އެގާރަ އަހަރު ފަހުން ހދ. ނޮޅިވަރަންފަރުން ބޯހިޔާވަހި ކަމަށް ހުޅުވާލައިގެން ކުރިއަށްދަނިކޮށް، އެ ރަށުން 100 ހައުސިން ޔުނިޓް ދޫކުރާ މީހުންގެ ވަގުތީ ލިސްޓު ބާތިލް ކުރަން ހިއުމަން ރައިޓްސް ކޮމިޝަން (އެޗްއާރުސީއެމް) އެންގުމުން އެ ރަށު ކައުންސިލުން ކަންބޮޑުވުން ފާޅުކޮށްފިއެވެ.
އެޗްއާރުސީއެމްއިން އެ ލިސްޓު ބާތިލް ކުރުމަށް އަންގާފައި ވަނީ އެ ޔުނިޓުތައް ދޫކުރުމަށް އޮތް އުސޫލު އެންމެ އިންސާފުވެރި ނޫންކަމަށް ބުނެ، އެ ރަށުގެ 279 މީހަކު ސޮއިކޮށް ހުށަހެޅި ޕެޓިޝަނެއް ތަހުގީގުކޮށް ނިންމުމަށް ފަހުގައެވެ.
އެކަމާ ގުޅުވައި ކަންބޮޑުވުން ފާޅުކުރައްވައި، ނޮޅިވަރަންފަރު ކައުންސިލްގެ ރައީސް އަބްދުﷲ ނަދީމް 'ސަން'އަށް ވިދާޅުވީ، ހައުސިން ޔުނިޓުތަކުގެ މަސައްކަތް ނިމިފައި ހުންނަތާ އަށް މަހަށް ވުރެ ގިނަ ދުވަސް ވެފައިވާކަމަށާއި ރައްޔިތުންނާ ހަވާލު ނުކުރެވި ގިނަ ދުވަސްވާ ވަރަކަށް އެ ތަން ހަލާކުވަމުންދާނެ ކަމަށެވެ.
ނޮޅިވަރަންފަރުގައި އަޅާފައިވާ ހައުސިން ޔުނިޓުތައް: 11 އަހަރުފަހުން، ނޮޅިވަރަންފަރުން ބޯހިޔާވަހިކަމަށް ހުޅުވާލީމަ، ހުއްޓުވުމުން ކައުންސިލުގެ ކަންބޮޑުވުން --- ފޮޓޯ/ އާރްސީސީ. ޓުވިޓާ
އެގޮތުން، އެ ކަމުގައި ބައެއް ރައްޔިތުންގެ ކަންބޮޑުވުންތައް ވެސް ހުރިއިރުގައި، އެޗްއާރުސީއެމްގެ ނިންމުމުގެ ސަބަބުން ގެއްލިގެން ދަނީ ގިނަ ރައްޔިތުންތަކެއްގެ ޙައްގުތަކެއް ކަމަށާއި އެރަށުގައި ގޯތި ދޫކުރުމުގައި ދިމާވި މައްސަލައެއްގައި ގެދޮރުވެރިކަމަށް ގޯތި ދޫނުކުރާތާ 11 އަހަރު ވެފައިވާ ކަމަށް ނަދީމް ވިދާޅުވިއެވެ.
"އެ ސަރަހައްދު ބެލެހެއްޓުމަކީ ކުރެވޭނެ ކަމެއް ނޫން. 100 ގެ ހުންނަ ސަރަހައްދެއް ކޮންމެ ބޭފުޅަކަށް ވެސް އެނގިލައްވާނެ ވިނަ ހެދި، ގަސް ހެދި، މަގުތައް ވާވެ ހައުސިން ޔުނިޓްތަކައް އެކިވަރުގެ ގެލުންތައް ވާނެކަން އެއީ [ހައުސިން ޔުނިޓްތައް] ދޫނުކުރެވޭތީ އޮތް އެންމެ ބޮޑު އެއް ކަންބޮޑުވުމަކީ،"
އެރަށުގައި އިމާރާތްކޮށްފައި ހުރި ހައުސިން ޔުނިޓުތައް ދޫކުރުން ލަސްވާތީ ރައްޔިތުންގެ ވެސް ކަންބޮޑުވުންތައް ހުރި ކަން ނަދީމް ވަނީ ފާހަގަކުރައްވާފައެވެ.
