ޑާކްރެއިން އެންޓަޓެއިންމެންޓުން ނެރުމަށް ތައްޔާރުވަމުން އަންނަ ވެބް ޝޯ "ގިސް"ގެ ނަން "ރޯލީމޭ"އަށް ބަދަލު ކޮށްފިއެވެ.
ޑާކްރެއިން އިން ގިސް އިއުލާނު ކޮށްފައިވަނީ އެ ކުންފުންޏަށް 15 އަހަރު ފުރުމާ ގުޅިގެން މިދިޔަ އަހަރު އިއުލާނު ކުރި ޕްރޮޖެކްޓުތަކުގެ ތެރެއިންނެވެ. ޑާކްރެއިން އިން މިދިޔަ އަހަރު ވަނީ އެ ކުންފުނިން މަސައްކަތް ކުރަމުން އަންނަ ހަތަކަށް ވުރެ ގިނަ ޕްރޮޖެކްޓު އިއުލާނު ކޮށްފައެވެ. އޭގެތެރޭގައި ގިސް ވެސް ހިމެނެއެވެ.
ގިސް އިއުލާނު ކުރިއިރު އެއީ ފިލްމެއް ކަމެއް ނުވަތަ ޝޯއެއް ކަމެއް ހާމަކޮށްފައެއް ނުވެއެވެ. ދާދި ފަހުން ޑާކްރެއިން އިން ހާމަކޮށްފައިވަނީ ގިސް އަކީ ޓީވީ ޝޯއެއް ކަމަށެވެ.
މި ޝޯގެ މަސައްކަތް މިހާރު ކުރަމުން އަންނަ އިރު ދާދިފަހުން ހާމަކޮށްފައިވަނީ ޝޯގެ ނަން ބަދަލު ކޮށްފައިވާ ކަމަށެވެ. މި ޝޯއަށް މިހާރު ކިޔުމަށް ހަމަޖެހިފައިވަނީ "ރޯލީމޭ" އެވެ. ޝޯގެ ނަން ބަދަލު ކޮށްފައިވާ ސަބަބެއް ހާމަކޮށްފައެއް ނުވެއެވެ. ނަމަވެސް ޝޯގެ މަސައްކަތް ވަރަށް ހަލުވި ކަމާއެކު ކުރިއަށް ދާ ކަމަށް ޑާކްރެއިން އިން ހާމަކޮށްފައިވެއެވެ.
މި ޝޯގެ މައިގަނޑު ޝޫޓިންތައް މިހާރު ނިމުމަކާ ގާތް ވެފައިވާއިރު މި ޝޯގެ މައިގަނޑު ރޯލުތަކުން ފެންނާނީ ނުޒުހަތު ޝުއައިބާއި މޫސާ އަލީފެވެ.
ރޯލީމޭގެ ސްކްރިޕްޓް މަސައްކަތް ކޮށްފައިވަނީ ޝަހުދާ މަމްދޫހެވެ. ޑާކްރެއިން އިން ދާދިފަހުން އޮލިމްޕަހުގައި ދެއްކި "ބިބީ"ގެ ސްކްރިޕްޓް ވެސް ލިޔެފައިވަނީ ޝަހުދާ އެވެ. މި ޝޯ ޑައިރެކްޓް ކޮށްފައިވަނީ އަލީ ޝިފާއުއެވެ.
ޑާކްރެއިން އިން މި ޝޯގެ މަސައްކަތް ނިންމައި ޑިސެމްބަރު މަހުގައި ސްޓްރީމިން އަށް ދޫކޮށްލުމަށް އަންނަނީ މަސައްކަތް ކުރަމުންނެވެ.