ބ. ދަރަވަންދުއަށް ޒިޔާރަތްކުރުމުގެ އަހަރުގެ ގޮތުގައި 2025 ވަނަ އަހަރު ފާހަގަކުރުމަށް ނިންމައި އެކަން އިފުތިތާޙުކުރަން ޚާއްޞަ ޙަފުލާއެއް މިރޭ 9:00 ގައި ދަރަވަންދޫގައި ބާއްވަން ދަރަވަންދޫ ކައުންސިލުން ނިންމައިފިއެވެ.
ދަރަވަންދޫ ކައުންސިލުން އެކުލަވާލައި ޢާންމުކޮށްފައިވާ ދަރަވަންދޫގެ ތަރައްޤީގެ ޕްލޭން 2022-2026 ގައި ރަށުގެ ފަތުރުވެރިކަމަށް ސަމާލުކަން ދީގެން ހިމަނާފައިވާ ކަންތައްތަކުގެ ތެރެއިން 2025 ވަނަ އަހަރަކީ ދަރަވަންދޫ ފަތުރުވެރިކަމުގެ މަންޒިލެއްގެ ގޮތުގައި އިޝްތިހާރުކޮށް، އެ އަހަރުގެ ތެރޭގައި ރަށަށް ޒިޔާރަތްކުރާ މީހުން އިތުރުކޮށް، ފަތުރުވެރީންނަށްޓަކައި ގިނަ ފުރުޞަތުތަކެއް އިންތިޒާމުކުރެވި ތަނަވަސްކުރާނެ އަހަރަކަށް ހެދުމަށް ވަނީ ނިންމާފައެވެ.
ދަރަވަންދޫ: އެ ރަށަށް ޒިޔާރަތްކުރުމުގެ އަހަރު އިފުތިތާހުކުރުން މިރޭ އޮންނާނެ ---
މިރޭގެ ޙަފުލާއަކީ މި ކަންކަން ތަޢާރަފުކޮށް، އިފުތިތާޙުކުރުމަށް ބާއްވާ ޙަފުލާއެކެވެ.
ދަރަވަންދޫ ކައުންސިލްގެ ރައީސް ޢަލީ ސަމީޙް ވިދާޅުވި ގޮތުގައި މިރޭ އިފުތިތާޙުކުރެވޭ ވިޒިޓް ދަރަވަންދޫ ޔިއާ 2025 އަކީ އަތޮޅުތެރޭގެ ރަށެއް ޕްރޮމޯޓްކުރުމަށް މި ފެންވަރުގައި ޚާއްޞަ އަހަރެއް ކަނޑައަޅައި، މިހާ ފުޅާކޮށް މަސައްކަތްކުރަން ފެށޭ ފުރަތަމަ ފަހަރެވެ. މި މަސައްކަތަކީ ހަމައެކަނި 2025 އަށް އެކަނި އަމާޒުކޮށްގެން ކުރާ މަސައްކަތްތަކެއް ނޫން ކަމަށާއި ކުރިއަށް އޮތް ފަސް އަހަރަށް ދިގުދެމިގެންދާނެ ޚާއްޞަ ޕްލޭނެއްގެ ދަށުން ކުރެވޭ މަސައްކަތްތަކެއްގެ ފެށުންކަމުގައި ވެސް ޢަލީ ސަމީޙް ވިދާޅުވިއެވެ.
ދަރަވަންދޫ: އެ ރަށަށް ޒިޔާރަތްކުރުމުގެ އަހަރު މިރޭ އިފުތިތާހުކުރަން ވަނީ ނިންމާފައި --
މިރޭ ދަރަވަންދޫގައި ބާއްވާ ޚާއްޞަ ޙަފުލާއަށް ރަށުގެ ރައްޔިތުންގެ އިތުރުން، ކަމާ ގުޅުންހުރި ގިނަ ފަރާތްތަކަށް ދަޢުވަތު އަރުވާފައިވެއެވެ. އަދި، ކައުންސިލާއި ރަށުގެ ގެސްޓް ހައުސްތަކާއި މުއައްސަސާތަކާއި ސްކޫލާއި ރައްޔިތުން ގުޅިގެން މި ޙަފުލާ ކުލަގަދަކުރުމަށް ގިނަ މަސައްކަތްތަކެއް ކޮށްފައިވާ ކަމަށް ކައުންސިލުން މަޢުލޫމާތު ދެއެވެ.
ޖުމުލަ 1222 މީހުން ދިރިއުޅޭ ދަރަވަންދޫ ހިމެނޭ ބ. އަތޮޅުގައި 15 ރިސޯޓް އޮތްއިރު، ދަރަވަންދޫ ޑޮމެސްޓިކް އެއާޕޯޓް ހިމެނިފައިވަނީ ރާއްޖޭގެ އެންމެ ހަލަބޮލި އެންމެ ބިޒީ އެއާޕޯޓްތަކުގެ ތެރޭގައެވެ. ދަރަވަންދޫ ހިމެނޭ ސަރަހައްދުގައި އޮތް ހަނިފަރުބޭ، ދަރަވަންދޫ ކަންމަތި، އަދި ދަރަވަންދޫ ތިލަ ހިމެނިފައިވަނީ ދަރަވަންދުއަށް ޒިޔާރަތްކުރާ ކޮންމެ މެހުމާނެއްގެ ބޮޑު ޝައުގްވެރިކަމެއް ދެވޭ ތަންތަނުގެ ގޮތުގައެވެ.
ދަރަވަންދޫގެ ފޮޓޯއެއް: އެ ރަށަށް ޒިޔާރަތްކުރުމުގެ އަހަރު އިފުތިތާހުކުރުން މިރޭ އޮންނާނެ --
ޖުމުލަ 14 ގެސްޓް ހައުސް އާއި ތިން ޑައިވް ސެންޓަރާ އެކު ދަރަވަންދޫ މިހާރު ވެސް އޮތީ މެހުމާނުންނަށް މަރުޙަބާ ކިޔުމަށް ތައްޔާރަށް ކަމަށާއި 2025 ވަނަ އަހަރު ޚާއްޞަ އަހަރެއްގެ ގޮތުގައި ފާހަގަކުރާއިރު ވަސީލަތްތަކަށާއި އިންތިޒާމްތަކަށް އިތުރު ބަދަލުތަކާއި ތަރައްޤީ ގެނައުމަށް ގިނަ މަސައްކަތްތަކެއް ރޭވި ކުރިއަށް ދާކަމަށް ކައުންސިލުން ހާމަކުރެއެވެ.
މިރޭ 9:00 ގައި އޮންނަ ވިޒިޓް ދަރަވަންދޫ ޔިއާ 2025 އިފުތިތާޙުކުރުމުގެ ޙަފުލާ އެސްއެސްޓީވީން ވަގުތުން ގެނެސްދޭނެއެވެ.