ބޯހިޔާވަހިކަމަށް ލުއި ލޯނު ދޫކުރާ ސްކީމުގައި ބޭންކް އޮފް މޯލްޑިވްސް (ބީއެމްއެލް)އިން ބައިވެރިވުމަށް ހައުސިން މިނިސްޓްރީއާ އެކު މިއަދު އެމްއޯޔޫއެއްގައި ސޮއިކޮށްފިއެވެ.
ހައުސިން މިނިސްޓްރީގައި ބޭއްވި ރަސްމިއްޔާތެއްގައި އެމްއޯޔޫގައި ސޮއިކުރެއްވީ ބީއެމްއެލްގެ ސީއީއޯ މުޙައްމަދު ޝަރީފާއި ހައުސިން މިނިސްޓަރު ޑރ. އަލީ ހައުދަރެވެ.
މި ރަސްމިއްޔާތުގައި ވާހަކަދައްކަދައްކަވަމުން، މިނިސްޓަރު ހައިދަރު ވިދާޅުވީ، 'ހިޔާވަހި' ލުއި ލޯނު ސްކީމްގެ ދަށުން ފަސް ޕަސެންޓު ރޭޓުގައި އެއް މިލިއަން ރުފިޔާއިން ފެށިގެން ހަ މިލިއަން ރުފިޔާއާ ހަމައަށް ލޯނު ދޫކުރާނެ ކަމަށެވެ.
ސޮއިކުރުމަށް ބޭއްވި ރަސްމިއްޔާތުގެ ތެރެއިން: ގެތައް އަޅަން ހަ މިލިއަންއާ ހަމައަށް ލުއި ލޯނު ދޫކުރާ ސްކީމްގައި ބައިވެރިވުމަށް ބީއެމްއެލްއިން ސޮއިކޮށްފި --- ސަން ފޮޓޯ/ މޫސާ ނަދީމް
އެގޮތުން، ރަށްރަށުގައި ގެދޮރު އެޅުމަށް އެއް މިލިއަން ރުފިޔާއާ ހަމައަށް ލޯނު ދޫކުރާނެ ކަމަށާއި އާބަން ސެންޓަރުތައް އެޅުމަށް ތިން މިލިއަން ރުފިޔާ ދޫކުރުމުގެ އިތުރުން މާލެ ސަރަހައްދުގައި ގެދޮރު އަޅަން ހަ މިލިއަން ރުފިޔާ ދޫކުރާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވި ގޮތުގައި، އެ ލޯނުތައް އަނބުރާ ދެއްކުމަށް 25 އަހަރު ލިބޭނެއެވެ. ލޯނު ދޭނީ އަލަށް އަޅާ ގެތައް ބިނާކުރާށެވެ. އަދި، އިމާރާތް ކުރަން ފަށާފައި ހުންނަ ގެތައް ނިންމުމަށާއި އަލަށް ގެ އެޅުމަށް ލޯނު ދޫކުރާނެކަން މިނިސްޓަރު ވަނީ ފާހަގަކުރައްވާފައެވެ.
ސޮއިކުރުމަށް ބޭއްވި ރަސްމިއްޔާތުގެ ތެރެއިން: ގެތައް އަޅަން ހަ މިލިއަންއާ ހަމައަށް ލުއި ލޯނު ދޫކުރާ ސްކީމްގައި ބައިވެރިވުމަށް ބީއެމްއެލްއިން ސޮއިކޮށްފި --- ސަން ފޮޓޯ/ މޫސާ ނަދީމް
"މިއީ ރާއްޖޭގައި ބޯހިޔާވަހިކަން ހޯދުމަށް ވަރަށް ބޮޑު އެހީއަކަށް ވާނެ" މިނިސްޓަރު ވިދާޅުވިއެވެ.
މި ސްކީމަށް އެޕްލިކޭޝަން ހުޅުވާލާއިރު، ސްކީމުގެ ދަށުން ލޯނު ދޫކުރުމަށް އެޗްޑީއެފްސީއާއި އިސްލާމިކް ބޭންކާ އެއްކޮން މީގެ ކުރިން ސޮއިކޮށްފައިވާކަން މިނިސްޓަރު ހައިދަރު ވަނީ ފާހަގަކުރައްވާފައެވެ.
ގެދޮރުވެރިކަމަށް ކުޑަ އިންޓްރެސްޓެެއްގައި ލޯނު ދޫކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.