ލުބުނާނުގެ ހަތިޔާރުއެޅި ޖަމާއަތް، ހިޒްބުﷲގެ މެންބަރު ހާޝިމް ސަފިއްޔުއްދީން އަވަހާރަކޮށްލާފައިވާ ކަމަށް އިސްރާއީލުގެ އަސްކަރިއްޔާއިން ބުނެފިއެވެ.
ސަފިއްޔުއްދީންއަކީ އިސްރާއީލުން މީގެ ކުރިން އަވަހާރަކޮށްލާފައިވާ ހިޒްބުﷲގެ ލީޑަރު ޙަސަން ނަޞްރިﷲގެ ދެބެންގެ ދެ ދަރި ބޭފުޅެކެވެ. ނަޞްރުﷲއަށް ފަހު ދެން ހިޒްބުﷲގެ ވެރިއަކަށް އައްޔަންކުރާނީ ސަފިއްޔުއްދީން ކަމަށް ވެސް ވަނީ ބެލެވިފައެވެ.
"މިހާރު ޔަގީންކުރެވޭ ގޮތުގައި މީގެ ގާތްގަނޑަކަށް ތިން ހަފުތާ ކުރިން ދިން ހަމަލާއެއްގައި ހިޒްބުاللهގެ އެގްޒެކެޓިވް ކައުންސިލްގެ އިސްވެރިޔާ ހާޝިމް ސަފިއްޔުއްދީނާއި ހިޒްބުاللهގެ އިންޓެލިޖެންސް ޑިރެކްޓަރޭޓްގެ ވެރިޔާ އަލީ ހުސެއިން ހާޒިމާ ވެސް ހިޒްބުاللهގެ އެހެން ކޮމާންޑަރުންނާ އެކު މަރާލާފައިވާކަން،" އިސްރާއީލުގެ އަސްކަރިއްޔާއިން ނެރުނު ބަޔާނުގައި ބުނެފައިވެއެވެ.
އެ ކަމާ ގުޅިގެން ހިޒްބުﷲއިން ވަކި އެއްޗެއް އަދި ހާމައެއްނުކުރެއެވެ.
އޮކްޓޯބަރު މަހުގެ އަށްވަނަ ދުވަހު އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ވެސް ވަނީ ސަފިއްޔުއްދީންގެ ނަން ވަކިން ހާމަނުކޮށް، އަސްކަރިއްޔާއިން އޭނާ ގެންގޮސްފައިވާ ކަމަށް ވިދާޅުވެފައެވެ.
ލުބުނާނުގެ ރައްޔިތުންނަށް ދެއްވި ތަގުރީރުގައި ނަތަންޔާހޫ ވިދާޅުވީ، އިސްރާއީލުގެ ސިފައިން އެތައް ހާސް ޓެރަރިސްޓުން މަރާލާފައިވާ ކަމަށާއި އޭގެ ތެރޭގައި ހިޒްބުاللهގެ ލީޑަރު ނަޞްރުالله ވެސް ހިމެނޭ ކަމަށެވެ. އަދި، ނަޞްރުﷲގެ ބަދަލުގައި ދެން އަންނަހުރި ލީޑަރާއި އެ ލީޑަރުގެ ބަދަލުގައި ދެން އަންނަހުރި ލީޑަރު ވެސް މަރާލާފައިވާ ކަމަށް ނަތަންޔާހޫ އޭރު ވަނީ ވިދާޅުވެފައެވެ.
އަންގާރަ ދުވަހުގެ ރޭ ދަންވަރު ސިފައިން ބުނީ އިސްރާއީލުގެ ވައިގެ ސިފައިން "ހިޒްބުاللهގެ މައި ޖާސޫސީ މަރުކަޒަށް ސީދާކޮށް ހަމަލާއެއް ދިން ކަމަށެވެ.
އެ ބަޔާނުގައި އިތުރަށް ބުނެފައިވަނީ ހަމަލާދިންއިރު، ހިޒްބުاللهގެ 25 އަށް ވުރެ ގިނަ ހަނގުރާމަވެރިން މައި މަރުކަޒުގައި ތިބި ކަމަށާއި އޭގެ ތެރޭގައި އޭރިއާ އިންޓެލިޖެންސް އެއްކުރުމާ ހަވާލުވެ ހުންނެވި ބިލާލް ސައިބް އައިޝް ވެސް ހިމެނޭ ކަމަށެވެ.
މީގެ ހަފުތާއެއް ކުރިން ބެއިރޫތަށް ހަމަލާދިން ފަހުން ސަފިއްޔުއްދީނާ ގުޅުން ކެނޑިފައިވާ ކަމަށް ހިޒްބުﷲއިން އޭރު ބުނެފައިވެއެވެ.
ހިޒްބުاللهއާ ގާތް މަސްދަރަކުން އޮކްޓޯބަރު މަހުގެ ކުރީކޮޅު އޭއެފްޕީއަށް ބުނީ، ހިޒްބުالله އަށް ތާއީދުކުރާ އީރާނާ އެކު ރަނގަޅު ގުޅުމެއް އޮންނަ ދީނީ އިލްމުވެރިޔާ ސަފިއްޔުދީނަކީ އެ ޖަމާއަތުގެ ލީޑަރު ކަމަށް ގެންނާނެ އެންމެ ބޮޑަށް ބެލެވޭ ބޭފުޅާއެވެ.