ފާސްޓް ފުޑް ރެސްޓޯރެންޓު މެކްޑޮނަލަޑްސް ގެ ހެމްބާގާ ކައިގެން އެމެރިކާގައި އެތައް ބަޔަކު ކާނާ ވިހަވެ އެކަކު މަރުވެއްޖެއެވެ.
އެމެރިކާގެ ސެންޓަ ފޯ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ) އިން އަންގާރަ ދުވަހު ބުނީ އެމެރިކާގެ 10 ސްޓޭޓެއްގައި މަދުވެގެން 49 މީހުން ކާނާ ވިހަވެފައިވާ ކަމަށެވެ. ގިނަ ކޭސްތައް ރިޕޯޓުކޮށްފައި ވަނީ ކޮލެރާޑޯ އަދި ނެބްރަސްކާ އިން ކަމަށްވެސް އަލް ޖަޒީރާއިން ރިޕޯޓުކޮށްފައިވެއެވެ.
ސީޑީސީން ބުނީ ބަލިވި ގިނަ މީހުން ރިޕޯޓްކޮށްފައިވާ ގޮތުގައި ބަލިވުމުގެ ކުރިން އެމީހުން ކެއީ މެކްޑޮނަލްޑްސްގައި ކުއާޓާ ޕައުންޑާ ހެމްބާގާ ކަމަށެވެ.
ކާނާ ވިހަވާން މެދުވެރިވީ ކޮން މާއްދާއަކުން ކަމެއް ސިއްޚީ އިދާރާތަކުން އަދި ހާމަކޮށްފައެއްނުވެއެވެ.
މެކްޑޮނަލްޑްސް ޔޫއެސްއޭގެ ރައީސް ޖޯ އެލިންގާ ވިދާޅުވީ އެކަމުގެ ސަބަބުން ގިނަ ސްޓޭޓްތަކަށާއި ގިނަ މެނޫ އައިޓަމްތަކަށް އަސަރު ނުކުރާ ކަމަށެވެ.
"ކާބޯތަކެތީގެ ރައްކާތެރިކަމަކީ އަހަންނާއި މެކްޑޮނަލްޑްސްގެ އެންމެންނަށް ވެސް އެހާ މުހިންމު ކަމެއް،" އެލިންގާ ނެރުނު ވީޑިއޯ ބަޔާނެއްގައި ވިދާޅުވިއެވެ.
"އަޅުގަނޑުމެން މިހާރު ވަނީ ބައެއް ސްޓޭޓްތަކުގެ އަދި ޚިޔާރުކުރެވޭ ސްޓޭޓްތަކުގެ ރެސްޓޯރެންޓްތަކުގެ މެނޫއިން ކުއާޓާ ޕައުންޑާ ވަގުތީގޮތުން ނަގަން ނިންމާފައި." އޭނާ ވިދާޅުވިއެވެ.
އިންފްލޭޝަން މަތިވުމާއި، ޣައްޒާ ހަނގުރާމައާ ގުޅިގެން ގާތްގަޑަކަށް ހަތަރު އަހަރު ދުވަހުގެ ތެރޭގައި ކުންފުނީގެ އާމްދަނީ ދަށްވެފައިވާ ކަމަށް ޝިކާގޯގައި ހުންނަ މެކްޑޮނަލްޑް ޗެއިން އިން ޖުލައި މަހު ރިޕޯޓްކޮށްފައިވެއެވެ.