މީގެއިތުރުން، އެ ޔުނިޓުތައް ދޫކުރާނެ މީހުންގެ ވަގުތީ ލިސްޓު އާންމުކުރީ ހައުސިން މިނިސްޓްރީގެ އުސޫލުގެ ދަށުން ކަމަށާއި އެފަދަ އަމުރެއް ނެރޭއިރު އަމުރު ނެރެންވާނީ ވަރަށް ބޮޑަށް ބެލުމަަށްފަހު އުސޫލު ހެދި ފަރާތައށް ކަމަށް އެޗްއާރުސީއެމަށް އަންގާނެ ކަމަށް އޭނާ ވިދާޅުވިއެވެ.
ނޮޅިވަރަންފަރުގައި އަޅާފައިވާ ހައުސިން ޔުނިޓުތައް: 11 އަހަރުފަހުން، ނޮޅިވަރަންފަރުން ބޯހިޔާވަހިކަމަށް ހުޅުވާލީމަ، ހުއްޓުވުމުން ކައުންސިލުގެ ކަންބޮޑުވުން --- ފޮޓޯ/ އާރްސީސީ. ޓުވިޓާ
"އަޅުގަނޑު ސޮއިކޮށްފައި ނެރުނިން މި އުސޫލާ އެއްގޮތަށް ގެ ދޫކުރަމޭ. އިއުލާނު ބާތިލް ކުރެވޭނީ އަޅުގަނޑުމެނަށް. އަޅުގަނޑުމެނަށް އުސޫލެއް ބަދަލެއް ނުކުރެވޭނެ. އެއީ ހައުސިން މިނިސްޓްރީގެ އުސޫލު،" ނަދީމް ވިދާޅުވިއެވެ.
ނޮޅިވަރަންފަރު ކައުންސިލްގެ ރައީސް ގަބޫލު ކުރައްވާ ގޮތުގައި، އިންސާނީ ހައްގެއް ގެއްލޭނަމަ އެޗްއާރުސީއެމަށް އެ އިއުލާނުގެ އިނިޝިއަލް ސްޓޭޖުގައި ފެންނަން ޖެހޭނެއެވެ. އެ ކަން އެނގެން ޖެހޭނީ ބަޔަކު ހުށަހެޅުމުން ނޫން ކަމަށް ވެސް އޭނާ ވިދާޅުވިއެވެ.
ނޮޅިވަރަންފަރު: 11 އަހަރުފަހުން، ނޮޅިވަރަންފަރުން ބޯހިޔާވަހިކަމަށް ހުޅުވާލީމަ، ހުއްޓުވުމުން ކައުންސިލުގެ ކަންބޮޑުވުން --- ފޮޓޯ/ ޒުވާން މަސްވެރިޔާ
އިތުރަށް ވާހަކަދައްކަވަމުން އޭނާ ވިދާޅުވީ، ރާއްޖޭގައި ގެދޮރު ދޫކުރާ އުސޫލާއި، އެރަށުގެ ހައުސިން ޔުނިޓްތައް ދޫކުރަން ކުރި އުސޫލާ އެއްގޮތް ކަންތައްތަކެއް ހުރި ކަމަށްވާއިރު، އެހެން އުސޫލުތަކުގައި މައްސަލަ ނުޖެހި އެ އުސޫލުގައި މައްސަލަ ޖެހުމަކީ ސުވާލު އުފެދޭ ކަމެއް ކަމަށެވެ.
އެގޮތުން، އެދެވޭ ގޮތަކަށް އެޗްއާރުސީއެމްއިން ހުރިހާ އުސޫލުތައް ހުންނާނީ އިންސާނީ ޙައްގުތައް ނުގެއްލޭ ގޮތަށް ކަމަށާއި އެއް އުސޫލެއްގެ ދަށުން އެފަދަ ކަންކަން ކުރެވޭނެ އިންތިޒާމު ހަމަޖެހެން ޖެހޭނެ ކަމަށް ނަދީމް ގަބޫލުކުރައްވައެވެ.
