އިންޑިއާގެ އިރުމަތީގެ ބައެއް ހިސާބުތަކަށް ބޯކޮށް ވާރޭވެހި ބާރު ވަޔާ އެކު ތޫފާނު "ދާނާ" އަރައިފިއެވެ.
އެ ތޫފާން އޮޑިޝާ ސްޓޭޓްގެ އުތުރު އައްސޭރިފަށަށް އަރާފައިވާއިރު، ގަޑިއަކު 110 ކިލޯމީޓަރު (ގަޑިއަކު 70 މޭލު) ބާރުމިނުގައި ވައިޖެހޭ ކަމަށް ޖޮއިންޓް ޓައިފޫން ވާނިން ސެންޓަރު (ޖޭޓީޑަބްލިއުސީ) އިން ބުނެއެވެ. ކޮލްކަތާގެ ހުޅަނގު ދެކުނުން ގާތްގަނޑަކަށް 250 ކިލޯމީޓަރު (155 މޭލު) ދުރުގައި އޮތް މި ތޫފާން ގަޑިއަކު 12 ކިލޯމީޓަރުގެ ބާރުމިނުގައި ހުޅަނގު އުތުރަށް ދަތުރުކުރަމުން ދިޔައީ، އިންޑިއާ ގަޑިން ހެނދުނު 9 ޖެހިއިރުއެވެ.
ތޫފާންގެ ސަބަބުން އޮޑިޝާ އާއި ހުޅަނގު ބެންގަލް ސްޓޭޓް އަށް 50-150 މިލިމީޓަރު އާއި ދެމެދުގެ މިންވަރަކަށް ވާރޭ ވެހިފައިވާއިރު، އެންމެ ގިނައިން ވެހިފައިވަނީ ޗަންދުބަލީ ޓައުންއަށެވެ. އެއީ، 160 މިލިމީޓަރުގެ ވާރޭއެވެ. ތޫފާނުގެ ސަބަބުން އަދި މިހާތަނަށް އެއްވެސް މީހަކަށް ގެއްލުމެއް ލިބުނު ކަމުގެ ރިޕޯޓެއް ލިބިފައެއް ނުވެއެވެ.
ތޫފާން އެރުމުގެ ކުރިން ކަމާބެހޭ ފަރާތްތަކުން ވަނީ ލައްކައެއްހާ މީހުން ތޫފާން އަރާނެ ކަމަށް ބެލެވޭ ހިސާބުންތަކުން ނެރެ، ސްކޫލްތައް ބަންދުކޮށް، ބައެއް ހިސާބުތަކުގެ ރޭލުތަކާއި ފްލައިޓްތައްވެސް ކެންސަލްކޮށްފައެވެ. އިންޑިއާ މީޓިއޮރޮލޮޖިކަލް ޑިޕާޓްމަންޓް (އިންޑިއާ އެމްއީޓީ) އިން ވަނީ އޮޑިޝާއާއި ހުޅަނގު ބެންގަލްގެ ބައެއް ހިސާބުތަކަށް ރަތް ސަމާލު ވެސް ނެރެފައެވެ.
ޕްރެސް ޓްރަސްޓް އޮފް އިންޑިއާގެ ނިއުސް އެޖެންސީއަށް މައުލޫމާތު ދެއްވަމުން އޮޑިޝާގެ ޗީފް މިނިސްޓަރު މޯހަން ޗަރަން މާޖީ ވިދާޅުވީ، ތޫފާންގެ ކުރިން ގާތްގަނޑަކަށް 300،000 މީހުން ރައްކާތެރި ހިސާބުތަކަށް ގެންގޮސްފައިވާ ކަމަށެވެ. އަދި، ތިން ޑިސްޓްރިކްޓަކަށް ތޫފާންގެ އަސަރު ވަރަށް ބޮޑަށް ކުރާނެ ކަމަށް ބެލެވޭ ކަމަށްވެސް އޭނާ ވިދާޅުވިއެވެ.
ކަމާބެހޭ ފަރާތްތަކުން ރާވާފައިވަނީ 14 ޑިސްޓްރިކްޓަކުން އެއް މިލިއަނަށް ވުރެ ގިނަ މީހުން ނެރުމަށެވެ. ތޫފާން އަރާނެ ކަމަށް ބެލެވޭ ސަރަހައްދުތަކުގައި ސަލާމަތީ ކަންކަމާބެހޭ ޓީމުތައް ވަނީ ހަރަކާތްތެރި ވެސް ވާން ފަށާފައެވެ.
އިންޑިއާގެ އިރުމަތީ އައްސޭރިފަށަކީ ޒަމާނުއްސުރެ ތޫފާން އަރާ ސަރަހައްދެކެވެ. ނަމަވެސް، ތޫފާންތައް އަރާ މިންވަރު ފަހަކަށްއައިސް ވަނީ ވަރަށް ބޮޑަށް އިތުރުވެފައެވެ. މިދިޔަ އަހަރަކީ އިންޑިއާއަށް އެންމެ ގިނައިން ތޫފާން އެރި އަހަރެވެ. ތޫފާންތަކުގައި 523 މީހުން މަރުވެފައިވާއިރު، 2.5 ބިލިއަން ޑޮލަރުގެ ގެއްލުން ލިބުނެވެ.