ބ. ދަރަވަންދޫން ޝާނިހާ ޝަރީފް---
'ދަރަވަންދޫއަށް ޒިޔާރާތްކުރުމުގެ އަހަރު 2025' ފާހަގަކުރުމުގެ ގޮތުން އަހަރުގެ އެންމެ ފުރަތަމަ ފަތުރުވެރިޔާއަށް ހޫނު މަރުހަބާއެއް ކިޔައިފިއެވެ.
ދަރަވަންދޫ ކައުންސިލުން އެކުލަވާލައި ޢާންމުކޮށްފައިވާ ދަރަވަންދޫގެ ތަރައްގީގެ ޕްލޭން 2022-2026 ގައި ރަށުގެ ފަތުރުވެރިކަމަށް ސަމާލުކަން ދީގެން ހިމަނާފައިވާ ކަންތައްތަކުގެ ތެރެއިން 2025 ވަނަ އަހަރަކީ ދަރަވަންދޫ ފަތުރުވެރިކަމުގެ މަންޒިލެއްގެ ގޮތުގައި އިޝްތިހާރުކުރުން ވަނީ ހިމަނާފައެވެ.
އެގޮތުން 'ދަރަވަންދޫއަށް ޒިޔާރާތްކުރުމުގެ އަހަރު 2025' ރޭ ރަސްމީކޮށް ވަނީ އިފުތިތާހުކޮށްފައެވެ.
ދަރަވަންދޫއަށް ޒިޔާރާތްކުރި 2025 ވަނަ އަހަރުގެ އެންމެ ފުރަތަމަ ފަތުރުވެރިޔާއާއި އޭނާގެ ފިރިމީހާ -- ސަން ފޮޓޯ/ ހަސަން މާނިއު
އެގޮތުން އެ ރަށުން މިއަދު ވަނީ އަހަރުގެ ފުރަތަމަ ފަތުރުވެރިޔާއަށް މަރުހަބާ ކިޔައިފައެވެ.
އެ ރަށަށް މިއަހަރު ޒިޔާރާތްކުރި ފުރަތަމަ ފަތުރުވެރިޔާއަކީ ފްރާންސްގެ ރައްޔިތެއް ކަމަށްވާ އިނެސް ޝެރިފާ ހަދްބީއެވެ. މި ފަތުރުވެރިޔާއަކީ އޭނާގެ ފިރިމީހާއާއެކު ރާއްޖެއަށް ޗުއްޓީ ހޭދަކޮށްލުމަށް އައި ދެމަފިރިންނެވެ.
ދަރަވަންދޫން އެ ފަތުރުވެރިޔާއަށް މަރުހަބާ ކިޔާފައި ވަނީ ބޮޑުބެރާއި ސަގާފީ ނެށުމުގެ ހަރަކާތަކުންނެވެ.
ދަރަވަންދޫ ކައުންސިލުން ވަނީ ފުރަތަމަ ފަތުރުވެރިޔާ ފާހަގަކުރުމަށްޓަކައި ޚާއްސަ ހަނދާނީ ފިލައެއް އަރުވާފައެވެ. އަދި ދަރަވަންދޫގައި އެ ދެމަފިރިންނަށް ފަސް ދުވަހުގެ ހުރުން ހިލޭ ދީފައިވެއެވެ. މީގެ އިތުރުން ސްކޫބާ ޑައިވިންއާއި ފަސް އެކްސްކާޝަންގެ ފުރުސަތު ވަނީ ދީފައެވެ.
ދަރަވަންދޫ ކައުންސިލްގެ ރައީސް އަލީ ސަމީހު "ސަން"އާ ވާހަކަދައްކަވަނީ -- ސަން ފޮޓޯ/ ހަސަން މާނިއު
"ސަން" އާ ވާހަކަދައްކަވަމުން ދަރަވަންދޫ ކައުންސިލްގެ ރައީސް އަލީ ސަމީހު ވިދާޅުވީ 'މަގޭ ދަރަވަންދޫ' ކެމްޕެއިނަކީ ރަށުގެ އިގްތިސޯދު ރަނގަޅުކޮށް، ރަށް ޕްރޮމޯޓުކުރުމަށްޓަކައި ހިންގާ ވަރަށް ބޮޑު ކެމްޕެއިނެއް ކަމަށެވެ. ޚާއްސަގޮތެއްގައި ރަށުގެ ލޯކަލް ޓޫރިޒަމް ފުޅާކުރުމަށް މި ކެމްޕެއިނުގައި އިސްކަންދޭ ކަމަށް ސަމީހު ވިދާޅުވިއެވެ.
