އަންނަ މަހު ފެށޭ ރޯދަ މަހާ ދިމާކޮށް، ގޭތެރެ ސާފުކުރުމަށް ފަހު މަގުމައްޗަށް ކުނި ނޭޅުމަށް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިން މިއަދު އިލްތިމާކޮށްފިއެވެ.
އެ އެޖެންސީން ނެރުނު އިއުލާނެއްގައި ވަނީ، ރޯދައަށް ތައްޔާރުވުމުގެ ގޮތުން ގޭތެރެ ޒީނަތްތެރިކުރަން ސާފުކުރުމުން ގިނަ އަދަދެއްގެ ކުނި އުފޭދޭކަމަށެވެ. އެހެން އުފެދޭ ކުނިތައް މަގުމައްޗަށާއި ދުވާރު މައްޗަށް ނެރޭކަން ކުރިން ވެސް ފާހަގަކުރެވިފައިވާ ކަމަށް އީޕީއޭއިން ބުނެއެވެ.
އެ ކުނީގެ އިތުރުން މިފަހުން އާންމުކޮށް ގޭބީސީތަކާއި ފިހާރަތަކުގައި އުފެދޭ ކުނި ވެސް ގިނަ އަދަދަކަށް މަގުމައްޗަށް ނެރެފައި ހުންނަކަން ފާހަގަވާކަމަށާއި އެ ކަމުގެ ސަބަބުން މަގުތައް ނުސާފުވާ ކަމަށާއި މަގު ބޭނުންކުރާ މީހުންނަށް ބޮޑެތި ދަތިތަކާއި ކުރިމަތިލާންޖެހޭ ކަމަށް އީޕީއޭއިން ވަނީ ބުނެފައެވެ.
ވެމްކޯ މުވައްޒަފެއް ޑަސްބިނެއް ހިފައިގެން: އީޕީއޭއީން އެދުނީ ރޯދައަށް ގޭތެރެ ސާފު ކުރުމަށްފަހު، މަގުމައްޗަށް ކުނި ނާޅަން -- ސަން ފޮޓޯ/ ފަޔާޒު މޫސާ
އެފަދަ ކުނީގެ ސަބަބުން ސިއްހީ ގޮތުން މައްސަލައެއް ކުރިމަތިވެދާނެތީ، އެ އެޖެންސީން ވަނީ ރޯދަޔަށް ގޭތެރެ ސާފުކުރުމަށް ފަހު އުފެދޭ ކުންޏާއި އެހެނިހެން ކުނި މަގުމައްޗަށް ނާޅަން އެދިފައެވެ.
"އަދި، ރޯދަމަހަށް ގެއާއި ގޯތިތެރެ ސާފުކުރުމުގެ ކަންކަން ކުރިއަށް ގެންދިޔުމުގައި ކުރީބައިގައި ކުނި އުކާލެވޭނެ އިންތިޒާމު ރަށްރަށުގައި ނަމަ އެ ރަށެއްގައި ކުނި މެނޭޖުކުރުމުގެ ޚިދުމަތްދޭ ފަރާތްތަކާއި އަދި ސިޓީތަކުގައި ވޭސްޓް މެނޭޖްމަންޓް ކޯޕަރޭޝަނާއި ގުޅުއްވައިގެން ހަމަޖެއްސެވުމަށް ދަންނަވަމެވެ،" އެ އިއުލާނުގައި ބުނެފައިވެއެވެ.
ތިމާވެށި ތަޣައްޔަރުވާ ނުވަތަ ތަޣައްޔަރުވެދާނެ ގޮތަކަށް އެއްވެސް މީހަކު ކުނި ގެންގުޅުން ނުވަތަ ނައްތާލުމުގެ ހަރަކާތެއް ހިންގުމަކީ ކުނި މެނޭޖުކުރުމުގެ ގާނޫނުގެ ދަށުން މަނާކަމެއް ކަމަށް އީޕީއޭއިން ވަނީ ބުނެފައެވެ.
އެހެންވެ، އެ ގާނޫނާ އެއްގޮތަށް ހުރިހާ އެންމެން ވެސް މަގުމައްޗަށް ކުނި އުކައިލުމުގެ ބަދަލުގައި އެ ތަންތަން ސާފުކޮށް ބާއްވަން އީޕީއޭން ވަނީ ހަނދާންކޮށްދީފައެވެ.
މިދިޔަ އަހަރުގެ ރޯދަ މަހާ ދިމާކޮށް ވެސް މާލޭގެ މަގުތައް ކުނިން ފުރާލައި، ގޮނޑުކޮށްލިއެވެ. އޭރު ވެމްކޯއާއި މާލެ ސިޓީ ކައުންސިލް ގުޅިގެން ވަނީ މަގުތައް ސާފުކޮށްފައެވެ.