ބަރަބޮލަކީ ކެއުމުގައި އާންމުކޮށް ބޭނުންކުރާ ބާވަތެކެވެ. އެ ތައްޔާރުކުރާއިރު އޭގެ އޮށަށް މާ ބޮޑު ސަމާލުކަމެއް ނުދެވެއެވެ. އެކަމަކު، އެއީ އެއް ގޮތަކަށް ވެސް އުކާލަން ރަނގަޅު އެއްޗެއް ނޫނެވެ. އެ ވިސްނުން ހުރި ނަމަ ތިޔަ ވިސްނުން ވެސް ދޫކޮށްލާށެވެ.
ބަރަބޯ އޮށަކީ އޭގައި ވަރަށް ގިނަ ސިއްހީ ފައިދާތައް އެކުލެވޭ އެއްޗެކެވެ. ބަރަބޯ މީރު މީހަކަށް ބަރަބޯ އޮށަކީ ވެސް މީރު އެއްޗަކަށްވާނެ ކަމާމެދު ސުވާލެއް ނުއުފެދޭއިރު ދެން ފަހަރަކުން އޭގެ އޮށްތައް އުކާލުމުގެ ބަދަލުގައި ރައްކާކުރުމަށް ސަމާލުކަން ދޭށެވެ.
މިއީ އޭގެ ސައިޒުން ކިތަންމެ ކުޑަ އެއްޗަކަށްވީ ނަމަވެސް މަދު މިންވަރެއްގައި ސިއްހަތަށް ފައިދާހުރި ސަރުބީއާއި މެގްނީސިއަން އަދި ޒިންކް ހިމެނޭ އެއްޗެކެވެ.
ބަރަބޯ އޮށް އަޅައިގެން ތައްޔާރުކުރެވިފައިވާ ސެލެޑެއް--ފޮޓޯ/އައިސްޓޮކްފޮޓޯ
މެކްސިކަން ބަހުން 'ޕެޕީތާސް'ގެ ނަމުން މަޝްހޫރު ބަރަބޯ އޮށްތަކުގައި ފައިބާ، ކޮޕާ، ފޮސްފަރަސް، ޕްރޮޓީން އަދި ހަށިގަނޑަށް ބޭނުންވާ ދަގަނޑުގެ ބާވަތް ހިމެނެއެވެ. މީގެ އިތުރުން ހަށިގަނޑަށް ބޭނުންވާ އެންޓިއޮކްސިޑެންޓްސް އަދި ކޮންމެ ވެސް ވަރަކަށް ޕޮޓޭސިއަމް ވެސް ބަރަބޯ އޮށުގައި ހުރެއެވެ.
ހައިރާންވާ ކަމަކީ ބަރަބީ އޮށަކީ ކެލޮރީސް މަދު އެއްޗަކަށްވުމުން ސްނެކްއެއް ގޮތުގައި ވެސް ކާން ރަނގަޅު އެއްޗަކަށް ވުމެވެ. ބަރަބޯ އޮށުގައި ހުންނަ އެންޓިއޮކްސިޑެންޓްސްގެ އެހީގައި ހަށިގަނޑުގެ އިންފްލެމޭޝަން ދަށްކޮށްދިނުމަށް އެހީތެރިވެދޭ އިރު ބައެއް ބާވަތްތަކުގެ ކެންސަރުން ވެސް ރައްކާތެރިކަން ހޯދައިދިނުމަށް މި އޮށް އެހީތެރިވެދެއެވެ.
ބަރަބޯ އޮށަކީ ސާފުކުރުމަށްފަހު ހަނާކޮށްލައިގެން ސްނެކްއެއް ގޮތަށް ކެވިދާނެ--ފޮޓޯ/ހެލްތީގްރީންކިޗެން
އޭގެ ތެރޭގައި އުރަމަތީގެ ކެންސަރު ވެސް ހިމެނެއެވެ. އާދަވެގެން ކޮންމެ ދުވަހަކު ބަރަބޯ އޮށް ކާނަމަ ކާއެއްޗެހި ފަސޭހައިން ހަޖަމުވެ, ބަނޑު ހަރުވުން ހުއްޓުވައިދިނުމަށް އެހީތެރިވެދީ ހަޖަމުގެ އެކި މައްސަލަތަކުން ދުރުކޮށްދެއެވެ.
މީގައި ގިނަ އަދަދަކަށް ފައިބާ އެކުލެވޭތީ ހިތުގެ ބަލިތަކުންނާއި ހަކުރު ބަލިން މީހާ ރައްކާތެރިކޮށްދިނުމަށް އެހީތެރިވެދެއެވެ. ހަމައެއާ އެކު މިއީ ރޭގަނޑުގެ ނިދި ފަސޭހައިން ލިބުމަށް ވެސް އެހީތެރިވެދޭ އެއްޗެކެވެ.
ބަރަބޯ އޮށްތައް ކެއުމުގައި ހިމަނާލަން ބޭނުންވާ ނަމަ ހެނދުނުގެ ނާސްތާއަށް ތައްޔާރުކުރާ އޯޓްސްއާ އެއްކޮށް ކެވިދާނެއެވެ. ޔޯގަޓް ތަށި އަދި ސްމޫތީސް ކަހަލަ އެއްޗަކާ އެކު ނުވަތަ ސެލެޑަކާ އެއްކޮށް ވެސް ކެވިދާނެއެވެ.