ކޮމަންވެލްތު ގައުމުތަކުގެ އިސްވެރިންގެ 27 ވަނަ ބައްދަލުވުމުގެ ހަވާސާގެ ތެރެއިން އިނގިރޭސިވިލާތުގެ ރަސްގެފާނު ޗާލްސް (ތިނެއް) ދެއްވެވި ރޭގަނޑުގެ ފަރިއްކޮޅެއްގެ ތެރެއިން ނައިބު ރައީސް ހުސައިން މުޙައްމަދު ލަތީފް ރަސްގެފާނާ ބައްދަލުކުރައްވައި ރާއްޖެ ވަޑައިގަތުމަށް ދައުވަތު އަރުވައިފިއެވެ.
ނައިބު ރައީސް އެކްސްގައި ކުރެއްވި ޕޯސްޓެއްގައިވަނީ ރަސްގެފާނާ ބައްދަލުވުމަކީ ލިބުނު ޝަރަފެއްކަމަށް ވިދާޅުވެފައެވެ.
އެއާއެކު ރައީސް ޑރ. މުޙައްމަދު މުއިއްޒުގެ ފަރާތްޕުޅުން، ރާއްޖެއަށް ވަޑައިގަތުމަށް ރަސްގެފާނަށް ދައުވަތު އަރުވައިފައިވާކަމަށް ވިދާޅުވިއެވެ.
އިނގިރޭސިވިލާތުގެ ރަސްކަންކުރެއްވި ބޭފުޅަކު އެންމެ ފުރަތަމަ އަދި މިހާތަނަށް ކުރެއްވި ހަމައެކަނި ދަތުރުފުޅު ރާއްޖެއަށް ކުރެއްވީ ޗާލްސްގެ މަންމާފުޅު ރާނީ އެލިޒަބަތު ދޭކެވެ. ރާނީ އެލިޒަބަތު ރާއްޖެ ވަޑައިގަތީ 1972ވަނަ އަހަރެވެ. އެއީ މީގެ 52 އަހަރު ކުރިއެވެ.
ސަމޯއާގައި މިހާރު ކުރިއަށްދާ ކޮމަންވެލްތު ގައުމުތަކުގެ އިސްވެރިންގެ 27 ވަނަ ބައްދަލުވުމުގައި ކޮމަންވެލްތު ގައުމުތަކުގެ އިސްވެރިން ބައިވެރިވެވަޑައިގެންފައިވެއެވެ.
ކޮމަންވެލްތުގެ އެންމެ އިސްވެރިޔާ، އިނގިރޭސިވިލާތުގެ ރަސްގެފާނު ޗާލްސެވެ.
ކޮމަންވެލްތު ގައުމުތަކުގެ އިސްވެރިންގެ ބައްދަލުވުން ބާއްވަނީ ކޮންމެ ދެ އަހަރަކުން އެއްއަހަރުއެވެ. ބައްދަލުވުން ބާއްވަނީ މެންބަރު ގަައުމުތަކުގެ ތެރެއިން އެކި ފަހަރު އެކި ގައުމުގައެވެ.