ޔުއޭފާ ޔޫރޮޕާ ލީގުގެ ލީގު ފޭސްގައި އިޓާލިއަން ސެރީއާގެ ލާޒިއޯއިން ޑަޗް އެރެޑިވިސީގެ ޓްވެންޓޭ ބަލިކޮށް ތާވަލްގެ އެއްވަނައަށް އަރައިފިއެވެ.
ޓްވެންޓޭގެ ދަނޑުގައި ކުޅުނު މި މެޗު ލާޒިއޯއިން ކާމިޔާބުކޮށްފައިވަނީ 2-0 އިންނެވެ.
މެޗުގައި ލާޒިއޯއިން ކާމިޔާބުކުރި ފުރަތަމަ ލަނޑު މެޗުގެ 35 ވަނަ މިނެޓުގައި އެ ޓީމަށް ކާމިޔާބުކޮށްދިނީ ޕެޑްރޯއެވެ. ދެވަނަ ލަނޑު މެޗު ނިމެން ތިން މިނެޓަށް ވެފައިވަނިކޮށް ޖަހައިދިނީ ގުސްޓާވް އިސާކްސެންއެވެ.
މެޗުގެ 11 ވަނަ މިނެޓުގައި ޓްވެންޓެގެ ލާސް އުނާސްޓާލްއަށް ދެއްކި ރަތް ކާޑާ އެކު އެ ޓީމުން މެޗުގެ ބޮޑު ބައި ކުޅެފައިވަނީ އެއް ކުޅުންތެރިއެއް މަދުކޮށެވެ. މި ކާމިޔާބީއާއެކު ލާޒިއޯއަށް ތާވަލްގެ އެއްވަނަ ލިބެނީ ކުޅުނު ތިން މެޗުން ލިބިފައިވާ ނުވަ ޕޮއިންޓުގެ އިތުރުން ފައިދާ ލަނޑަށް ބަލާއިރު އެ ޓީމަށް ކުރި ލިބޭތީއެވެ.
މިމުބާރާތުގައި ޖަރުމަނު ބުންޑެސްލީގާގެ އެއިންޓްރެކްޓް ފްރޭންކްފާޓާއި ލެޓްވިއަން އަޔާ ލީގުގެ އާރްއެފްއެސް ބައްދަލުކުރި މެޗު 1-0 އިން ކާމިޔާބުކޮށްފައިވަނީ ފްރޭންކްފާޓެވެ.
މެޗުގައި ފްރޭންކްފާޓުން ކާމިޔާބު ކުރި ހަމައެކަނި ލަނޑު މެޗުގެ 79 ވަނަ މިނެޓުގައި ޖަހައިދިނީ ހޫގޯ ލާސަންއެވެ.
މި ކާމިޔާބީއާ އެކު ފްރޭންކްފާޓް މިހާރު އޮތީ ހަތް ޕޮއިންޓާ އެކު ޔޫރޮޕާ ލީގުގެ ތާވަލުގެ ހަވަނައިގައެވެ. އާރްއެފްއެސް އުޅެނީ އެއް ޕޮއިންޓާ އެކު ތާވަލްގެ 31 ވަނައިގައެވެ.
މީގެ އިތުރުން، ގްރީސް ސުޕާ ލީގުގެ އޮލިމްޕިއާކޯސްއާއި ސްވިޑިޝް އޯލްސުވެންސްކަންގެ މަލްމޯ ބައްދަލުކުރި މެޗު ރަށުން ބޭރުގައި 1-0 އިން ކާމިޔާބުކޮށްފައިވަނީ އޮލިމްޕިއާކޯސްއެވެ.
މެޗުގައި އޮލިމްޕިއާކޯސްގެ ހަމައެކަނި ލަނޑު އެ ޓީމަށް ކާމިޔާބުކޮށްދިނީ މެޗުގެ 30 ވަނަ މިނެޓުގައި އައްޔޫބް އެލްކާބީއެވެ. މެޗުން ލިބުނު ތިން ޕޮއިންޓާ އެކު އޮލިމްޕިއާކޯސް މިހާރު އޮތީ ތިން މެޗުން ލިބިފައިވާ ހަ ޕޮއިންޓާއެކު ތާވަލްގެ 12 ވަނައިގައެވެ. މަލްމޯ އޮތީ ތިން ޕޮއިންޓާއެކު 25 ވަނައިގައެވެ.