އައިލެންޑް އޭވިއޭޝަން ސާވިސް (އައިއޭއެސް)ގެ ޑެޕިއުޓީ މެނޭޖިން ޑިރެކްޓަރު (ޑީއެމްޑީ)ގެ މަގާމުގައި ހުންނެވި އައިޝަތު ޖެނީފާ މަގާމުން ވަކިކުރީ ގޯސްކޮށް ކަމަށް ނިންމާ އޭނާއަށް ވަޒީފާއާއި، މާލީގޮތުން ލިބުނު ގެއްލުމުގެ ބަދަލު ނަގައިދިނުމަށް ވަޒީފާއާ ބެހޭ ޓްރައިބިއުނަލުން އައިއޭއެސްއަށް އަންގައިފިއެވެ.
ޖެނީފާ އެ މާގަމަށް އައްޔަން ކުރީ، 25 ޑިސެންބަރު 2018ގައެވެ. ނަމަވެސް، 28 ޑިސެންބަރު 2023ގައި ބޭއްވި ކުންފުނީގެ ބޯޑު ބައްދަލުވުމަކުން އޭނާ ވަޒީފާއިން ވަކިކުރަން ނިންމައި، ވަޒީފާއިން ވަކިކުރީ މިއަހަރުގެ ޖަނަވަރީ ތިންވަނަ ދުވަހުއެވެ.
މި މައްސަލައިގައި ޖެނީފާ އެދިފައި ވަނީ:
- އޭނާ ވަޒީފާއިން ވަކިކުރުމުގައި މައުޞޫއީ އަދުލުވެރިކަމާއި އިޖުރާއީ އަދުލުވެރިކަން ގާއިމްކޮށްފައި ނުވާކަމަށް ކަނޑައަޅައިދިނުން
- އޭނާ ވަޒީފާއިން ވަކިކުރީ ގަވާއިދާ ޚިލާފަށް ކަމަށް ނިންމުން
- އޭނާ ވަޒީފާއިން ވަކިކުރަން އައިއޭއެސްގެ ބޯޑުން ނިންމި ނިންމުމަކީ ބާތިލު ނިންމުމެއްކަމަށް ކަނޑައަޅައިދިނުން
- އޭނާ ވަޒީފާއިން ވަކިކުރަން އެންގި އެންގުމާއި ވަޒީފާއިން ވަކިކޮށް ނެރެފައިވާ ޗިޓަކީ ބާތިލު ޗިޓެއްކަމަށް ނިންމުން
- އޭނާ ވަޒީފާއިން ވަކިވެފައި ވާކަމަށް ނުބެލުމާއި، ޓްރައިބިއުނަލުން މައްސަލަ ނިންމާތާ ހަތް ދުވަހުގެ ތެރޭގައި އޭނާގެ ވަޒީފާއާއި މަގާމު އަނބުރާ ދިނުމަށް އައިއޭއެސްއަށް އަމުރުކުރުން
- އޭނާ ވަޒީފާއިން ވަކިކުރި ތާރީޚުން ފެށިގެން ޓްރައިބިއުނަލުން މައްސަލަ ނިންމުމާ ހަމައަށް ހޭދަވި މުއްދަތުގައި ޖެނީފާ ވަޒީފާގައި ހުރި ނަމަ ލިބޭނެ އެންމެހާ މުސާރައާއި އިނާޔަތާއި ކުރިއެރުން ދިނުން އަދި އޭނާއަށް ލިބުނު މާލީ ގެއްލުމުގެ ބަދަލުގައި ތިން މަސްދުވަހުގެ މުސާރައަށްވާ ފައިސާއާއި އޭނާ ވަޒީފާއިން ވަކިކުރި މައްސަލަ ޓްރައިބިއުނަލަށް ހުށަހަޅަން ގާނޫނީ ވަކީލަކު އައްޔަންކުރަން ހޭދަވި ޚަރަދު ދޭންޖެހޭނެކަމަށް ކަނޑައެޅުން
- މައްސަލައިގެ ބަދަލު ނަގައިދީ މައްސަލަ ނިންމާތާ ހަތް ދުވަހުގެ ތެރޭގައި އެ ފައިސާ އޭނާއަށް އެކީ އެކައްޗަކަށް ދިނުން
މި މައްސަލަ އޭނާ ޓްރައިބިއުނަލަށް ހުށަހަޅާފައި ވަނީ މާޗްމަހުގެ 27ވަނަ ދުވަހުއެވެ.
ޓަރައިބިއުނަލުން މިމަހުގެ 13ވަނަ ދުވަހު ޝާއިއުކޮށްފައިވާ މައްސަލަ ނިމުނުގޮތުގެ ޚުލާސާ ރިޕޯޓުގައި ވަނީ، ރިޓަޔާ ކުރުމުގެ ފުރުސަތު އައިއޭއެސްއިން ޖެނީފާއަށް ދީފައިވާކަމަށެވެ. ނަމަވެސް، އޭނާ މަގާމުން ވަކިކުރަން ބޯޑުން ނިންމީ އެ ނިންމުމާ ދެކޮޅު ހެދުމުންކަން ފާހަގަކޮށްފައި ވެއެވެ.
އައިއޭއެސްއިން ފާހަގަކޮށްފައިވާ ގޮތުގައި ޑީއެމްޑީގެ މަގާމަކީ އެ ކުންފުނީގައި މީގެކުރިން އޮންނަ މަގާމެއް ނޫނެވެ. ޖެނީފާއަށް ވަޒީފާ ދީފައި ވަނީ މަގާމު އުފެއްދުމަށްފަހުއެވެ.
މި މައްސަލައިގައި ޓްރައިބިއުނަލުން ނިންމަފައި ވަނީ:
- ޖެނީފާ ވަޒީފާއިން ވަކިކޮށްފައި ވަނީ ގާނޫނާ ޚިލާފަށް ކަމަށް
- ޖެނީފާ އަދާކުރަމުންދިޔަ ވަޒީފާއަށް އޭނާ އަނބުރާ ރުޖޫއަ ކުރުމާއި ޖެނީފާއަކީ އެއްވެސް ހާލަތެއްގައި ވަޒީފާއިން ވަކިވެފައިވާ ފަރާތެއްކަމުގައި ނުބެލުމަށާއި އޭނާ ވަޒީފާގައި ހުރި ނަމަ ލިބޭނެ އެންމެހާ މުސާރައާއި އިނާޔަތައް ނަގައިދިނުމަށް
- އޭނާ ވަޒީފާއިން ވަކިކޮށްފައިވަނީ އެކަށީގެންވާ ސަބަބެއްނެތިކަމަށް ބުރަވެވޭތީ ބަދަލުގެ ގޮތުގައި އެއް މަހަށްވާ މުސާރަ، 56،171 ރުފިޔާ ނަގައިދިނުން
- މި ކަންތައްތައް ރަސްމީ ބަންދުނޫން 30 ދުވަހުގެ ތެރޭގައި ތަންފީޒުކުރުމަށްފަހު ތިން ދުވަހުގެ ތެރޭގައި ވަޒީފާއާ ބެހޭ ޓްރައިބިއުނަލަށް ލިޔުމުން އެންގުން
އައިއޭއެސްގެ ޑީއެމްޑީގެ މަގާމުގައި ހުރި ޖެނީފާއަށް މުސާރައިގެ ގޮތުގައި މަހަކު 34،304 ރުފިޔާ ލިބެއެވެ. އަދި މަގާމުގެ އިނާޔަތުގެ ގޮތުގައި މަހަކު 21،867 ރުފިޔާ ލިބެއެވެ.