ކުރިއަށް އޮތް ފަސް އަހަރަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސަޓެލްކޯ)އިން ހާސިލްކުރަން ބޭނުންވާ ލަނޑުދަނޑިތައް ހިމަނައިގެން ކަނޑައަޅާފައިވާ ސްޓްރެޓީޖިކް އެކްޝަން ޕްލޭން މިއަދު އިފުތިތާހުކޮށްފިއެވެ.
ސްޓެލްކޯގައި ބޭއްވި ރަސްމިއްޔާތެއްގައި މި ޕްލޭން އިފުތިތާހުކޮށްދެއްވީ ސްޓެލްކޯގެ މެނޭޖިންގް ޑިރެކްޓަރު، ހުސައިން ފަހުމީއެވެ.
މި ޕްލޭން އެކުލަވާލުމުގެ މަސައްކަތް ކޮށްފައިވަނީ ކުންފުނީގެ އެކި ދާއިރާތަކުގެ ޓެކްނިކަލް އަދި މެނޭޖިރިއަލް މުވައްޒަފުން ހިމަނައިގެން އެކުލަވާލި ޓީމަކުންނެވެ. ސްޓެލްކޯއިން ބުނީ މިއީ، ރައީސް ޑރ. މުހައްމަދު މުއިއްޒު ގައުމަށާއި ޔުޓިލިޓީ ޚިދުމަތްތަކުގެ ސިނާއަތްތަކަށް ކަނޑައަޅުއްވާފައިވާ ހަރުދަނާ ސިޔާސަތުތަކާ އެއްގޮތްވާގޮތުގެ މަތިން އެކުލަވާލާފައިވާ އެކްޝަން ޕްލޭނެއްކަމަށެވެ.
ސްޓެލްކޯގެ ސްޓްރެޓީޖިކް އެކްޝަން ޕްލޭން އިފުތިތާހުކުރުމުގެ ހަފުލާ -- ފޮޓޯ/ ސްޓެލްކޯ
މި ޕްލޭން އެކުލަވާލުމުގައި އަސާސްތަކެއްގެ ގޮތުގައި ބަލާފައިވަނީ ޚިދުމަތުގެ ކުރިއެރުމާއި، ދެމެހެއްޓެނިވިކަން ކަށަވަރުކުރުމާއިއެކު، ރައްޔިތުންގެ އިތުބާރާއި ޔަޤީންކަން ކަށަވަރު ކުރުން ކަމަށް ސްޓެލްކޯއިން ބުންޏެވެ.
މި އެކްޝަން ޕްލޭންގައި އެކުލަވާލެވިފައިވާ ފްރޭމްވޯކްގައި ކަނޑައަޅާފައިވާ ކަންކަން:
- ފަސް ސްޓްރެޓިޖިކް އޮބްޖެކްޓިވް
- 19 ސްޓްރެޓިޖިކް ގޯލް
- 55 ޓާގެޓް
- 96 އެކްޝަން
ސްޓްރެޓިޖިކް އެކްޝަން ޕްލޭންގައި ކޮންމެ ޑިޕާޓްމަންޓަކަށް ވެސް ހާސިލްކުރަން ޖެހޭ ލަނޑިދަނޑިތަކެއް ކަނޑައެޅިފައިވެއެވެ. އަދި މި ލަނޑިދަނޑިތައް ހާސިލްކުރެވޭ މިންވަރު މޮނިޓާކުރެވޭނެ ނިޒާމެއް ވެސް ގާއިމްކުރެވިފައިވެއެވެ.
މި އެކްޝަން ޕްލޭނާ ގުޅިގެން ފަހުމީ ވިދާޅުވީ، ޒަމާނީ ވިސްނުމާއިއެކު ތައުލީމީ ޒުވާނުން ތައްޔާރުކުރި އެކްޝަން ޕްލޭނަކީ މުސްތަގުބަލު ކަނޑައެޅުމުގެ ހަރުދަނާ ބިންގަލެއް ކަމަށެވެ.
ސްޓެލްކޯގެ ސްޓްރެޓީޖިކް އެކްޝަން ޕްލޭން އިފުތިތާހުކުރުމުގެ ހަފުލާ -- ފޮޓޯ/ ސްޓެލްކޯ
"މިފަދަ ޕްލޭނެއް އޮތުމުން ކުންފުނި ހިންގުމަށް އިތުރަށް ފަސޭހަވެ، ކުންފުނީގެ ހުރިހާ ދާއިރާއަކުން ވެސް އެއް އަމާޒަކަށް މަސައްކަތްކުރެވި، ހިންގުން ހަރުދަނާކުރެވި، ކުންފުނީގެ މާލިއްޔާއިން ކުރެވޭ ޚަރަދުތަކަކީ ކުންފުނިން އެކަށައަޅާފައިވާ ލަނޑުދަނޑިތަކަށް ވާޞިލްވުމަށް މަގުފަހިވެގެންދާ ގޮތަށް ކުރެވޭ ޚަރަދުތަކެއް ކަމުގައި ވެގެންދާނެ" އޭނާ ވިދާޅުވިއެވެ.
މީގެ އިތުރުން، މިފަދަ އެކްޝަން ޕްލޭނެއްގެ ސަބަބުން، ކުންފުނިން ފޯރުކޮށްދޭ ޚިދުމަތްތަކުގެ ފެންވަރު މަތި ކުރެވި، ރައްޔިތުންނާ ކުންފުންޏާ ދެމުދު އޮންނަ އިތުބާރާއި ގުޅުން އިތުރަށް ރަނގަޅު ކުރެވޭނެ ކަމަށް ގާބޫލުކުރައްވާ ކަމަށް ވެސް ފަހުމީ ވިދާޅުވިއެވެ.