތަރު ގުޅިގެން އެ މަޝްވަރާތައް ކުރިއަށް ގެންދާތާ އަހަރަކަށްވުރެ ގިނަ ދުވަސްވެއްޖެއެވެ. ހަނގުރާމަ ދެ ދުވަހަށް މެދުކަނޑާލުމުގެ މަޝްވަރާތައް 10 ދުވަހުގެ ތެރޭގައި ފަށަން ޖެހޭނެ ކަމަށް ވެސް ސީސީ ވިދާޅުވިއެވެ.
އެ ހުށަހެޅުމަށް އިސްރާއީލުން އަދި ހަމާސްއިން ވެސް އެއްޗެއް ބުނެފައެވެނުވެއެވެ.
ހަމާސް ނައްތާނުލުވެނީސް ހަނގުރާމަ ހުއްޓާނުލާނެ ކަމަށް އިސްރާއީލުން މީގެކުރިންވެސް ވަނީ ބުނެފައެވެ.
މިދިޔަ އަހަރުގެ އޮކްޓޫބަރު ހަތްވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންގެންދާ ހަމަލާތަކުގައި މިހާތަނަށް ޝަހީދުކޮށްލި މީހުންގެ އަދަދު 43،000 އާއި ގާތްކުރާއިރު، އެތައް ބަޔަކު ވަނީ ޒަޚަމްކޮށްލާފައެވެ.
އިސްރާއީލުން މިހާރު އެންމެ ވަރުގަދަޔަށް ހަމަލާ ދެމުން ދަނީ ޣައްޒާގެ އުތުރަށެވެ.
އދ.އިން ބުނީ ޣައްޒާގެ އުތުރުގައި ތިބި ފަލަސްތީނުގެ އާންމުންގެ ހާލަތަކީ ކެތް ނުކުރެވޭނެ ހާލަތެއް ކަމަށާއި އެ ހަމަނުޖެހުން ކުރިއަށް ގެންދަނީ ބައިނަލްއަގްވާމީ އިންސާނީ ގާނޫނުގެ ޝަރުތުތަކަށް މާބޮޑު ފަރުވާލެއް ނުބަހައްޓާ ކަމަށެވެ.
ކާބޯތަކެއްޗާއި ބޭހާއި، ކޮންމެހެން ބޭނުންވާ ސާމާނު ފޯރުކޮށްދިނުމަށް ކުރާ މަސައްކަތަށް އިސްރާއީލުގެ ކަމާބެހޭ ފަރާތްތަކުން ހުރަސް އަޅަމުންދާތީ، މީހުންގެ ފުރާނަ ނުރައްކަލަށް ހުށަހެޅިފައިވާ ކަމަށް އަދ.އިން ބުނެއެވެ.
ޣައްޒާގެ އުތުރުގައި ހުންނަ ޖަބަލިއާ ރެފިއުޖީ ކޭމްޕަށް އާދީއްތަ ދުވަހު ދިން ހަމަލާއެއްގައި 20 މީހުން މަރުވެފައިވާއިރު، އެ ކޭމްޕަށް އިސްރާއީލުން ހަމަލާދޭތާ ތިން ހަފްތާ ވެއްޖެ ކަމަށް މީޑިއާ ރިޕޯޓުތައް ބުނެއެވެ.
ޣައްޒާ ސިޓީގެ ޝާތީ ކޭމްޕްގައި ގެދޮރު ގެއްލިފައިވާ ފަލަސްތީނުގެ އާއިލާތަކަށް ހިޔާވަހިކަން ދީފައިވާ ސްކޫލަކަށް އިސްރާއީލުން އިއްޔެ ދިން އިތުރު ވައިގެ ހަމަލާއެއްގައި ނުވަ މީހަކު މަރުވެ 20 މީހަކު ޒަޚަމްވެފައިވާކަމަށް ވެސް ރޮއިޓާސްއިން ރިޕޯޓުކޮށްފައިވެއެވެ.
ޣައްޒާގެ އުތުރުގެ ޖަބަލިއާ، ބެއިތް ހަނޫން އަދި ބެއިތް ލަހިއްޔާއަށް ތިން ހަފްތާ ވަންދެން އިސްރާއީލުން ދިން ހަމަލާތަކުގައި މިހާތަނަށް ގާތްގަނޑަކަށް 800 މީހުން ޝަހީދުކޮށްލާފައިވާ ކަމަށް ޣައްޒާގެ ސިއްހަތާބެހޭ ވުޒާރާއިން ހާމަކުރެއެވެ.