ރާއްޖެއިން ދަރަނި އަދާކުރުމާ ގުޅޭ ގޮތުން ލަފާ ހޯދުމަށް އެމެރިކާގެ ކުންފުންޏަކާއެކު ހެދި އެއްބަސްވުން އުވާލުމަށް ސަރުކާރުން ނިންމި ނިންމުމަށް ކުރީގެ ރައީސް މުޙައްމަދު ނަޝީދު މިރޭ ތައުރީފު ކުރައްވައިފިއެވެ.
ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ އެމެރިކާގެ ސެންޓަވިއު ޕާޓްނާސްއާއެކު ހަދައިފައިވާ އެއްބަސްވުން އުވާލުމަކީ ރައީސް ޑރ. މުޙައްމަދު މުއިއްޒު އެޅުއްވި ބުއްދިވެރި ފިޔަވަޅެއް ކަމަށެވެ.
"މިފަދަ ޑެޓް އެެޑްވައިޒަރުން އަޅުގަނޑުމެންގެ ގައުމުތަކުން ނަގަމުން ދަނީ އިންތިހާއަށް ނާޖާއިޒު ފައިދާ،" އެ މަނިކުފާނު ވިދާޅުވިއެވެ.
ބޭރުގެ ނޫހެއް ކަމަށްވާ ރޮއިޓާސްއިން މިމަހުގެ 12 ވަނަ ދުވަހު، ކަމާ ގުޅުންހުރި ދެ މަސްދަރަކާ ހަވާލާދީ ވަނީ، ރާއްޖެއިން ދަރަންޏާ ގުޅޭ ލަފާ ހޯދުމަށް ސެންޓަވިއު ޕާޓްނާސްއާއެކު އެއްބަސްވުމެއް ހަދައިފައިވާ ކަމަށް ރިޕޯޓުކޮށްފައެވެ.
ނަމަވެސް އެ އެއްބަސްވުން އުވައިލައިފައިވާ ކަމަށް، ފިނޭންސް މިނިސްޓްރީއާ ހަވާލާދީ އިއްޔެ ބައެއް ނޫސްތަކުން ރިޕޯޓުކޮށްފައިވެއެވެ.
އެ އެއްބަސްވުމާ ގުޅޭ ގޮތުން ފިނޭންސް މިނިސްޓްރީގެ ބަހެއް މިހާތަނަށް "ސަން"އަށް ލިބިފައިނުވެއެވެ.
ރާއްޖޭގެ ބޭރު ދަރަނި އިންތިހާއަށް ބޮޑުވެފައިވާއިރު، ދަރަނި މިހާރު ހުރީ ޖީޑީޕީގެ ނިސްބަތުން 116.5 އިންސައްތައިގައެވެ. އޭގެ ތެރެއިން ބޮޑު ބައެއް ދައްކަން ޖެހެނީ އިންޑިއާއާއި ޗައިނާއަށް ކަމަށްވާއިރު ސަރުކާރުން އަންނަނީ ލޯނުތައް އަނބުރާ ދެއްކުމަށް ލުއި ގޮތްތަކެއް ހޯދަން މަޝްވަރާކުރަމުންނެވެ.
ދަރަންޏާ ބެހޭ ގޮތުން ބޭރުގެ އިދާރާތަކުން ކަންބޮޑުވުން ފާޅުކޮށްފައިވާއިރު ސަރުކާރުން ވަނީ އާމްދަނީ އިތުރުކޮށް، ޚަރަދު ކުޑަ ކުރުމުގެ ފިޔަވަޅުތައް އަޅައި، ދަރަނި އަނބުރާ ދައްކާނެ ކަމަށް ބުނެފައެވެ.