ދަނޑުވެރިކަމުގެ ބޭނުމަށް ގދ. ކަންނިގިއްލާ ކުއްޔަށް ދޫކުރަން އެ އަތޮޅު ހޯނޑެއްދޫ ކައުންސިލުން ހުޅުވައިލައިފިއެވެ.
ކަންނިގިއްލާއަކީ ހޯނޑެއްދުއާއި މަޑަވެއްޔާ ދެމެދުގައި އޮންނަ ރަށެކެވެ.
ހޯނޑެއްދޫ ކައުންސިލުން ކުރި އިއުލާނުގައި ވަނީ، ދިގު މުއްދަތަށް އެރަށުގައި ދަނޑުވެރިކަމާއި މެރިކަލްޗާ އަދި ޖަނަވާރު ގެންގުޅުންފަދަ މަސައްކަތްތައް ކުރުމަށް ރާއްޖެއާއި ރާއްޖޭން ބޭރުގެ އިންވެސްޓަރުންނަށް ފުރުސަތު ހުޅުވާލައިފައި ވާކަމަށެވެ.
މި ރަށުގެ ބޮޑުމިނުގައި 430،000 އަކަފޫޓު ހުރެއެވެ. ހޯނޑެއްދޫ ކައުންސިލުން ބުނީ އަމާޒަކީ މިރަށް ދަނޑުވެރިކަމުގެ ރޮނގުން ކުރިއަރުވައި ރާއްޖޭގެ ފުޑް ސެކިއުރިޓީ ގާއިމް ކުރުމަށް ކުރާ މަސައްކަތަށް އެއްބާރުލުން ދިނުން ކަމަށެވެ.
މި ރަށުގައި ދަނޑުވެރިކަން ކުރުމަށް ޝައުގުވެރިވާ ފަރާތްތަކުން އީއޯއައި ހުށަހަޅަން ޖެހެނީ އަންނަ މަހުގެ 10ވަނަ ދުވަހުގެ ކުރިންނެވެ. އީއޯއައިގައި ހިމަނަންޖެހޭ މައުލޫމާތުގެ ތެރޭގައި:
- އީއޯއައި ހުށަހަޅާ ފަރާތުގެ މައުލޫމާތު ނުވަތަ ކުންފުނީގެ މައުލޫމާތު
- މަގާމު
- ދިރިއުޅޭ އެޑްރެސް
- އީމެއިލް އެޑްރެސް
- ފޯނު ނަމްބަރު
- ދާއިރާއިން ހޯދައިފައިވާ ތަޖުރިބާ
ބިޑު ހުށަހެޅުމުގެ އެންމެ ފަހު ދުވަހަކީ އަންނަ މަހުގެ 21ވަނަ ދުވަހެވެ.
ކަންނިގިއްލާއަކީ 2012ވަނަ އަހަރު ރިޒޯޓު ތަރައްގީކުރަން ކަނޑައެޅި 14 ރަށުގެ ތެރޭގައި ހިމެނޭ ރަށެކެވެ.