ރިސޯޓެއްގެ މުވައްޒަފަކު ފަތުރުވެރިއެއްގެ 2،100 ޑޮލަރާއި 4،000 ރުބެލް (32،867 ރުފިޔާ) ވަގަށް ނެގިކަން ސާބިތުވުމުން 28،000 ރުފިޔާއިން ޖޫރިމަނާކޮށްފިއެވެ.
އެ މައްސަލައިގައި ދައުވާކޮށްފައިވަނީ އއ. ސޭންޑިސް ބަތަލާ ރިސޯޓުގައި މަސައްކަތް ކުރަމުންދިޔަ ހަމްޒަތު މުޙައްމަދުގެ މައްޗަށެވެ.
އެ ދައުވާގައިވަނީ، މިދިޔަ އަހަރުގެ އޮގަސްޓު 21ގައި، ހަމްޒަތު ބަލަހައްޓަމުންދިޔަ ރޫމް ނަންބަރު 140 ކޮޓަރީގައި އުޅެމުންދިޔަ ރަޝިއާގެ ރައްޔިތެއް ކަމަށްވާ އީގޯ ސުނިޓިކޯ އެ ކޮޓަރީގެ ސޭފްގައި ބަހައްޓާފައި ހުރި ފައިސާ ވަގަށް ނަގައިފައިވާ ކަމަށެވެ.
އެ މައްސަލައިގެ ޝަރީއަތުގައި ކްރިމިނަލް ކޯޓުގައި ހަމްޒަތު ވަނީ ދައުވާއަށް އިއުތިރާފުވެފައިވާ ކަމަށާއި ޕްރޮސެކިއުޓާ ޖެނެރަލްގެ އޮފީހާ އެކު އިއުތިރާފުގެ އެއްބަސްވުމެއް ހަދައިފައިވާ ކަމަށް ބުނެފައެވެ.
އެހެންވެ، ކޯޓުން އިއްޔެ ކުރި ހުކުމުގައިވަނީ އޭނާގެ އިއުތިރާފުން ދައުވާ ސާބިތުވާތީ، އިއުތިރާފު އެއްބަސްވުމުގައިވާ ގޮތުގެ މަތިން އޭނާ 28،000 ރުފިޔާގެ ޖޫރިމަނާއެއް ދެއްކުމަށް އަމުރުކޮށްފައެވެ. އެ ފައިސާ އޭނާ ދައްކަން ޖެހޭނީ ކުރިއަށް އޮތް ހަ މަސް ދުވަހުގެ ތެރޭގައެވެ.
ފުލުހުންގެ ތަފާސްހިސާބުން ދައްކާ ގޮތުގައި މިދިޔަ އަހަރު ވައްކަމުގެ 3,818 މައްސަލަ ރިޕޯޓުކޮށްފައިވާއިރު މި އަހަރު މިހާތަނަށް 2،973 މައްސަލަ ރިޕޯޓުކޮށްފައިވެއެވެ.