އެގޮތުން މުޅި ދަރަވަންދޫގެ މުއައްސަސާތަކާއި، ގެސްޓްހައުސް ވިޔަފާރިތަކުގެ އިތުރުން ރަށުގެ އާންމު ރައްޔިތުން ގުޅިގެން ދަރަވަންދޫއަށް ފަތުރުވެރިން ގެނައުން އިތުރުކުރުމަށް މަސައްކަތްކުރާ ކަމަށް ސަމީހު ވިދާޅުވިއެވެ.
އެހެންވީމަ ފުރަތަމަ ފަތުރުވެރިޔާއަށް މަރުހަބާ ކީގެން މިދިޔައީ. މި ކެމްޕެއިންގެ ސަބަބުން ރަށަށް އިތުރު ކުރިއެރުމާއި ތަރައްގީ ލިބިގެންދާނެ. މިއަހަރުގެ ކޮންމެ މަހެއްގައި ވެސް ހަރަކާތްތަކެއް ހިންގުމަށް މިއޮތީ ރާވާފައި. ފަތުރުވެރިންނަށް އަދި ދަތުރުވެރިންނަށް ކަމުދާނެ ކަހަލަ ތަންތަން ހެދުމާއި އެމީހުން މިތަނަށް އަންނަން މެދުވެރިވާނެ ސަބަބުތައް ބިނާކުރުމަށް އޭގެ މައްޗަށް [މި ކެމްޕެއިން] މިއޮތީ، ދަރަވަންދޫ ކައުންސިލްގެ ރައީސް އަލީ ސަމީހު
އައު އަހަރާއެކު މަގޭ ދަރަވަންދޫ ކެމްޕެއިން ރޭ ފަށާފައި ވަނީ ވަރަށް ޚާއްސަ ހަރަކާތްތަކާއެކުއެވެ. އެގޮތުން ބޮޑުބެރާއި، ސަގާފީ ނެށުމާއި، ޚާއްސަ ލަކީޑްރޯއާއެކު ގިނަ ހަރަކާތްތަކެއް ރޭ ދަރަވަންދޫގައި ބާއްވާފައިވެއެވެ.
މި އަހަރު ކުރިއަށް ގެންދިޔުމަށް ކަނޑައަޅާފައިވާ ކަންތައްތައް ވަކި ޝިއާރެއްގެ ދަށުން ކުރިއަށްގެންދަން ރާވާފައިވާއިރު، އޭގެތެރެއިން ބައެއް ކަންތައްތައް ފަށައި، އަނެއްބައި ކަންތައްތައް ފެށުމަށްޓަކައި ހަރުދަނާ ބިންގަލެއްގެ މައްޗަށް ސިޔާސަތުތަކެއް ބައްޓަންކުރުމަކީ ދަރަވަންދޫ ކައުންސިލްގެ އެންމެ ބޮޑު އަމާޒެވެ.
އެގޮތުން މި އަހަރު މަންތާ ސެންޓަރެއް ޒަމާނީ ފެންވަރަށް އެޅުމާއި، ރަށުގެ އުމްރާނީ ތަރައްގީ ދައްކުވައިދޭ ބިނާރުތައް ގާއިމްކުރުމާއި، ސަގާފީ މަރުކަޒެއް އެޅުމުގެ އިތުރުން އިޖުތިމާއީ ކަންކަން ކުރިއަށް ގެންދިޔުމަށް ބިނާއެއް އެޅުމަށް ވަނީ ނިންމާފައެވެ. ހަމައެއާއެކު އިޖުތިމާއީ ތަފާތު ޕްރޮގްރާމްތައް ހިންގުމާއި މޫދާއި ބީޗު ސަރަހައްދުގައި ކުޅިވަރުކުޅެ، ހިތްއުފާވާ ކަހަލަ ތަފާތު ފެސްޓިވަލްތަކާއި މުބާރާތްތައް ރާވައި ގިނަ ބަޔަކު ދަރަވަންދޫއަށް ޒިޔާރާތްކުރުމަށް ދައުވަތު ދިނުން ހިމެނެއެވެ.