ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު (އީއައިއޭ) ނުހަދައި، ރ. ހުރަވަޅި ބީޗް ރިސޯޓުގައި ބޮޑު ހިލަ ޖެހުމުގެ މަޝްރޫއެއް ކުރިއަށް ގެންދިޔުމުން އެންވަޔަރަމެންޓަލް ޕްރޮޓެކްޝަން އޭޖެންސީ (އީޕީއޭ)އިން އެ ރިސޯޓު ޖޫރިމަނާކޮށްފިއެވެ.
އީޕީއޭއިން މިއަދު ކުރި އިއުލާނެއްގައި ބުނީ، ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓައިނުލާ އެ ރިސޯޓުން ބޮޑުހިލަ ޖެހުމުގެ މަޝްރޫއު ކުރިއަށް ގެންގޮސްފައިވަނީ ރިސޯޓުގެ އިރުމަތީ ފަރާތު ފަޅު ތެރޭގައި ކަމަށެވެ.
އެގޮތުން، ގަވައިދުގެ ދަށުން މިދިޔަ ހޯމަ ދުވަހު އީޕީއޭއިން ވަނީ ހުރަވަޅި ރިސޯޓު 20،000 ރުފިޔާއިން ޖޫރިމަނާކޮށްފައެވެ.
އެ ފައިސާ 30 ދުވަހުގެ ތެރޭގައި އެ ރިސޯޓުން އީޕީއޭއަށް ދައްކަން ޖެހޭއިރު، 20،000 ރުފިޔާއިން ޖޫރިމަނާ ކުރީ ގަވަައިދުގައި ބަޔާންކޮށްފައިވާ ކުށްތަކުގެ ތެރެއިން ކުށެއް ކުރި ފުރަތަމަ ފަހަރު ކަމަށްވާތީ ކަމަށް އީޕީއޭއިން ވަނީ ބުނެފައެވެ.