އެ އުސޫލާ އެއްގޮތަށް ހައުސިން ޔުނިޓްތައް ދޫކުރުން މަޑު ޖައްސާލަން ވަގުތީ އަމުރެއް ނެރެދިނުމަށް ނޮޅިވަރަންފަރު މެޖިސްޓްރޭޓް ކޯޓުގައި ބައެއް ފަރާތްތަކުން އެދިފައި ހުރި ކަމަށާއި ކޯޓުން ވަގުތީ އަމުރު ނެރެދީފައިނުވާ ކަމަށާއި މައްސަލަ ހިނގަމުން އަންނަ ކަމަށް ވެސް އޭނާ ވިދާޅުވެފައިވެއެވެ.
ނޮޅިވަރަންފަރު: 11 އަހަރުފަހުން، ނޮޅިވަރަންފަރުން ބޯހިޔާވަހިކަމަށް ހުޅުވާލީމަ، ހުއްޓުވުމުން ކައުންސިލުގެ ކަންބޮޑުވުން --- ފޮޓޯ/ ޒުވާން މަސްވެރިޔާ
"ނޮޅިވަރަންފަރަކީ ފާއިތުވި 11 އަހަރު ވަންދެން ގޯއްޗެއް ދޫނުކުރެވި އޮތް ރަށެއް. ތިން ހަތަރު ކުދިން ގޮވައިގެން ބޯހިޔާވަހިކަމެއް ބިނާކުރެވޭނެ މާލީ ގާބިލަކަން ހުރެ ބިމެއް ނެތި ގޯތި ބިނާނުކުރެވި އެބަ ތިބި ވަރަށް ބައިވަރު މީހުން. އެމީހުންގެ ވެސް ޙައްގުތަކެއް އޮންނާނެ،" އޭނާ ވިދާޅުވިއެވެ.
އޭގެއިތުރުން، އެންޓި ކޮރަޕްޝަން ކޮމިޝަން (އެސީސީ) އިން އެކަމުގައި ކޮރަޕްޝަނަށް މަގުފަހިވާ ކަންތައްތަކެއް ނެތް ކަން ފާހަގަކޮށްފައިވާއިރު، ޔުނިޓުތައް ދޫކުރުން އަވަސް ކޮށްދިނުމަށް ހުރިހާ އިދާރާއަކުން ވެސް މަސައްކަތް ކޮށްދިނުމަށް އެ ރަށު ކައުންސިލުން ވަނީ ގޮވާލާފައެވެ.
އެހެންވެ، އެ މައްސަލައިގެ ތަހުގީގު ނިންމައި އެޗްއާރުސީއެމް އިން ވަނީ އެ ޔުނިޓުތައް ދޫކުރުމުގެ އުސޫލުގައި ހުރި ކަންބޮޑުވުންތަކަށް ހައްލު ލިބޭ ގޮތަށް އިސްލާހުކޮށް، އެ އުސޫލު އަލުން އިއުލާނުކުރުމަށް ކައުންސިލަށް އަންގާފައެވެ.
މިހާރު އެ ޔުނިޓްތައް ދޫކުރަން ނިންމާފައިވާ މީހުންގެ ވަގުތީ ލިސްޓު އުވާލުމަށް ވެސް އެޗްއާރުސީއެމްއިން ވަނީ ނޮޅިވަރަންފަރު ކައުންސިލަށް އަންގާފައެވެ.
އުސޫލު އަލުން އެކުލަވާލާއިރު ގާނޫނުތަކުން ކަށަވަރުކޮށްދީފައިވާ ހައްގުތައް ހަނިނުވާ ގޮތަށް އުސޫލު އެކުލަވާލުމަށް އެޗްއާރުސީއެމް އިން އެދިފައިވެއެވެ.