އަންނަ އަހަރު ހަތަރު ގައުމެެއްގައި އިންވެސްޓާ ފޯރަމް ބޭއްވުމަށް ހަމަޖެހިފައިވާ ކަމަށް ޓޫރިޒަމް މިނިސްޓަރު އިބްރާހީމް ފައިސަލް މިއަދު ވިދާޅުވެއްޖެއެވެ.
މިނިސްޓަރު ފައިސަލް މިފަދައިން ވިދާޅުވީ، ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ޙުސައިން ޒިޔާދު ކުރެއްވި ސުވާލަކަށް ޖަވާބުދެއްވަމުންނެވެ.
ޒިޔާދު ވަނީ މިދިޔަ ސަރުކާރުގައި ހަނިމާދޫ އިންޓަނޭޝަނަލް އެއާޕޯޓޫ ތަރައްގީކުރަން ފެށީ ހދ. އަތޮޅަށް ފަތުރުވެރިކަން ފުޅާކުރަންކަން ފާހަގަކުރައްވައި، އެ އަތޮޅުގައި ބެޑް އިތުރުކުރަން މި ސަރުކާރުން ކުރަމުން އަންނަ މަސައްކަތްތަކަކީ ކޮބައިތޯ ސުވާލުކުރައްވާފައެވެ.
ސުވާލަށް ޖަވާބުދެއްވަމުން މިނިސްޓަރު ވިދާޅުވީ، ފަތުތުވެރިކަމުގެ ދާއިރާއާ ގުޅުވައި ރައީސް ޑރ. މުޙައްމަދު މުއިއްޒު ވެވަޑައިގެންފައިވާ ވައުދުފުޅުތައް ފުއްދެވުމަކީ އެ މިނިސްޓްރީގެ ޒިންމާއަކަށްވާތީ، އަންނަ އަހަރުގެ ފުރަތަމަ ކުއާޓަރާއި ދެވަނަ ކުއާޓަރުގައި އިންވެސްޓާ ފޯރަމްތަކެއް ބޭއްވުމަށް ތާވަލުކުރެވިފައިވާ ކަމަށެވެ.
މިނިސްޓަރު ވިދާޅުވީ، ހަނިމާދޫ އެއާޕޯޓު އަންނަ މާޗު މަހުގެ ނިޔަލަށް ނިންމެނޭނެ ކަމަށް ލަފާކުރެވޭ ކަމަށާއި އެ މަސައްކަތް ނިމެންވާއިރަށް 4،000 އެއްހައި އެނދު އިތުރުކުރުމުގެ މަސައްކަތް ކުރަމުން އަންނަ ކަމަށެވެ.
އެ ފޯރަމްތައް ބާއްވާނީ ސިންގަޕޫރާއި އެކުވެރި އަރަބި އިމާރާތް (ޔޫއޭއީ)ގެ ދުބާއީއާއި ތައިލޭންޑުގެ އިތުރުން އިންޑިއާގައެވެ. އެގޮތުން، އެ ފޯރަމްތަކުގެ ކޮންސެޕްޓް ޑިޒައިންތަކާއި ޕްލޭންތައް ކުރެވެމުން އަންނަ ކަމަށް މިނިސްޓަރު ފައިސަލް ވިދާޅުވިއެވެ.
މީގެ އިތުރުން، ފޯރަމްތަކުގައި ރަށްތަކާ ގުޅުން ހުރި މައުލޫމާތު ހިއްސާކުރައްވާނެ ކަމަށާއި ރާއްޖޭގައި އިންވެސްޓުކޮށްފައި ތިބި ފަރާތްތަކަށް އެ ފޯރަމްތަކުގައި ބައިވެރިވެވޭނެ ކަމަށް ފައިސަލް ވިދާޅުވިއެވެ.
އެ ފަރާތްތަކުގެ ތަޖުރިބާ އިންވެސްޓަރުންނާ ހިއްސާކޮށް، ރާއްޖޭގައި ފަތުރުވެރިކަމަށް އިންވެސްޓުކުރުމަށް ފުރުސަތުތައް ފަހިވާނެ ކަމަށް މިނިސްޓަރު ގަބޫލު ކުރައްވައެވެ.
ފާހަގަކޮށްލެވޭ ގޮތުގައި މީގެ ކުރިން ވެސް ދުބާއީއާއި ޗައިނާގައި އިންވެސްޓާ ފޯރަމްތަކެއް ވަނީ ބާއްވާފައެވެ.